ដោយ សុខុម
ហុងកុង: មហាយក្សចិន មានមហិច្ឆតាបង្កើតទីផ្សាររូបិយប័ណ្ណបរទេសក្នុងស្រុកដ៏រឹងមាំមួយដើម្បីជួយជំរុញការចរាចររូបិយប័ណ្ណយ័ន ឱ្យកាន់តែទូលំទូលាយនៅលើទីផ្សារអន្តរជាតិ ហើយការចាប់ផ្ដើមបង្កើតកិច្ចសន្យាទិញដូររូបិយប័ណ្ណមួយសម្រាប់វិនិយោគិនក្នុងស្រុក នឹងជួយពន្លឿនរបៀបវារៈរបស់ក្រុមអ្នកធ្វើគោលនយោបាយនៃរដ្ឋាភិបាលក្រុងប៉េកាំង។ នេះបើយោងតាមការចុះផ្សាយរបស់សារព័ត៌មាន South China Morning Post ចុះផ្សាយកាលពីថ្ងៃទី៧ មេសា។
តាមរយៈព្រឹត្តិបត្រមួយចេញផ្សាយកាលពីថ្ងៃអង្គារ ទី៦ មេសា ក្រុមអ្នកស្រាវជ្រាវនៅធនាគារប្រជាជនចិន (People’s Bank of China) ហៅកាត់ PBOC ដែលជាធនាគារកណ្តាលរបស់មហាយក្សចិន បានស្នើឱ្យបង្កើតទីផ្សារទិញដូររូបិយប័ណ្ណយ័ន មួយនៅក្នុងប្រទេសចិន ដើម្បីជួយវិនិយោគិនការពារខ្លួនឱ្យបានកាន់តែប្រសើរពីហានិភ័យរូបិយប័ណ្ណ។
កិច្ចសន្យាទិញដូរនេះនឹងអនុញ្ញាតឱ្យវិនិយោគិនទិញ ឬដូររូបិយប័ណ្ណយ័ន ក្នុងចំនួនជាក់លាក់ណាមួយតាមតម្លៃដែលបានកំណត់នៅពេលវេលាជាក់លាក់ណាមួយនាពេលអនាគត។ កត្តានេះនឹងអនុញ្ញាតឱ្យវិនិយោគិនធ្វើកិច្ចសន្យាជាក់លាក់លើអត្រាប្ដូរប្រាក់មួយ ដើម្បីធានាដល់ការធ្វើប្រតិបត្តិការអាជីវកម្មនាពេលអនាគត និងការពារហានិភ័យ ពេលដែលថ្លៃរូបិយប័ណ្ណចិន មួយនេះឡើងចុះៗជាបណ្ដោះអាសន្នមួយរយៈពេលខ្លី។ វាក៏នឹងធ្វើឱ្យវិនិយោគិនអាចប៉ាន់ស្មានដឹងអំពីតម្លៃរូបិយប័ណ្ណនេះនៅពេលអនាគតផងដែរ។
ផ្សារភាគហ៊ុនក្រុងហុងកុង ផ្សារភាគហ៊ុនសិង្ហបុរី និងផ្សារភាគហ៊ុនសហរដ្ឋអាមេរិក Chicago Mercantile Exchange ផ្ដល់កិច្ចសន្យាទិញដូររួចហើយសម្រាប់ការជួញដូររូបិយប័ណ្ណយ័ន នៅឯនាយសមុទ្រ។ ផ្សារភាគហ៊ុនក្រុងហុងកុង គ្រោងចាប់ផ្តើមបង្កើតកិច្ចសន្យាទិញដូរ “តូច” មួយនៅក្នុងឆមាសទី១ ដើមឆ្នាំ២០២១ នេះដើម្បីឆ្លើយតបទៅនឹងតម្រូវការទីផ្សារតូចចង្អៀតដែលមានអ្នកចូលរួមតិច។ ទោះជាយ៉ាងណា បណ្ដាវិនិយោគិនចិន ក្នុងស្រុកមិនទាន់ត្រូវបានអនុញ្ញាតឱ្យទិញដូរឧបករណ៍ហិរញ្ញវត្ថុ (Financial Instrument) បរទេសនៅឡើយទេ ប៉ុន្តែរដ្ឋាភិបាលបង្ហើបថា ខ្លួនកំពុងពិចារណាអនុញ្ញាតឱ្យពួកគេទិញដូរ។
ព្រឹត្តិបត្ររបស់ធនាគារកណ្តាលចិន ដែលសរសេរដោយអ្នកស្រាវជ្រាវ Lei Yao និង Han Xintao នេះបានរកឃើញថាមានទំនាក់ទំនងនឹងគ្នាយ៉ាងទូលំទូលាយរវាងអត្រាប្តូរប្រាក់ក្នុងទីផ្សារចិនដីគោក និងអត្រាប្តូរប្រាក់នៅឯនាយសមុទ្រដូចជាក្រុងហុងកុង ទីក្រុងឡុងដ៍ និងប្រទេសសិង្ហបុរី ជាដើម។
ធនាគារកណ្ដាលមួយនេះបានចូលរួមអំពាវនាវឱ្យសាងសង់ “មជ្ឈមណ្ឌលហិរញ្ញវត្ថុរូបិយប័ណ្ណយ័នជាសកល” (Global Yuan Financial Centre) មួយនៅក្រុងសៀងហៃ ដែលជាមជ្ឈមណ្ឌលសេដ្ឋកិច្ច និងហិរញ្ញវត្ថុរបស់មហាយក្សចិន ផងដែរ។ ការបង្កើតមជ្ឈមណ្ឌលក្នុងស្រុកមួយសម្រាប់ការទិញដូររូបិយប័ណ្ណយ័ន គឺស្របទៅនឹងយុទ្ធសាស្ត្រសេដ្ឋកិច្ចរបស់រដ្ឋាភិបាលក្រុងប៉េកាំង ដែលជំរុញធ្វើយ៉ាងណាឱ្យប្រទេសនេះកាន់តែឯករាជ្យម្ចាស់ការលើខ្លួនឯងដើម្បីកាត់បន្ថយផលប៉ះពាល់ នៃការគំរាមកំហែងពីខាងក្រៅ។
ទោះជាយ៉ាងណា កិច្ចខិតខំប្រឹងប្រែងរបស់រដ្ឋាភិបាលក្រុងប៉េកាំង នៅក្នុងការជំរុញឱ្យមានការប្រើប្រាស់រូបិយប័ណ្ណយ័ន របស់ខ្លួនកាន់តែច្រើននៅបរទេស មានសន្ទុះរីកចម្រើនយឺតយ៉ាវណាស់ ហើយនៅតែចាញ់រូបិយប័ណ្ណដុល្លារអាមេរិក ឆ្ងាយដាច់ ទោះបីជារូបិយប័ណ្ណដុល្លារធ្លាក់ចុះចំណែកទីផ្សារទូទាត់ទូទាំងពិភពលោក និងទុនបម្រុងអន្តរជាតិ (Foreign Exchange Reserves) ក្នុងរយៈពេលប៉ុន្មានឆ្នាំចុងក្រោយនេះក្ដី៕