ដោយៈសុខុម
ក្រុងសេអ៊ូល: ក្រុមហ៊ុន Samsung កំពុងសិក្សាទីតាំង២កន្លែង នៅរដ្ឋអារីហ្សូណា និងទីតាំងមួយកន្លែងទៀតនៅញូវយ៉ក ហើយមួយទីតាំងទៀតនៅក្រុងអូស្ទីន (Austin) រដ្ឋតិចសាសន៍ សហរដ្ឋអាមេរិក ដើម្បីសាងសង់រោងចក្រផលិតបន្ទះឈីបថ្មីមួយ ដែលគ្រោងបោះទុនរហូតដល់ទៅ ១៧ពាន់លានដុល្លារ។ នេះបើយោងតាមឯកសារដែលមន្ត្រីរដ្ឋតិចសាសទទួលបាន។
ទីភ្នាក់ងារព័ត៌មាន Reuters បានចុះផ្សាយកាលពីថ្ងៃទី៣ មីនា ថា ឯកសារចុះកាលបរិច្ឆេទថ្ងៃទី ២៦ កុម្ភៈកន្លងមកនេះ ក៏បានប៉ាន់ប្រមាណដែរថា ការបន្ធូរបន្ថយពន្ធពីសង្កាត់ត្រាវីស (Travis County) ក្នុងរដ្ឋតិចសាស សម្រាប់ការសាងសង់រោងចក្រនេះនឹងមានចំនួនប្រហែល១,៤៨ពាន់លានដុល្លារ សម្រាប់រយៈពេល២០ឆ្នាំ ដោយកើនឡើងពីចំនួនដំបូងត្រឹម៨០៥.៥លានដុល្លារ។
ឯកសារដដែលបញ្ជាក់ថា ក្រុមហ៊ុនអេឡិចត្រូនិកខ្នាតយក្សរបស់កូរ៉េខាងត្បូង មួយនេះ កំពុងចរចាជាមួយទីតាំងនៅរដ្ឋអារីហ្សូណា និងញូវយ៉ក ដែលសុទ្ធតែផ្ដល់លក្ខខណ្ឌពិសេសដូចជា ការបន្ធូរបន្ថយពន្ធលើអចលនទ្រព្យ និង “ជំនួយហិរញ្ញវត្ថុ និង / ឬឥណទានពន្ធ” ដើម្បីផ្តល់មូលនិធិដល់ការកែលម្អហេដ្ឋារចនាសម្ព័ន្ធជាដើម។
យោងតាមឯកសារដដែលឱ្យដឹងថា រោងចក្រថ្មីដែលក្រុមហ៊ុន Samsung គ្រោងសាងសង់នេះនឹងផលិតបន្ទះឈីប ហើយនឹងផ្ដល់ឱកាសការងារចំនួន១.៨០០កន្លែង។
ក្រុមហ៊ុន Samsung មានរោងចក្រផលិតបន្ទះឈីបមួយរួចហើយ នៅក្រុងអូស្ទីន ប៉ុន្តែបានបិទទ្វារជាបណ្ដោះអាសន្ន ដោយសារព្យុះកំណាចនារដូវរងា កាលពីខែមុន ហើយតាមការរំពឹងទុកនឹងបើកដំណើរឡើងវិញ នៅប៉ុន្មានសប្ដាហ៍ខាងមុខ។
ក្រុមហ៊ុនធំៗរបស់សហរដ្ឋអាមេរិក ដែលក្លាយជាអតិថិជនទិញបន្ទះឈីបរបស់ក្រុមហ៊ុន Samsung រួមមានដូចជា ក្រុមហ៊ុន Tesla Inc ក្រុមហ៊ុន Qualcomm Inc និងក្រុមហ៊ុន Nvidia ជាដើម។
អ្នកនាំពាក្យក្រុមហ៊ុន Samsung បានប្រាប់ទីភ្នាក់ងារព័ត៌មាន Reuters កាលពីថ្ងៃពុធ ទី៣ មីនា ថា ក្រុមហ៊ុនរបស់កូរ៉េខាងត្បូងមួយនេះ កំពុងពិចារណាលើលទ្ធភាពមួយចំនួនទាក់ទិននឹងការពង្រីកអាជីវកម្ម ប៉ុន្តែមិនបានបញ្ជាក់លម្អិតនោះទេ៕
