ដោយៈ លក្ខិណា
ភ្នំពេញៈ ចំនួនអ្នកប្រើប្រាស់ការទូទាត់តាមប្រព័ន្ធ QR Code កើនឡើងខ្ពស់ អំឡុងពេលកម្ពុជាជួបប្រទះនឹងការរាត្បាតជាថ្មីនៃជំងឺកូវីដ១៩ ក្នុងសហគមន៍ ខណៈរាជរដ្ឋាភិបាលក៏បានអំពានាវឱ្យពលរដ្ឋចូលរួមទប់ស្កាត់ការឆ្លងកាន់ច្រើន រួមទាងក្នុងការទូទាត់ការចំណាយ ដោយមិនប្រើក្រដាស់ប្រាក់។
លោកស្រីម៉ារ អមរាអនុប្រធាននាយិកាប្រតិបត្តិ ធនាគារអេស៊ីលីដាភីអិលស៊ី បានថ្លែងប្រាប់នៅថ្ងៃទី២៥ ខែកុម្ភៈ ឆ្នាំ២០២១នេះថា កំណើននៃអ្នកប្រើប្រាស់ការទូទាត់តាមរយៈការស្កែន QR Code បានកើនឡើងជាបន្តបន្ទាប់ចាប់តាំងពីធនាគារបានដាក់ឱ្យដំណើរការនៅតាមទីតាំងអាជីវកម្មជាច្រើនរួចហើយ។
លោកស្រីបានថ្លែងថា ក៏ប៉ុន្តែភ្ជាប់ជាមួយនឹងព្រឹត្តិការណ៍ថ្មី២០កុម្ភៈ២០២១នេះ ឃើញថា ទីតាំងកាន់តែច្រើនបានដាក់ការទូទាត់តាមប្រព័ន្ធ QR Code ដើម្បីឱ្យអតិថិជនអាចស្កែន និងទូទាត់ការចំណាយរបស់ខ្លួនតាមរយៈទូរសព្ទដៃវិញ ដែលជាការងាយស្រួល និងសុវត្ថិភាពសម្រាប់អតិថិជន និងម្ចាស់អាជីវកម្ម។
លោកស្រីបន្តថា ការស្កែន QR Code សម្រាប់ការទូទាត់នឹងមិនចាំបាច់ឱ្យអតិថិជនមានប្រាក់ជាប់ខ្លួន ហើយមិនតែប៉ុណ្ណោះអតិថិជនក៏អាចប្រើប្រាស់អេបរបស់អេស៊ីលីដាម៉ូបាលក្នុងការទូទាត់នានាបានផងដែរ ដោយមិនបាច់ធ្វើដំណើរទៅកាន់បញ្ជរធនាគារឬការទូទាត់ផ្ទាល់ឡើយ ដូចជាការបង់ទឹកបង់ភ្លើង ជាដើម ដោយមិនបាច់ធ្វើដំណើរទៅបង់ផ្ទាល់ ។
លោកស្រីបន្ថែមថា កំណើនអ្នកចុះឈ្មោះប្រើប្រាស់អេបអេស៊ីលីដាម៉ូបាលបានកើនឡើងបន្តបន្ទាប់ដែលមកដល់ពេលនេះ មានប្រមាណជិត២លាននាក់ហើយ ខណៈពីមុននេះបន្តិចមានត្រឹមជាង១លាននាក់ប៉ុណ្ណោះ ។ ចំណែកទីតាំងអាជីវកម្មដែលសហការជាមួយនឹងធនាគារអេស៊ីលីដាក្នុងការដាក់ទូទាត់តាមប្រព័ន្ធ QR ក៏ មានច្រើនឡើងៗផងដែរ ។
ក្រៅពីការទូទាត់ តាមប្រព័ន្ធ QR Code បច្ចុប្បន្នក្នុងវិស័យហិរញ្ញវត្ថុ ក៏មានការ ទូទាត់តាមមធ្យោបាយ បច្ចេកវិទ្យាផ្សេងទៀតផងដែរ ដោយមិនប្រើប្រាស់ក្រដាសប្រាក់ដូចជា ម៉ាស៊ីនឆូតកាត (POS) ៕