ដោយៈ ម៉ាណេត
ភ្នំពេញៈ ការដោះដូរពាណិជ្ជកម្មទ្វេភាគីរវាងកម្ពុជា និងថៃសម្រេចបានទំហំទឹកប្រាក់ប្រមាណ៦៥៣លានដុល្លារ នៅក្នុងរយៈពេល១ខែ ឆ្នាំ២០២១ ធ្លាក់ចុះ១០ភាគរយ បើប្រៀបធៀបនឹងរយៈពេលដូចគ្នាឆ្នាំ២០២០ ។ នេះបើយោងតាមរបាយការណ៍របស់ក្រសួងពាណិជ្ជកម្ម ចេញផ្សាយកាលពីម្សិលមិញ។
របាយការណ៍បានឱ្យដឹងថា ការនាំចេញទំនិញរបស់កម្ពុជាទៅថៃ មានទំហំទឹកប្រាក់១១៣លានដុល្លារ ក្នុងខែមករា ឆ្នាំ២០២១ ថយចុះ៤,៨ភាគរយ បើធៀបនឹងខែមករា ឆ្នាំ២០២០ ។
របាយការណ៍បានឱ្យដឹងទៀតថា ការនាំចូលទំនិញថៃរបស់កម្ពុជា មានទំហំទឹកប្រា ក់៥៤០លានដុល្លារ ធ្លាក់ចុះ១១ភាគរយ ខណៈការធ្លាក់ចុះនៃដោះដូរពាណិជ្ជកម្មទ្វេភាគីរវាងប្រទេសទាំងពីរ គឺដោយសាររងផលប៉ះពាល់ ដោយការរីករាលដាលជំងឺកូវីដ១៩ ។
លោក Panyarak Poolthup ឯកអគ្គរដ្ឋទូតថៃប្រចាំនៅប្រទេសកម្ពុជាបាននិយាយកាលពីពេលថ្មីៗនេះថា នៅក្នុងបរិបទវិបត្តិកូវីដ១៩នេះ ពាណិជ្ជកម្មរវាងប្រទេសទាំងពីរត្រូវបានរារាំង ដោយសារការឆ្លងកាត់ព្រំដែនត្រូវបានរឹតបន្តឹង ដែលធ្វើឱ្យមានការលំបាកដល់រំហូរទំនិញរវាងប្រទេសទាំងពីរ។
លោកគូសបញ្ជាក់ថា ប៉ុន្តែសក្តានុពលវិនិយោគរបស់ប្រទេសកម្ពុជា នៅតែមានសម្រាប់វិនិយោគិន និងអាជីវកម្មថៃ។ ទោះបីពិភពលោកកំពុងរងផលប៉ះពាល់ដោយជំងឺកូវិដ១៩ ក្រុមហ៊ុនថៃនៅកម្ពុជា បានបន្តខ្សែសង្វាក់ផលិតកម្មធម្មតា ដោយក្រុមហ៊ុន និងអាជីវកម្មថៃជាច្រើនបាន និងកំពុងស្វែងរកឱកាសវិនិយោគនៅកម្ពុជា។
ស្ថានទូតកម្ពុជាប្រចាំនៅថៃបានឱ្យដឹងថា ខ្លួននឹងបង្កើតការិយាល័យតំណាងក្រុមប្រឹក្សាធុរកិច្ចកម្ពុជានៅទីក្រុងបាងកក ដើម្បីធ្វើជាកន្លែងតែមួយសម្របសម្រួលដល់អាជីវកម្ម និងពាណិជ្ជកម្មរវាងប្រទេសទាំងពីរ៕
