ដោយៈសុខុម
ហុងកុង: រដ្ឋបាលក្រុងហុងកុង នឹងទម្លាក់កញ្ចប់ថវិកា១២០ពាន់លានដុល្លារកុងកុង (១៥,៤ ពាន់លានដុល្លារអាមេរិក) ដើម្បីជួយដល់អាជីវកម្មនានា និងពលរដ្ឋដែលរងផលប៉ះពាល់ ដោយសាការឆ្លងរាតត្បាតវីរុសកូវីដ-១៩ ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃពុធ ទី២៤ កុម្ភៈ។
អំឡុងសុន្ទរកថាក្នុងថ្ងៃដដែល លោក Paul Chan រដ្ឋមន្ត្រីក្រសួងហិរញ្ញវត្ថុហុងកុង បានថ្លែងថា វិធានការដែលរួមមានការបន្ធូរបន្ថយពន្ធ ការផ្ដល់ប្រាក់កម្ចីសម្រាប់អ្នកគ្មានការងារធ្វើ និងការផ្ដល់ប័ណ្ណ Voucher ផងដែរនេះ ដើម្បីស្ដារសេដ្ឋកិច្ចឡើងវិញ នៅក្នុងឆ្នាំ២០២១ នេះ ក្រោយពីសេដ្ឋកិច្ចដាំក្បាលចុះនៅក្នុងឆ្នាំ២០២០ ។
លោកព្យាករថា សេដ្ឋកិច្ចនឹងទទួលបានកំណើនឡើងវិញ ក្នុងចន្លោះពី៣,៥%ទៅ ៥,៥% នៅឆ្នាំនេះ បើធៀបនឹងការធ្លាក់ចុះសេដ្ឋកិច្ច៦,១% ក្នុងឆ្នាំ២០២០” ។ លោកគូសបញ្ជាក់ថា “ថវិកាសម្រាប់ឆ្នាំ២០២១នេះ មានគោលបំណងកាត់បន្ថយការលំបាក និងសម្ពាធដែលបង្កឡើង ដោយវិបត្តិសេដ្ឋកិច្ច និងការរាតត្បាតវីរុសកូវីដ-១៩ ។
ក្តីសង្ឃឹមចំពោះការងើបឡើង នៃសេដ្ឋកិច្ចរបស់ក្រុងហុងកុង នាពេលនេះគឺដោយសារការចែកចាយវ៉ាក់សាំងកូវីដ-១៩ ។ ការតវ៉ាដែលឈានដល់ការផ្ទុះអំពើហឹង្សាជាញឹកញាប់ និងភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងមហាយក្សចិន ក្នុងឆ្នាំ២០១៩ បានធ្វើឱ្យក្រុងហុងកុង ដែលជាមជ្ឈមណ្ឌលហិរញ្ញវត្ថុពិភពលោក ធ្លាក់ចូលក្នុងវិបត្តិសេដ្ឋកិច្ច តាំងពីមុនពេលផ្ទុះការឆ្លងរាតត្បាតវីរុសកូវីដ-១៩ ទៅទៀត។
ក្រុងហុងកុង ចាប់ផ្តើមចាក់វ៉ាក់សាំងរបស់ខ្លួននៅសប្តាហ៍នេះ ក្រោយទទួលបានវ៉ាក់សាំងកូវីដ-១៩ សរុបចំនួន ២២.៥ លានដូសពីក្រុមហ៊ុនមួយចំនួន ដូចជា ក្រុមហ៊ុនអាមេរិក Pfizer ក្រុមហ៊ុនចិន Sinovac និងក្រុមហ៊ុនអង់គ្លេស-ស្វ៊ីស AstraZeneca។
ពលរដ្ឋដែលគ្មានការងារធ្វើ អាចទទួលបានប្រាក់កម្ចី ៨០,០០០ ដុល្លារហុងកុង (១០.៣០០ ដុល្លារអាមេរិក) នៅក្នុងកម្មវិធីមួយដែលពន្យា រពេលការទូទាត់សងសម្រាប់ឆ្នាំដំបូង និងគិតការប្រាក់ ១% ។ វិធានការនេះធ្វើឡើងបន្ទាប់ពីទីក្រុងហុងកុង កាលពីសប្តាហ៍មុន បានរាយការណ៍អំពីអត្រាគ្មានការងារធ្វើ៧% ចន្លោះពីខែវិច្ឆិកា ឆ្នាំ២០២០ ដល់ខែមករា ឆ្នាំ២០២១ ដែលជាកម្រិតខ្ពស់បំផុតចាប់តាំងពីខែមេសា ឆ្នាំ២០០៤ មក។
ប័ណ្ណ Voucher ដែលមានតម្លៃ ៥,០០០ ដុល្លារហុងកុង (៦៤៥ ដុល្លារអាមេរិក) ក៏នឹងត្រូវបោះផ្សាយសម្រាប់ពលរដ្ឋ ដែលមានតម្រូវការផងដែរ ដោយអ្នកទទួលបានប័ណ្ណ Voucher នេះអាចសងរំលស់វិញតិចៗតាមក្រោយ។ ទន្ទឹមនេះ អាជីវកម្ម និងបុគ្គលក៏នឹងទទួលបានការបន្ធូរបន្ថយពន្ធផងដែរ។
លោក Paul Chan បានប្រាប់ក្រុមអ្នកតាក់តែងច្បាប់ថា លោករំពឹងថា ឱនភាពថវិកា២៥៧,៦ ពាន់លានដុល្លារហុងកុង (ជាង៣៣ពាន់លានដុល្លារអាមេរិក) ដែលជាកម្រិតខ្ពស់បំផុតមិនធ្លាប់មាន ក្នុងឆ្នាំសារពើពន្ធ ២០២០-២០២១ នឹងធ្លាក់ចុះមកនៅត្រឹម ១០១,៦ពាន់លានដុល្លារហុងកុង (ជាង ១៣ ពាន់លានដុល្លារអាមេរិក) ក្នុងឆ្នាំសារពើពន្ធ ២០២១-២០២២ ៕