ដោយៈសុខុម
កូឡាឡាំពួរ: ក្រសួងឧស្សាហកម្ម និងផលិតផលចម្ការ (MPIC) នៃប្រទេសម៉ាឡេស៊ី ជឿជាក់យ៉ាងមុតមាំថា ការនាំចេញឈើ និងផលិតផលឈើរបស់ម៉ាឡេស៊ី អាចឈានដល់ទំហំ២៣ពាន់លានរីងហ្គីត (៥,៧ ពាន់លានដុល្លារអាមេរិក) នៅឆ្នាំ២០២១ នេះ បន្ទាប់ពីវ៉ាក់សាំងកូវីដ-១៩មកដល់។ នេះបើយោងតាមសារព័ត៌មាន The Edge Markets ចុះផ្សាយកាលពីថ្ងៃទី២១ កុម្ភៈ។
ក្រសួងឧស្សាហកម្ម និងផលិតផលចម្ការ ទទួលបន្ទុកខាងចម្ការ និងទំនិញចម្ការរួមមានដូចជាដូងប្រេង ជ័រកៅស៊ូ ឈើ គ្រឿងសង្ហារិម កាកាវ ម្រេច និងថ្នាំជក់ជាដើម។
រដ្ឋមន្ត្រីក្រសួងនេះគឺលោក Mohd Khairuddin Aman Razali បានលើកឡើងថា ក្រសួងរបស់លោក នឹងខិតខំប្រឹងប្រែងធ្វើយ៉ាងណាធានាថា ឧស្សាហកម្មដែលផ្អែកលើឈើក្នុងស្រុកនេះ នឹងនៅតែរក្សាបានការប្រកួតប្រជែង ទាំងលើទីផ្សារក្នុងស្រុក និងទីផ្សារអន្តរជាតិ។
ទន្ទឹមនឹងនេះដែរ លោកបានជំរុញឱ្យក្រសួងរបស់លោក ជួយពិនិត្យដានឧស្សាហកម្មនេះជាប្រចាំ គឺធ្វើយ៉ាងណាធានាថា វាគោរពតាមគោលការណ៍ប្រតិបត្តិស្តង់ដារ (SOP) ដែលរដ្ឋាភិបាលបានកំណត់។
លោកបានចេញសេចក្ដីថ្លែងការណ៍ក្នុងថ្ងៃដដែលនេះថា “ក្រសួងជឿជាក់យ៉ាងមុតមាំថា លទ្ធផលនៃការនាំចេញអាចទទួលបានទំហំ២៣ ពាន់លានរីងហ្គីត ក្នុងឆ្នាំ២០២១ ជាពិសេសដោយសារមានវ៉ាក់សាំង ដែលនឹងជួយកាត់បន្ថយការឆ្លងវីរុសកូវីដ-១។ ការងើបឡើងវិញនៃសេដ្ឋកិច្ច ក្នុងបណ្ដាប្រទេសនាំចូលឈើធំៗ ដូចជា សហរដ្ឋអាមេរិក និងចិន ជាដើម ព្រមទាំងការកើនឡើងនូវតម្រូវការពីប្រទេសផ្សេងៗទៀត នឹងជំរុញឱ្យឧស្សាហកម្មឈើ នៅតែមានលទ្ធផលវិជ្ជមានពេញមួយឆ្នាំ២០២១” ។
រដ្ឋមន្ត្រីរូបនេះបានអះអាងថា ការនាំចេញផលិតផលផ្អែកលើឈើសម្រាប់ឆ្នាំ២០២០ គឺទទួលបានសមិទ្ធផលល្អប្រសើរ បើទោះបីជាការឆ្លងរាតត្បាតវីរុសកូវីដ-១៩ មិនទាន់បានបញ្ចប់នៅឡើយក្ដី។
លោកបានគូសបញ្ជាក់ថា ការនាំចេញឈើ និងផលិតផលឈើមានទំហំ ២២,០២ ពាន់លានរីងហ្គីត ក្នុងឆ្នាំ២០២០ បើធៀបនឹងទំហណ ២២,៥ ពាន់លានរីងហ្គីត ក្នុងឆ្នាំ២០១៩ ពោលគឺធ្លាក់ចុះតែ ២,០% ប៉ុណ្ណោះ។
ក្នុងចំណោមការនាំចេញឈើ និងផលិតផលឈើទាំងអស់ គ្រឿងសង្ហារិមឈើនៅតែជាផលិតផលដ៏ចម្បង ដោយទទួលបានកំណើននាំចេញ១៦% ដល់ ១០,៦ ពាន់លានរីងហ្គីត (២,៦២ ពាន់លានដុល្លារអាមេរិក) បើធៀបនឹង ៩ ពាន់លានរីងហ្គីត (២,២៣ ពាន់លានដុល្លារអាមេរិក) ក្នុងឆ្នាំ២០១៩ ៕
