ដោយៈ លក្ខិណា
ភ្នំពេញៈ សកម្មភាពអាជីវកម្ម នៅតាមផ្សារនានាក្នុងទីក្រុងភ្នំពេញ បានថយចុះបន្តបន្ទាប់ ក្នុងរយៈពេលប៉ុន្មានថ្ងៃមកនេះ បន្ទាប់ពីកម្ពុជារកឃើញអ្នកឆ្លងកូវីដ១៩ក្នុងសហគមន៍កើនឡើងកាន់តែច្រើន។
ជាការកត់សម្គាល់ ទាំងចរាចរណ៍ និងសកម្មភាពអាជីវកម្មមួយចំនួន ជាពិសេសនៅតំបន់ដែលឆ្លងជំងឺកូវីដ១៩ មានការចុះជាច្រើន ក្នុងផ្សារធំថ្មី ផ្សារបឹងកេងកង និងផ្សារមួយចំនួនទៀតក្នុងកណ្ដាលរាជធានី ពលរដ្ឋចេញចូលផ្សារកាន់តែតិច អាជីវករបើកដំណើរការផ្សារក៏កាន់តែតិចដូចគ្នា។
អាជីវករម្នាក់លក់ដូរសម្លៀកបំពាក់នៅផ្សារធំថ្មី កញ្ញា ប៊ុននី បានឱ្យដឹងកាលពីរសៀលថ្ងៃទី២៦ កុម្ភៈកន្លងមកថា នៅរយៈពេលពីរបីថ្ងៃចុងក្រោយនេះ ប្រជាពលរដ្ឋចូលផ្សារធំថ្មី ទិញទំនិញកាន់តែតិចទៅៗហើយ ជាក់ស្ដែងម្សិលមិញមានតិចតួច ថ្ងៃនេះ(ថ្ងៃទី២៦កុម្ភៈ ) កាន់តែខ្សត់អ្នកមកផ្សារទៅទៀត ដែលជាការព្រួយបារម្ភមួយសម្រាប់ក្រុមអាជីវករបើសិនជាជំងឺកូវី១៩ កាន់តែអូសបន្លាយយូរទៀតនោះ ។
កញ្ញាបន្តថា “ប្រជាពលរដ្ឋពិតជាខ្លាច ក្នុងការមកកាន់តំបន់មានមនុស្សច្រើន ហើយអ្នកលក់មួយចំនួន ក៏បានបិទអាជីវកម្មរបស់ខ្លួនដែរ ដើម្បីបង្កាការឆ្លងរាលដាលនៃជំងឺនេះ” ។ កញ្ញានិយាយថា “កាលពីមុនព្រឹត្តិការណ៍សហគមន៍២០កុម្ភៈ មានប្រជាពលរដ្ឋជាច្រើន មកដើរផ្សារនិងអាជីករ សឹងតែគ្រប់តូបនៅក្នុងផ្សារបើកដំណើរការឡើងវិញ ហើយសកម្មភាពទិញលក់ក៏មានច្រើនដែរ តែនៅពេលមានព្រឹត្តិការណ៍ឆ្លងសហគមន៍ជាថ្មី ធ្វើ ឱ្យអ្វីៗក៏ត្រលប់ទៅជាស្ងាត់វិញ និងប៉ះពាល់ដល់ចំណូលអាជីវករជាច្រើន” ។
ដោយឡែកបើក្រលេកទៅមើលផ្សារផ្សេងទៀតភ្នំពេញ ដូចជាផ្សារបឹងកេងកង ក៏មានការថយ ចុះនូវសកម្មភាព អាជីវកម្មច្រើនផងដែរ ។ បើតាមការបញ្ជាក់ពីអ្នកគ្រប់គ្រងផ្សារនេះថា សកម្មភាពនៅក្នុងផ្សារបានថយចុះ ដល់ពាក់កណ្ដាលឯណោះ ហើយគណកម្មការផ្សារ ក៏បានរៀបចំនូវវិធានការ ទៅតាមការណែនាំរបស់ក្រសួងសុខាភិបាលត្រឹមត្រូវផងដែរ ដូចជាបាញ់អាកល់ និងដាក់ស្កែន QR Code ផងដែរ ។
គិតត្រឹមថ្ងៃទី២៦ កុម្ភៈ២០២១នេះ កម្ពុជារកឃើញអ្នកឆ្លងកូវីដ១៩ ក្នុងសហគមន៍២០កុម្ភៈ ចំនួនជាង២០០នាក់ ខណៈអ្នកឆ្លងសរុប កើនដល់ចំនួនដល់ទៅជាង៧៤០នាក់ទៅហើយ។ ទីតាំងជាច្រើនបាននិងកំពុងបិទអាជីវកម្ម ដើម្បីឱ្យអាជ្ញាធរស្រាវជ្រាវរកអ្នកពាក់ព័ន្ធមកធ្វើតេស្តនិងធ្វើចត្តាឡីស័ក៕
