ដោយៈ សាវុធ
ភ្នំពេញៈ តម្លៃសេវាកម្មដឹកជញ្ជូនផ្លូវទឹក ទៅកាន់ទីផ្សារបរទេស បានហក់ឡើងខ្ពស់ក្នុងរយៈពេល២ខែ ដើមឆ្នាំ២០២១នេះ ដែលបង្កឱ្យការនាំចេញមួយចំនួន ទទួលរងនៅផលប៉ះពាល់ ខណៈការដឹកជញ្ជូនតាមផ្លូវគោកនៅក្នុងស្រុក នៅតែបន្តរក្សាស្ថេរភាពនូវថ្លៃសេវកម្មដឹកជញ្ជូន។
លោកស៊ិន ចន្ធីប្រធានសមាគមភស្តុភារកម្មកម្ពុជា បានថ្លែងប្រាប់ទូរទស្សន៍ក្នុងស្រុកមួយកាលចុងសប្តាហ៍កន្លងមកនេះថា ចាប់ពីដើមឆ្នាំ២០២០មក សេវានៃការដឹកជញ្ជូនតាមផ្លូវគោកបានស្រុតចុះយ៉ាងខ្លាំង ប៉ុន្តែចាប់ពីខែសីហា ឆ្នាំ២០២០ រហូតដល់ខែមករា ឆ្នាំ២០២១ ផ្នែកនេះបានងើបល្អប្រសើរបន្តិចមកវិញ។
លោកបានថ្លែងទៀតថា ចាប់ពីខែកុម្ភៈ ឆ្នាំ២០២១កន្លងមកនេះ សេវាដឹកជញ្ជូនផ្លូវគោកបានបន្តធ្លាក់ចុះមកវិញ គឺដោយសារចំពេលវេលាចូលឆ្នាំចិន ខណៈដែលប្រភេទទំនិញ និងម្ចាស់អាជីវកម្មភាគច្រើនជាជនជាតិចិន បានបន្តឈប់សម្រាក់នៅក្នុងរដូវនេះ” ។
លោកស៊ិន ចន្ឋីបានបន្តថា ចំពោះការដឹកជញ្ជូនតាមផ្លូវគោកនៅក្នុងស្រុក តម្លៃសេវានៃការដឹកជញ្ជូន មិនមានការប្រែប្រួលនោះឡើយ នៅក្នុងរយៈពេលនេះ ហើយការដឹកជញ្ជូនតាមផ្លូវគោក មានសល់កុងតឺន័រជាច្រើន សម្រាប់ផ្គត់ផ្គង់ដល់ការដឹកជញ្ជូន។
លោកបានឱ្យដឹងទៀតថា ស្របពេលដែលសេវាដឹកជញ្ជូនក្នុងស្រុក មានស្ថេរភាពល្អ ការដឹកជញ្ជូនតាមផ្លូវទឹក ចេញទៅក្រៅប្រទេស តម្លៃសេវាដឹកជញ្ជូនបានហក់ឡើងពី ៣ ទៅ៥ដង។ ការឡើងថ្លៃនេះ គឺទៅតាមប្រភេទកុងតឺន័រ ដោយសារប្រភេទកុងតឺន័រសម្រាប់ផ្ទុកតាមត្រូវការដឹកជញ្ជូនមួយចំនួន ដូចជា ខ្នាតកុងតឺន័រខ្នាត២០ហ្វីតជាដើម បច្ចុប្បន្នបានកក់ស្ទុះជាច្រើននៅសហរដ្ឋអាមេរិក ។
របាយការណ៍របស់សហព័ន្ធស្រូវអង្ករកម្ពុជា (CRF) បានបង្ហាញឲ្យដឹងថា រយៈពេល២ខែដំបូង នៃដើមឆ្នាំ២០២១នេះ កម្ពុជាបានសម្រេចនូវការនាំចេញអង្កររបស់ខ្លួន ក្នុងរង្វង់ទឹកប្រាក់ ៦៤.៥៣ លានដុល្លារសហរដ្ឋអាមេរិក ក្នុងបរិមាណ៧៦,២២២ តោន ដែលការនាំចេញក្នុងរយៈពេល២ខែនេះ នៅតែប្រឈមនឹងការថយចុះ ពោលគឺថយចុះ ៤៤.១៦% បើប្រៀបធៀបនឹងរយៈពេលដូចគ្នា នៃឆ្នាំ២០២០ ។
CRF បានឱ្យដឹងទៀតថា “ការថយចុះនេះ បណ្តាលមកពីមូលហេតុចំបងដោយ សារកង្វះកុងតែន័រ និងតម្លៃដឹកជញ្ជូនតាមផ្លូវសមុទ្រនៅបន្តខ្ពស់ រហូតដល់ជិត៥០០% នៃតម្លៃដឹកជញ្ជូនឆ្នាំ ២០១៩” ៕