ដោយៈសុខុម
តូក្យូ: យោងតាមសារព័ត៌មាន The Wall Street Journal ចុះផ្សាយកាលពីថ្ងៃទី៥ មេសា ឱ្យដឹងថា ក្រុមហ៊ុនយក្សជប៉ុន Hitachi Ltd បានបោះទុនរហូតដល់ទៅ៩,៦ពាន់លានដុល្លារ ទិញយកក្រុមហ៊ុនវិស្វកម្មឌីជីថលរបស់សហរដ្ឋអាមេរិក GlobalLogic Inc ដើម្បីហក់ចូលប្រឡូកក្នុងអាជីវកម្មសូហ្វវែរ (Software) ។
ក្រុមអ្នកវិភាគមើលឃើញថា ក្រុមហ៊ុនយក្សជប៉ុនមួយនេះ ដើរតាមគន្លងក្រុមហ៊ុនហាដវែរ (Hardware) ចាស់គំរឹលផ្សេងៗទៀត ដែលកំពុងងាកមកវិនិយោគលើការអភិវឌ្ឍសូហ្វវែរសហគ្រាស ដែលមានការរីកចម្រើនយ៉ាងឆាប់រហ័ស។
ដោយមានឈ្មោះល្បីរន្ទឺជាច្រើនទសវត្សរ៍មកហើយ ខាងផលិតទូរទស្សន៍ ម៉ាស៊ីនថតវីដេអូ និងអាគុយ ក្រុមហ៊ុន Hitachi Ltd បានសម្រេចចិត្តហក់ចូលក្នុងវិស័យនេះដោយឥតព្រាងទុក ខណៈវិធានការរឹតបន្តឹងនានា ដើម្បីទប់ស្កាត់ការឆ្លងរាតត្បាតវីរុសកូវីដ-១៩ បានជំរុញឱ្យឧស្សាកម្មទាំងអស់ ផ្លាស់ប្ដូរទម្រង់អាជីវកម្មរបស់ខ្លួន ទៅឌីជីថលកាន់តែឆាប់រហ័សដោយមិននឹកស្មានដល់។
លោក Gajen Kandiah នាយកប្រតិបត្តិក្រុមហ៊ុនហេដ្ឋារចនាសម្ព័ន្ធឌីជីថល Hitachi Vantara ដែលជាបុត្រសម្ព័ន្ធរបស់ក្រុមហ៊ុន Hitachi Ltd បានថ្លែងថា ក្រុមហ៊ុនសង្ឃឹមថា នឹងអាចប្រើប្រាស់ជំនាញវិស្វកម្មរបស់ក្រុមហ៊ុន GlobalLogic ផ្នែកផលិត ថាមពល និងវិស័យផ្សេងទៀត ដើម្បីពង្រីកខ្លួនទៅកាន់ប្រទេសជាច្រើនក្នុងពិភពលោក។
លោកបញ្ជាក់ថា “ជាអកុសល ដូចអ្នកទាំងអស់គ្នាបានឮរួចមកហើយថា មានតែក្រុមហ៊ុនមួយចំនួនតូចប៉ុណ្ណោះ ដែលកំពុងបង្កើនការប្រើប្រាស់ទិន្នន័យ គឺមិនមែន៩៩%នោះទេ” ។
សេវាកម្មឌីជីថល និងការវិភាគទិន្នន័យ បានក្លាយជាគុណប្រយោជន៍ប្រកួតប្រជែងដ៏លេចធ្លោ សម្រាប់ក្រុមហ៊ុនជាច្រើន អំឡុងពេលឆ្លងរាតត្បាតវីរុសកូវីដ-១៩ ខណៈស ង្វាក់ផ្គត់ផ្គង់ទូទាំងពិភពលោក មានបញ្ហារាំងស្ទះ ហើយបុគ្គលិកក្រុមហ៊ុន និងអតិថិជនទំនាក់ទំនងគ្នាតាមអនឡាញ។
ក្រុមហ៊ុន GlobalLogic មានបុគ្គលិកជាង២០.០០០នាក់ នៅក្នុងប្រទេសជាច្រើនដូចជាឥណ្ឌា អឺរ៉ុប និងសហរដ្ឋអាមេរិក ដើម្បីជួយក្រុមហ៊ុននានាលើគម្រោងឌីជីថលបែបនេះ៕
