ដោយៈសុខុម
វ៉ាស៊ីនតោន: ក្រុមហ៊ុនបច្ចេកវិទ្យាយក្ស Google ដែលជាបុត្រសម្ព័ន្ធនៃក្រុមហ៊ុនមេ Alphabet Inc របស់សហរដ្ឋអាមេរិក បានប្រកាសកាលពីថ្ងៃព្រហស្បតិ៍ទី១៨ ខែមីនា ថា ខ្លួនគ្រោងបោះទុន រហូតដល់ទៅជាង៧ពាន់លានដុល្លារ ដើម្បីវិនិយោគលើការិយាល័យ និងមជ្ឈមណ្ឌលរក្សាទុកទិន្នន័យទូទាំងសហរដ្ឋអាមេរិក។
យោងតាមការចុះផ្សាយរបស់សារព័ត៌មាន CNA ដែលបានដកស្រង់ប្រភពចេញពីទីភ្នាក់ងារព័ត៌មាន Reuters បានឱ្យដឹងថា ការប្រកាសបោះទុនវិនិយោគយ៉ាងច្រើនសន្ធឹកសន្ធាប់នេះធ្វើឡើង នៅពេលចរាចរអ៊ីនធឺណិត(internet traffic) ឬលំហូរទិន្នន័យក្នុងប្រព័ន្ធអ៊ីនធឺណិតទាំងមូល របស់ក្រុមហ៊ុននេះកើនឡើងខ្លាំង ក្រោយវិធានការរឹតបន្តឹងនានា ដើម្បីទប់ស្កាត់ការឆ្លងរាត្បាតវីរុសកូវីដ-១៩ បានធ្វើមានអ្នកប្រើប្រាស់ និងការផ្សព្វផ្សាយពាណិជ្ជកម្មតាមអនឡាញកាន់តែច្រើន។
រយៈពេលប៉ុន្មានឆ្នាំជាប់ៗគ្នានេះ ក្រុមហ៊ុនយក្សមួយនេះ បានបោះទុនយ៉ាងច្រើនសន្ធឹកសន្ធាប់វិនិយោគលើការិយាល័យ និងមជ្ឈមណ្ឌលរក្សាទុកទិន្នន័យ នៅសហរដ្ឋអាមេរិក ដោយក្នុងឆ្នាំ២០២០ បានបោះទុនជាង ១០ពាន់លានដុល្លារ ហើយក្នុងឆ្នាំ២០១៩ បានបោះទុនជាង ១៣ពាន់លានដុល្លារ។
ក្រុមហ៊ុននេះបាននិយាយកាលពីថ្ងៃព្រហស្បតិ៍សប្ដាហ៍នេះថា ការវិនិយោគចុងក្រោយនេះ រួមបញ្ចូលទាំងផែនការពង្រីក មជ្ឈមណ្ឌលរក្សាទុនទិន្នន័យ នៅរដ្ឋណេប្រាស្កា (Nebraska) រដ្ឋសៅ ខារ៉ូឡាយណា (South Carolina) និងរដ្ឋតិចសាសផងដែរ។
ក្រុមហ៊ុន Google ក៏គ្រោងបោះទុនវិនិយោគចំនួន ១ពាន់លានដុល្លារ នៅក្នុងរដ្ឋកាលីហ្វ័រញ៉ា ដែលជាមូលដ្ឋានដើមរបស់ខ្លួនផងដែរ។
គម្រោងបោះទុនវិនិយោគបន្ថែមនេះធ្វើឡើង នៅពេលដែលក្រុមហ៊ុនជាច្រើននឹងចាកចេញពីតំបន់ Silicon Valley ក្នុងរដ្ឋកាលីហ្វ័រញ៉ា បន្ទាប់ពីការឆ្លងរាតត្បាតវីរុសកូវីដ-១៩ បានបង្ខំឱ្យបុគ្គលិកក្រុមហ៊ុនភាគច្រើន ត្រូវប្ដូរទៅធ្វើការងារពីផ្ទះ។ ចំណុចកាន់តែសំខាន់ជាងនេះទៀត ដោយសារចំណាយប្រតិបត្តិការ និងការបង់ពន្ធនៅក្នុងរដ្ឋនេះខ្ពស់ជាងគេ។
លោក Sundar Pichai នាយកប្រតិបត្តិក្រុមហ៊ុន Alphabet Inc និងក្រុមហ៊ុនបុត្រសម្ព័ន្ធ Google បានគូសបញ្ជាក់ថា ការវិនិយោគនេះ នឹងជួយបង្កើតការងារពេញម៉ោងថ្មីៗយ៉ាងតិចក៏១០ .០០០កន្លែងដែរ៕