ដោយៈសុខុម
សេអ៊ូល: ក្រុមហ៊ុន LG Energy Solution និងក្រុមហ៊ុនផលិតរថយន្តអាមេរិក General Motors (GM) កំពុងសិក្សាផែនការសាងសង់រោងចក្រ ផលិតអាគុយថ្មីមួយកន្លែងនៅរដ្ឋថេនណឺស៊ី (Tennessee) សហរដ្ឋអាមេរិក ដើម្បីឆ្លើយតបការកើនឡើងតម្រូវការអាគុយសម្រាប់រថយន្តអគ្គិសនី។ នេះបើយោងតាមសារព័ត៌មាន The Korea Times ចុះផ្សាយកាលពីថ្ងៃទី៥ មីនា។
ទីភ្នាក់ងារព័ត៌មាន Reuters បានដកស្រង់ប្រភពដែលទម្លាយឱ្យដឹង កាលពីថ្ងៃព្រហស្បតិ៍ ទី៤ មីនាកន្លងមកថា បុត្រសម្ព័ន្ធនៃក្រុមហ៊ុនមេ LG Group របស់កូរ៉េខាងត្បូង មួយនេះ និងក្រុមហ៊ុន GM កំពុងសិក្សាផែនការបោះទុនរាប់ពាន់លានដុល្លារ ដើម្បីសាងសង់រោងចក្រផលិតអាគុយទី២ នៅសហរដ្ឋអាមេរិក ខណៈតំណាងមកពីក្រុមហ៊ុនទាំងពីរកំពុងចរចាជាមួយក្រុមមន្ត្រីរដ្ឋនេះ។
ក្រុមហ៊ុន GM ក៏បានបញ្ជាក់ដែរថា ពេលនេះខ្លួនកំពុងសិក្សា ពីលទ្ធភាពសាងសង់រោងចក្រផលិតអាគុយទី២ នៅសហរដ្ឋអាមេរិក ដោយសហការជាមួយក្រុមហ៊ុនLG Energy Solution។ ក្រុមហ៊ុនសម្ព័ន្ធរបស់LGមួយនេះ បានបើកដំណើរការរោងចក្រមួយកន្លែងរួចទៅហើយនៅរដ្ឋមីឈីហ្គែន (Michigan) ហើយក្រុមហ៊ុនទាំងពីរបានចាប់ដៃគូសហការសាងសង់រោងចក្រ ផលិតអាគុយមួយទៀតនៅរដ្ឋអូហាយអូ (Ohio) ដែលនឹងបើកដំណើរការនៅឆ្នាំ២០២២ ។
ប្រភពដដែលបានទម្លាយទៀតថា គម្រោងរោងចក្រថ្មីនេះ អាចនឹងមានទីតាំងនៅក្បែររោងចក្ររបស់ក្រុមហ៊ុន GM ក្នុងទីក្រុង Spring Hill ដែលស្ថិតនៅភាគខាងត្បូងនៃទីក្រុង Nashville។ ហើយទំហំវិនិយោគនេះ គឺប្រហាក់ប្រហែលនឹងទំហំវិនិយោគ លើរោងចក្ររបស់ក្រុមហ៊ុនទាំងពីរនៅរដ្ឋអូហាអូ ដែលមានតម្លៃ២,៣ពាន់លានដុល្លារ។
ក្រុមហ៊ុន GM បានប្រកាសរួចទៅហើយ នូវផែនការដ៏មុតមាំរបស់ខ្លួន ក្នុងការផលិតរថយន្តដំណើរការ ដោយថាមពលអគ្គិសនីទាំងស្រុង ឱ្យបាននៅត្រឹមឆ្នាំ២០៣៥ ដោយឈប់ផលិតម៉ាស៊ីនសាំង និងម៉ាស៊ីនម៉ាស៊ូតតទៅទៀត។
គណៈគ្រប់គ្រងម្នាក់នៅក្រុមហ៊ុន LG Energy Solution បានលើកឡើងថា ពេលនេះ ក្រុមហ៊ុនទាំងពីរកំពុងពិភាក្សាគ្នា អំពីការវិនិយោគបន្ថែម។ ប្រភពដដែលនេះបានបន្ថែមទៀតថា “យើងមិនអាចបញ្ជាក់លម្អិត ដោយគ្មានការយល់ព្រមពីដៃគូសហការរបស់យើងបានឡើយ ប៉ុន្តែអ្វីដែលអាចនិយាយបានពេលនេះគឺថា យើងកំពុងពិភាក្សាជាមួយក្រុមហ៊ុន GM ដើម្បីធ្វើការវិនិយោគបន្ថែមទៀត” ។
ជាការកត់សម្គាល់ ដំណឹងពាក់ព័ន្ធការវិនិយោគរបស់ក្រុមហ៊ុន LG ក្នុងទំហំទឹកប្រាក់រាប់ពាន់លានដុល្លារ នេះកើតមានឡើងក្រោយធ្លាយដំណឹង កាលពីពេលថ្មីៗថា ក្រុមហ៊ុនកូរ៉េខាងត្បូង មួយទៀតគឺក្រុមហ៊ុន Samsung កំពុងសិក្សាទីតាំង ដើម្បីបោះទុនរហូតដល់ទៅ ១៧ពាន់លានដុល្លារ សម្រាប់ការសាងសង់រោងចក្រ ផលិតបន្ទះឈីបថ្មីមួយកន្លែងនៅសហរដ្ឋអាមេរិក៕
