ដោយៈ សាវុធ
ភ្នំពេញៈ ក្រុមភ្នាក់ងារពន្ធដារ (Tax Agent) និងអ្នកជាប់ពន្ធផ្សេងៗ ដែលជាអ្នកប្រើប្រាស់ប្រព័ន្ធ Online បង្កើតដោយអគ្គនាយកដ្ឋានពន្ធដារ សុទ្ធតែបានលើកឡើងពីភាពងាយស្រួល ក្នុងការប្រើប្រាស់ប្រព័ន្ធ Online Service របស់អគ្គនាយកដ្ឋានពន្ធដារ ជាពិសេសប្រព័ន្ធចាត់ចែង លិខិតប្រកាសបង់ពន្ធប្រចាំខែ និងបង់ពន្ធលើប្រាក់ចំណូលប្រចាំឆ្នាំ (Monthly Tax and ToI E-Filing)។
អ្នកបង់ពន្ធ និងអ្នកផ្ដល់សេវាខាងផ្នែកពន្ធដារ រំពឹងជឿជាក់ថា អគ្គនាយកដ្ឋានពន្ធដារនឹងបន្តអភិវឌ្ឍកម្មវិធីបង់ពន្ធ ឲ្យកាន់តែងាយស្រួលថែមទៀត។
លោកគង់ វិបុលរដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលបានថ្លែងថា កត្តាដែលរៀបចំឱ្យប្រើប្រព័ន្ធបច្ចេកវិទ្យាព័ត៌មាននេះ គឺជាការពង្រឹងនូវផ្នែកអភិ បាលកិច្ចល្អ និងតម្លាភាព ឈានទៅរករដ្ឋបាលកិច្ចល្អ។ ដូច្នេះនិរន្តរភាពនៃចំណូល ក៏ដូចជាកំណើនចំណូលនៅបន្តមាន កត្តាសំខាន់ គឺដោយសារការពង្រឹងអភិបាលកិច្ចល្អ។
លោកបានបន្តទៀតថា “ក្នុងកាលៈទេសៈលំបាក ដែលមានវិបត្តិសេដ្ឋកិច្ចបណ្តាលពីផលប៉ះពាល់របស់ Covid-19 បើមិនមានការរៀបចំនូវប្រព័ន្ធបច្ចេកវិទ្យាព័ត៌មាន ដោយស្មារតីបុរេសកម្ម និងបានទាន់ពេលវេលាដូចពេលនេះទេ គឺចំណូលប្រហែលជាលំបាក ក្នុងការគ្រប់គ្រង និងប្រមូលចំណូលពន្ធ” ។
នេះជាការវិវត្តថ្មីមួយ សម្រាប់រូបលោកនឹងបន្តការអភិវឌ្ឍ ប្រព័ន្ធបច្ចេកវិទ្យាព័ត៌មាន ឲ្យស្របតាមតម្រូវការអ្នកប្រើប្រាស់ (User Experiences and User Friendly) ដែលសម្ដេចតេជោនាយករដ្ឋមន្ត្រី តែងតែបានលើក និងណែនាំឲ្យមន្ត្រីរាជការដូចជាថ្នាក់ដឹកនាំ នៅក្នុងរាជរដ្ឋាភិបាលពង្រឹងសេវាដល់ប្រជាជន និងអ្នកបង់ពន្ធឲ្យកាន់តែប្រសើរឡើង ធ្វើយ៉ាងណាឲ្យងាយស្រួលក្នុងការបង់ពន្ធ។
លោកគង់ វិបុលបានថ្លែងថា “ខ្ញុំបាទនឹងបន្តការខិតខំប្រឹងប្រែង អភិវឌ្ឍនៅកម្មវិធីបច្ចេកវិទ្យាព័ត៌មាន IT ថែមទៀត ដើម្បីឲ្យសេវាបង់ពន្ធកាន់តែប្រសើរឡើងជាលំដាប់” ។
លោកបានបញ្ជាក់ថា ព្រឹត្តិការណ៍សហគមន៍២០កុម្ភៈ អគ្គនាយកដ្ឋានពន្ធដារបានប្រកាន់ខ្ជាប់ខ្ជួននូវគោលការណ៍ រាជរដ្ឋាភិបាលក្នុងការបង្ការទប់ស្កាត់ជំងឺកូវីដ១៩ ដោយកាត់បន្ថយវត្តមានមន្ត្រី៩០ភាគរយ និងមានរៀបចំមន្ត្រីឆ្លាស់វេនគ្នាបំពេញការងារ និងបានចាត់ឲ្យមានការបំពេញការងារពីផ្ទះ ទាំងយប់ទាំងថ្ងៃ ដើម្បីធានាបាននូវនិរន្តរភាពការងារ គ្រប់គ្រងប្រមូលចំណូលពន្ធជូនរដ្ឋ និងការផ្តល់សេវាជូនអ្នកជាប់ពន្ធ៕