ដោយៈសុខុម
គូឡាឡាំពួ: លំហូរទុនវិនិយោគផ្ទាល់ពីបរទេស (FDI) ចូលប្រទេសម៉ាឡេស៊ីពីសំណាក់វិនិយោគិនកូរ៉េ ជប៉ុន បានធ្វើឲ្យប្រទេសនេះទទួលបានទុនវិនិយោគរហូតដល់ជិត៤០០០លានដុល្លារអាមេរិក។
ប្រទេសម៉ាឡេស៊ី បានប្រកាសថ្ងៃពុធ ទី៧ មេសាថា ខ្លួនទទួលបានកិច្ចព្រមព្រៀងវិនិយោគពីប្រទេសកូរ៉េខាងត្បូង និងប្រទេសជប៉ុន ក្នុងទំហំទឹកប្រាក់រហូតដល់ទៅ៣,៨៩ពាន់លានដុល្លារអាមេរិក និងការទិញទំនិញនាំចេញរបស់ម៉ាឡេស៊ី ក្នុងទំហំទឹកប្រាក់ប្រមាណ២៣៨លានដុល្លារនៅប៉ុន្មានឆ្នាំខាងមុខ។ នេះបើយោងតាមការចុះផ្សាយរបស់សារព័ត៌មាន CNA។
ប្រទេសម៉ាឡេស៊ីបានបង្ហាញសុទិដ្ឋិនិយមថា នឹងអាចទាក់ទាញការវិនិយោគបរទេសបានបន្ថែមទៀតនៅឆ្នាំនេះ ក្រោយការវិនិយោគបរទេសនៅក្នុងប្រទេសនេះ បានដាំក្បាលចុះខ្លាំងក្នុងឆ្នាំ២០២០ ។ នៅក្នុងរបាយការណ៍ខែមករា ដើមឆ្នាំនេះ សន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍន៍ (United Nations Conference on Trade and Development) បានលើកឡើងថា ការវិនិយោគផ្ទាល់ពីបរទេស (FDI) ចូលក្នុងប្រទេសនេះ បានធ្លាក់ចុះរហូតដល់ទៅ៦៨%កាលពីឆ្នាំមុន ដែលជាការធ្លាក់ចុះដ៏ធំបំផុតនៅអាស៊ីអាគ្នេយ៍។
ធនាគារពិភពលោក (World Bank) ក៏បានលើកឡើងដែរថា ក្រៅពីផលប៉ះពាល់ដែលបង្កដោយសារការឆ្លងរាតត្បាតវីរុសកូវីដ-១៩ ការធ្លាក់ចុះការវិនិយោគផ្ទាល់ពីបរទេសនៅក្នុងប្រទេសនេះមួយអន្លើរ ក៏ដោយសារបញ្ហាគោលនយោបាយ និងបញ្ហារចនាស ម្ព័ន្ធដ៏អូសបន្លាយផងដែរ។
កិច្ចព្រមព្រៀងជាមួយប្រទេសកូរ៉េខាងត្បូង និងប្រទេសជប៉ុន នេះសម្រេចបាន នៅពេលលោក Mohamed Azmin Ali រដ្ឋមន្ត្រីពាណិជ្ជកម្ម និងឧស្សាហកម្មអន្តរជាតិនៃប្រទេសម៉ាឡេស៊ី បានបញ្ចប់បេសកកម្មពាណិជ្ជកម្ម រយៈពេលមួយសប្តាហ៍របស់លោកទៅប្រទេសទាំងពីរកាលពីថ្ងៃអង្គារ ទី៦ មេសា។
តាមរយៈសេចក្តីថ្លែងការណ៍មួយ ក្រសួងនេះបានលើកឡើងថា “បេសកកម្មនេះដែលជាលើកដំបូងសម្រាប់ឆ្នាំនេះ មានសារៈសំខាន់ណាស់ ចំពោះការខិតខំប្រឹងប្រែងយ៉ាងខ្លាំងរបស់ក្រសួង ដើម្បីនាំការវិនិយោគផ្ទាល់ពីបរទេសចូលក្នុងប្រទេសម៉ាឡេស៊ី” ។
ក្រសួងបានបន្ថែមទៀតថា ក្រុមហ៊ុនកូរ៉េខាងត្បូង បានប្តេជ្ញាបោះទុនវិនិយោគក្នុងទំហំទឹកប្រាក់សរុបជិត១,៨ពាន់លានដុល្លារ នៅក្នុងប្រទេសម៉ាឡេស៊ី និងទិញផលិតផលនាំចេញរបស់ម៉ាឡេស៊ី ក្នុងទំហំទឹកប្រាក់១៧លានដុល្លារ។ ចំណែកឯក្រុមហ៊ុនជប៉ុន បានព្រមព្រៀងបោះ បោះទុនវិនិយោគក្នុងទំហំទឹកប្រាក់២,២ពាន់លានដុល្លារ និងទិញផលិតផលនាំចេញរបស់ម៉ាឡេស៊ី ក្នុងទំហំទឹកប្រាក់២២២លានដុល្លារ។
ក្រសួងនេះបានគូសបញ្ជាក់បន្ថែមថា កិច្ចព្រមព្រៀងទាំងនេះ រួមទាំងការវិនិយោគ២៤២លានដុល្លារពីក្រុមហ៊ុន Nippon Electric Glass ដើម្បីផលិតក្រណាត់សរសៃកញ្ចក់ (glass fibre) សម្រាប់វិស័យរថយន្ត សំណង់ និងថាមពលផងដែរ។
ទោះជាយ៉ាងណា ក្រសួងមិនបញ្ជាក់លម្អិតថា តើការបោះទុនវិនិយោគនេះនឹងធ្វើឡើងជាក់ស្ដែងនៅពេលជាក់លាក់ណាមួយនោះឡើយ៕
