ដោយៈសុខុម
ញូវដេលី: ជាមួយនឹងសមត្ថភាពដឹកជញ្ជូនកញ្ច ប់បញ្ញើលើសពី១.៧៣០តោនក្នុងមួយសប្តាហ៍ ជើងហោះហើររបស់ក្រុមហ៊ុនសហរដ្ឋអាមេរិក DHL Express ដែលដំណើរការដោយក្រុមហ៊ុនដឹកជញ្ជូនទំនិញ តាមជើងហោះហើរសហរដ្ឋអាមេរិក Kalitta Air នឹងបង្កើនសមត្ថភាពដឹកជញ្ជូនរបស់ខ្លួន នៅអាស៊ីប៉ាស៊ីហ្វិក។ នេះបើយោងតាមសារព័ត៌មាន Stat Times ចុះផ្សាយកាលពីថ្ងៃទី៩ មេសា។
ក្រុមហ៊ុនដឹកជញ្ជូនទំនិញ តាមជើងហោះហើរអាល្លឺម៉ង់ AeroLogic នឹងបន្ថែមសមត្ថភាពដឹកជញ្ជូនរបស់ក្រុមហ៊ុន DHL Express ចំនួន៦១០តោន ដោយក្រុមហ៊ុននេះធ្វើការហោះហើរ៦ដង ក្នុងមួយសប្ដាហ៍ ពីក្រុងអាល្លឺម៉ង់ Leipzig ឆ្លងកាត់ក្រុងហុងកុង ប្រទេសសិង្ហបុរី និងប្រទេសបារ៉ែន។
បណ្ដាញដឹកជញ្ជូនធំប្រចាំតំបន់អាស៊ីខាងត្បូង របស់ក្រុមហ៊ុន DHL Express នៅក្នុងប្រទេសសិង្ហបុរី ដែលជាចំណុចឆ្លងកាត់រួម នឹងជួយពង្រឹង ហើយសម្រួលដល់ការដឹកជញ្ជូនកញ្ចប់បញ្ញើពីអាស៊ីប៉ាស៊ីហ្វិក ទៅកាន់សហរដ្ឋអាមេរិក និងអឺរ៉ុប។
ក្រុមហ៊ុន DHL Express បានពង្រឹងបណ្តាញដឹកជញ្ជូន តាមជើងហោះហើររបស់ខ្លួន ដើម្បីបំពេញតាមតម្រូវការ ដែលកំពុងកើនឡើងរវាងអាស៊ីប៉ាស៊ីហ្វិក និងសហរដ្ឋអាមេរិក ព្រមទាំងអឺរ៉ុប។
គាំទ្រដោយយន្តហោះដឹកជញ្ជូនទំនិញថ្មីៗធុន Boeing 777 ផ្លូវហោះហើរទាំងនេះនឹងផ្តល់សមត្ថភាពដឹកជញ្ជូនកញ្ចប់បញ្ញើសរុប បានរហូតដល់ទៅជិត២.៣៥០តោនក្នុងមួយសប្ដាហ៍ ធ្វើឱ្យក្រុមហ៊ុន DHL Express មានលទ្ធភាពពង្រីកសមត្ថភាព ដឹកជញ្ជូនតាមជើងហោះហើរ និងបង្កើនល្បឿនប្រគល់កញ្ចប់បញ្ញើឱ្យកាន់តែឆាប់រហ័ស។
ដំណើរការដោយក្រុមហ៊ុន Kalitta Air ដែលជាដៃគូសហការរបស់ក្រុមហ៊ុន DHL Express យន្តហោះមួយគ្រឿងធ្វើការហោះហើយ៥ដង ក្នុងមួយសប្តាហ៍ពីសហរដ្ឋអាមេរិក មកកាន់ប្រទេសសិង្ហបុរី ដោយឆ្លងកាត់ក្រុងស៊ីដនី ប្រទេសអូស្ត្រាលី។ ពីសិង្ហបុរី យន្តហោះនេះ នឹងឈប់សំចតនៅក្រុងហុងកុង និងប្រទេសជប៉ុន មុនពេលត្រលប់ទៅកាន់សហរដ្ឋអាមេរិក វិញ។ បន្ថែមពីលើនេះ ក្រុមហ៊ុន Kalitta Air នឹងដំណើរការផ្លូវហោះហើរថ្មីមួយដែលហោះហើររវាងប្រទេសសិង្ហបុរី និងក្រុងស៊ីដនី ចំនួន៦ដងក្នុងមួយសប្តាហ៍។
យន្តហោះមួយគ្រឿងផ្សេងទៀត ដែលដំណើរការដោយក្រុមហ៊ុន AeroLogic នឹងធ្វើការហោះហើរចំនួន៦ដង ក្នុងមួយសប្តាហ៍ពីក្រុង Leipzig មកកាន់ក្រុងហុងកុង និងប្រទេសសិង្ហបុរី មុនពេលឈប់សំចតនៅប្រទេសបារ៉ែន ហើយត្រលប់ទៅក្រុង Leipzig វិញ៕