ដោយៈ ម៉ាណេត
ប៉េកាំងៈ ប្រទេសចិនបានត្រៀមខ្លួនរួចជាស្រេច ដើម្បីបន្ធូរបន្ថយការរឹតត្បិតការដំណើរព្រំដែនចូលក្នុងប្រទេសវិញ ដោយអនុញ្ញាតឱ្យជនបរទេសមួយចំនួន ដែលមកពីសហរដ្ឋអាមេរិក ឥណ្ឌា កម្ពុជា និងប៉ាគីស្ថាន ប្រសិនបើពួកគេបានទទួលវ៉ាក់សាំងកូវីដ១៩ផលិតដោយប្រទេសចិន។
រដ្ឋាភិបាលចិនត្រូវបានបិទប្រទេស ដោយមិនអនុញ្ញាតជនបរទេសភាគច្រើនចូលមកប្រទេស ចាប់តាំងពីខែមីនា ឆ្នាំមុន ហើយបានទប់ស្កាត់ការរីករាលដាល នៃជំងឺកូវីដ១៩បានយ៉ាងប្រសើរ។ នេះបើយោងតាមការចេញផ្សាយរបស់កាសែតបាងកកប៉ុស្តិ៍ នៅថ្ងៃទី១៦ ខែមីនា ឆ្នាំ២០២១ ។
ប៉ុន្តែស្ថានទូតចិន នៅតាមប្រទេសមួយចំនួន បានចេញសេចក្តីជូនដំណឹងដោយនិយាយថា ខ្លួននឹងបើកពាក្យសុំទិដ្ឋាការ ដោយជ្រើសរើសប្រជាជនណា ដែលទទួលបានវ៉ាក់សាំងកូវីដ១៩ ផលិតនៅប្រទេសចិន។
វ៉ាក់សាំងរបស់ចិន ត្រូវបានដាក់ឱ្យប្រើប្រាស់ នៅតាមបណ្តាប្រទេសជាច្រើនជុំវិញពិភពលោករួមមានទួរគី ឥណ្ឌូនេស៊ី និងកម្ពុជា។
ជាមួយគ្នានេះដែរ ស្ថានទូតចិននៅសហរដ្ឋអាមេរិក បានឱ្យដឹងនៅក្នុងសេចក្តីថ្លែងការណ៍មួយចុះកាលពីថ្ងៃចន្ទនេះថា ខ្លួននឹងចាប់ផ្តើមដំណើរការដល់ “អ្នកដាក់ពាក្យសុំទិដ្ឋាការ ដែលចាក់វ៉ាក់សាំងកូវីដ១៩របស់ចិន” ។
កម្មវិធីនេះអាចអនុវត្តចាប់ពីសប្តាហ៍នេះ ទៅដល់អ្នក ដែលមកចិនដីគោក ដើម្បីបន្តការងារ ការដំណើរសម្រាប់អាជីវកម្ម រឺសម្រាប់ “តម្រូវការមនុស្សធម៌” ដូចជាការជួបជុំសមាជិកគ្រួសារជាដើម។
ទីក្រុងប៉េកាំង កំពុងជំរុញផែនការចាក់វ៉ាក់សាំង ដល់ប្រជាជនក្នុងស្រុករបស់ខ្លួន ជាមួយនឹងវ៉ាក់សាំង ផលិតក្នុងស្រុកចំនួន៤ ដែលត្រូវបានអនុម័ត។ ប៉ុន្តែចិននៅមិនទាន់អនុម័តការចាក់វ៉ាក់សាំងផលិតនៅបរទេសនៅឡើយទេ។
ប្រទេសចិន បានបញ្ជូនវ៉ាក់សាំងរបស់ខ្លួនទៅបរទេស ប៉ុន្តែនៅតែទទួលរងការរិះគន់ពីការរីករាលដាលដំបូងនៃជំងឺកូវីដ១៩ ចេញពីទឹកដីរបស់ខ្លួន។
សេចក្តីថ្លែងការណ៍របស់ស្ថានទូតចិនបានឱ្យដឹងថា នេះត្រូវអនុវត្តចំពោះអ្នក ដែលមានវ៉ាក់សាំងពីរដង ឬចាក់មួយដូស តែទាមទារយ៉ាងហោចណាស់រយៈពេល១៤ថ្ងៃមុន ពេលដាក់ពាក្យសុំទិដ្ឋាការ។
ស្ថានទូតចិននៅប្រទេសផ្សេងៗ រួមមាន ឥណ្ឌា ប៉ាគីស្ថាន ហ្វីលីពីន អ៊ីតាលី និងស្រីលង្កាបានចេញសេចក្តីថ្លែងការណ៍ស្រដៀងគ្នានេះ។
អ្នកដំណើរដែលមកដល់ប្រទេសចិន នឹងនៅតែត្រូវដាក់ឱ្យធ្វើចតាឡីស័ក រហូតដល់៣សប្តាហ៍៕
