ដោយៈ ម៉ាណេត
ភ្នំពេញៈ បន្ទាប់ពីការចែករំលែកតៗគ្នាលើបណ្តាញសង្គមថា ក្រុមហ៊ុន Tesla គ្រោងនឹងបើកការិយាល័យនៅទីក្រុងភ្នំពេញ មន្ត្រីជាន់ខ្ពស់នៃក្រសួងពាណិជ្ជកម្ពុជាបានបញ្ជាក់ថា ក្រុមហ៊ុនផលិតរថយន្ត អគ្គិសនីរបស់អាមេរិក Tesla របស់លោក Elon Musk កំពូលមហាសេដ្ឋីលើពិភពលោក បានចុះបញ្ជីនៅក្រសួងពាណិជ្ជកម្មកម្ពុជា។
ការលើកឡើងជាច្រើនលើបណ្ដាញសង្គម Facebook ថា Tesla នឹងបើកការិយាល័យរបស់ខ្លួន នៅឆាប់ៗខាងមុខនេះ បន្ទាប់ពី Facebook Page មួយដែលមានឈ្មោះថា “Tesla Cambodia” បានបង្ហោះនូវភាពអគារមួយ ដែលមាននិមិត្តសញ្ញារបស់ក្រុមហ៊ុន Tesla ដែលទីតាំងនៅលើមហាវិថីសហព័ន្ធរុស្ស៊ី ។
លោកស៊ាង ថៃ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម នៅថ្ងៃទី០២ ខែមេសា ឆ្នាំ២០២១នេះ លោកបាន បញ្ជាក់ថា ក្រុមហ៊ុន Tesla ពិតជាបានចុះបញ្ជីនៅក្នុងប្រទេសកម្ពុជាមែន។
លោកបានថ្លែងបញ្ជាក់ថា “ក្រុមហ៊ុន Tesla ពិតជាបានចុះបញ្ជីនៅក្រសួងពាណិជ្ជកម្មកម្ពុជា ហើយមានទីតាំងពីរផ្សេងគ្នា ក្នុងរាជធានីភ្នំពេញ” ។
ក្រុមហ៊ុន Tesla ជាក្រុមហ៊ុនផលិតរថយន្តអគ្គិសនីមួយដែលល្បី និងនាំមុខនាពេលបច្ចុប្បន្ន ដែលមានលោក Elon Musk ជាអ្នកដឹកនាំ ហើយថ្មីៗនេះ លោកកំពុងតែពង្រីកទីផ្សាររថយន្តរបស់ខ្លួន មកកាន់តំបន់អាស៊ី ដូចជានៅចិន ហ្វីលីពីន ម៉ាឡេស៊ី និងឥណ្ឌា ខណៈដែលកាលពីឆ្នាំ២០២០ ចិនបានក្លាយ ជាទីផ្សារធំលំដាប់ទី២របស់ Tesla ក្នុងការលក់រថយន្តបន្ទាប់ពីទីផ្សារអឺរ៉ុប៕
