ដោយៈ ម៉ាណេត
បាងកកៈ រដ្ឋមន្ត្រីក្រសួងកីឡា និងទេសចរណ៍ថៃ Phiphat Ratchakitprakarn បានលើកឡើងថា ថៃនិងសិង្ហបុរីកំពុងពិភាក្សា បង្កើតការធ្វើដំណើរដោយកន្លែង ឬហៅថា Travel Bubble រវាងប្រទេសទាំងពីរ ដើម្បីជំរុញការធ្វើដំណើរឡើងវិញ។ នេះបើយោងតាមការចេញផ្សាយរបស់គេហទំព័រ Travel Daily Media នៅថ្ងៃទី៦ ខែមេសា ឆ្នាំ២០២១ ។
លោកបានបន្ថែមថា ថៃកំពុងសម្លឹងមើលការរៀបចំ ការធ្វើដំណើរដោយកន្លែង មួយបណ្តាប្រទេសអាស៊ាន ដែលមានករណីជំងឺកូវីដ១៩ទាប ដូចជា ប្រទេសវៀតណាម និងឡាវជាដើម។
ការធ្វើដំណើរដោយកន្លែង ឬហៅថាTravel Bubble នេះ ផ្តោតលើការរៀបចំកញ្ចប់ទេសចរណ៍ទទួលភ្ញៀវទេសចរអន្តរជាតិ ដែលមានការគ្រប់គ្រងត្រឹមត្រូវពីបណ្តាតំបន់ ឬប្រទេសដែលមានសុវត្ថិភាពពីកូវីដ១៩ ។
លោក Phiphat បានថ្លែងថា “សិង្ហបុរីមានបទពិសោធន៍ ក្នុងការបង្កើតផ្លូវបៃតងជាមួយបណ្តាប្រទេសនៅអាស៊ី និងអូសេអានីហើយថៃសង្ឃឹមថា នឹងចូលរួមជាមួយក្រុមនោះ” ។ លោកបន្តថា “ទន្ទឹមនឹងនេះ ការចែករំលែកព្រំដែនដីគោក ជាមួយប្រទេសវៀតណាម និងឡាវ ធ្វើឱ្យមានភាពងាយស្រួល ក្នុងការបង្កើតការធ្វើដំណើរដោយកន្លែង” ។
លោករដ្ឋមន្ត្រីបានបង្ហើបថា ប្រទេសថៃ មានគោលបំណងចាប់ផ្តើមការធ្វើដំណើរនេះ ក្នុងខែតុលាខាងមុខ។
ទន្ទឹមនឹងនេះដែរ លោក Mario Hardy នាយកប្រតិបត្តិនៃសមាគមទេសចរណ៍អាស៊ីប៉ាស៊ីហ្វិក បានលើកឡើងថា ថៃ និងវៀតណាម អាចបង្កើតការធ្វើដំណើរបែបនេះបានយ៉ាងងាយស្រួល ដោយហេតុថាប្រទេសទាំង២អាចគ្រប់គ្រង ហើយរក្សាអត្រាឆ្លងជំងឺកូវីដ១៩ទាប។
ទោះយ៉ាងណា ប្រទេសថៃនៅតែមានបំណង ជំរុញឧស្សាហកម្មទេសចរណ៍របស់ខ្លួន ដោយរក្សាព្រំដែនដោយបើកចំហ តែមានវិធានការណ៍ទប់ស្តាត់តឹងរឹង ទាក់ទងនឹងជំងឺកូវីដ១៩ ។ អាជ្ញាធរទេសចរណ៍នៅតែបន្តបង្កើតនូវមធ្យោបាយថ្មីៗ ដើម្បីទាក់ទាញភ្ញៀវទេសចរអន្តរជាតិ ដូចជា ការការធ្វើចត្តាឡីស័ករយៈពេលខ្លី ការធ្វើចត្តាឡីស័កនៅកន្លែងវាយកូនហ្គោល និងទូកលើកបាល់កម្សាន្តជាដើម៕
