ដោយៈ សុខុម
ក្រុងឡុងដ៍ៈ ធនាគារដ៏ធំ HSBC របស់អង់គ្លេស និងធំជាងគេបំផុតនៅអឺរ៉ុបបានបង្ហាញសញ្ញាគួរឱ្យចាប់អារម្មណ៍ថា ខ្លួនកំពុងតែដើរតាម “យុទ្ធសាស្ត្រងាកមករកតំបន់អាស៊ី” (Pivot to Asia) របស់លោកបារ៉ាក់ អូបាម៉ាអតីតប្រធានាធិបតីសហរដ្ឋអាមេរិក តាមរយៈការទម្លាយផែនការបោះទុនវិនិយោគ ប្រមាណ៦ពាន់ដុល្លារអាមេរិក នៅក្នុងតំបន់នេះ។ នេះបើយោងតាមសារព័ត៌មាន BBC ចុះផ្សាយកាលពីថ្ងៃទី២៣ កុម្ភៈ។
ពេលនេះ ធនាគារវិនិយោគពហុជាតិសាសន៍របស់អង់គ្លេស ដែលជាធនាគារធំបំផុតនៅអឺរ៉ុបមួយនេះ កំពុងតែប្ដូរយុទ្ធសាស្ត្រថ្មី ដោយងាកមកផ្ដោតលើការគ្រប់គ្រងទ្រព្យ និងសេវាធនាគារពាណិជ្ជដើម្បីជំរុញ “កំណើនពីរខ្ទង់” ហើយបានជ្រើសរើសទីផ្សារអាស៊ី ដូចជាប្រទេសសិង្ហបុរី ប្រទេសចិន និងក្រុងហុងកុងជាដើម។
ការប្ដូរយុទ្ធសាស្ត្រនេះធ្វើឡើង ខណៈធនាគារHSBC បានរាយការណ៍ថា ប្រាក់ចំណេញរបស់ខ្លួន បានធ្លាក់ចុះរហូតដល់៣៤% ក្នុងឆ្នាំ២០២០ ដោយសារការឆ្លងរាតត្បាតវីរុសកូវីដ-១៩។ ធនាគារនេះ រកចំណូលបានមួយចំនួនរួចទៅហើយពីតំបន់អាស៊ី។
អំឡុងពេលប្រកាសលទ្ធផលរបស់ខ្លួន ធានាគារនេះនិយាយថា ខ្លួននឹងបន្តបែងចែកភាគលាភ (ចំណែកប្រាក់ចំណេញ) របស់ខ្លួន០,១៥ដុល្លារក្នុងមួយភាគហ៊ុន ហើយការបែងចែកភាគលាភនេះ គឺជាលើកដំបូងហើយចាប់តាំងពីខែតុលា ឆ្នាំ២០១៩ មក។
ប្រាក់ចំណូលមុនពេលកាត់ពន្ធរបស់ធនាគារ HSBC បានធ្លាក់ចុះពី១៣,៣៥ពាន់លានដុល្លារក្នុងឆ្នាំ២០១៩ មកនៅត្រឹម៨,៨ពាន់លានដុល្លារ គិតត្រឹមថ្ងៃទី៣១ ខែធ្នូឆ្នាំមុន។ ទោះជាយ៉ាងណា ការធ្លាក់ចុះនេះគឺស្រាលជាងការរំពឹងទុក។
លោក Noel Quinn នាយកប្រតិបត្តិធនាគារ HSBC បានចេញសេចក្ដីថ្លែងការណ៍ថា ធនាគារនេះ “ទទួលបានលទ្ធផលហិរញ្ញវត្ថុរឹងមាំ ក្នុងបរិបទឆ្លងរាតត្បាតវីរុសកូវីដ-១៩ ជាពិសេសនៅអាស៊ី” ដែល “ជួយក្រាលគ្រឹះដ៏រឹងមាំ សម្រាប់កំណើនរបស់យើងនាពេលអនាគត”។
ធនាគារដែលមាន១៥០ សាខានៅសហរដ្ឋអាមេរិកនេះ នឹងនៅតែអនុវត្តតាមផែនការកាត់បន្ថយចំណាយ តាមរយៈការកាត់បន្ថយបុគ្គលិក ប្រមាណ៣៥.០០០នាក់ ដើម្បីឆ្លើយតបទៅនឹងការឆ្លងរាតត្បាតវីរុសកូវីដ១៩៕
