ដោយៈ សាវុធ
ភ្នំពេញៈ ហាងទំនិញ 7-Eleven ដ៏ល្បីឈ្មោះត្រូវបានមើលថា កំពុងបើកការដ្ឋានសាងសង់នៅទីតាំង២កន្លែង ក្នុងក្រុងភ្នំពេញ ដោយមានការសរសរនៅមុខការដ្ឋានថា “ជួបគ្នាទីនេះ ក្នុងពេលឆាប់” ។
ទីតាំង១របស់ហាងទំនិញ 7-Eleven ត្រូវបានគេឃើញថា ស្ថិតនៅតាមបណ្ដោយផ្លូវជាលេខ៥ ព្រែកព្នៅ ខណៈទីតាំងមួយទៀត ស្ថិតនៅតាមបណ្ដោយផ្លូវជាលេខ៦ ម្ដុំព្រែកលាប។
តាមការប្រកាសរបស់ទំព័រហ្វេសប៊ុកផ្លូវការរបស់ 7-Eleven Cambodia បានឲ្យដឹងថា គិតត្រឹមឆ្នាំ២០២០ ប្រទេសចំនួន៣ ដែលមានសាខា 7-Eleven ច្រើនជាងគេ រួមមានប្រទេសជប៉ុន២១,០០១ហាង ប្រទេសថៃ១២,៣២២ហាង និងប្រទេសកូរ៉េ១០,០១៦ហាង។
បច្ចុប្បន្ននេះ 7-Eleven បានដំណើរការនៅ១៨ ប្រទេសរួចមកហើយ ហើយកម្ពុជានឹងក្លាយជាប្រទេសទី១៩ ដែលមានហាង 7-Eleven បើកដំណើរការនៅក្នុងឆ្នាំ២០២១នេះ។
ក្រុមហ៊ុន CP All Plc ដែលបានចុះបញ្ជីនៅថៃ បានប្រកាសអំពីផែនការបើកហាងទំនិញខ្នាតតូចចំនួន៧០០កន្លែងនៅកម្ពុជា។ នេះបើយោងតាមរបាយការណ៍របស់ផ្សារមូលបត្រថៃ (SET) បានចេញផ្សាយកាលពីពេលថ្មីៗនេះ។ ក្រុមហ៊ុន CPALL ទទួលបានកិច្ចព្រមព្រៀងពាណិជ្ជកម្មមេ ដើម្បីបើកហាងនៅឡាវ និងកម្ពុជា។
របាយការណ៍ដដែលនេះបានឲ្យដឹងថា “ផ្អែកតាមការស្ទង់មតិទីផ្សារ និងការប៉ាន់ប្រមាណបឋមរបស់ក្រុមហ៊ុន គឺនឹងបើកហាងនេះ ឲ្យបានចំនួនហាង៧០០កន្លែងនៅកម្ពុជា និងចំនួនហាង៥០០កន្លែងនៅឡាវ គ្រោងនឹងបើកនៅពេលខាងមុខ” ។
ក្រុមហ៊ុនថៃនេះ គ្រោងបើកហាងទំនិញនៅកម្ពុជា ក្នុងឆ្នាំ២០២១ ដែលមានរយៈពេល៣០ឆ្នាំ ហើយអាចបន្តបាន២០បន្ថែមទៀត។ ការចូលមកវិនិយោគនេះ ក្រសួងពាណិជ្ជកម្មអះអាងថា មិនបង្កឲ្យមានផលប៉ះពាល់ហាងទំនិញនៅកម្ពុជាឡើយ។
លោកស៊ាង ថៃអ្នកនាំពាក្យក្រសួងពាណិជ្ជកម្ម ធ្លាប់បានលើកឡើងថា ក្រុមហ៊ុន CP ALL គ្រោងនឹងបើកហាងទំនិញ7-Eleven ពី៧០០ទៅ១០០០សាខានៅទូទាំងប្រទេសកម្ពុជា ក្នុងរយៈពេល៥ឆ្នាំដំបូង។ ជំហានបន្ទាប់ក្រុមហ៊ុននេះ នឹងបើកលក់ហ្វ្រេនឆាយ 7-Eleven ដល់អ្នកជំនួញក្នុងប្រទេសកម្ពុជា។ ក្រុមហ៊ុន CP ALL បានបោះទុនតម្កល់ជាង៥ពាន់ដុល្លារ ក្នុងការចុះបញ្ជីពាណិជ្ជកម្មនៅក្រសួង។
អ្នកនាំពាក្យរូបនេះបានអះអាងថា គម្រោងនេះ គឺមិនបង្កឲ្យមានផលប៉ះពាល់ដល់អ្នកលក់ទំនិញនៅកម្ពុជាឡើយ។ លោកបានបន្ថែមថា វាជាការបង្កើនទំហំសេដ្ឋកិច្ចកម្ពុជា៕
