ដោយៈសុខុម
អាមេរិកៈ ក្រុមហ៊ុន SpaceX របស់កំពូលមហាសេដ្ឋីលំដាប់ពិភពលោក Elon Musk ប្រមូល មូលនិធិជុំចុងក្រោយបាន ៨៥០លានដុល្លារអាមេរិក បន្ថែមទៀត ដោយធ្វើឱ្យតម្លៃរបស់ក្រុមហ៊ុននេះ កើនឡើងរហូតដល់ប្រមាណ ៧៤ពាន់លានដុល្លារកាលពីសប្ដាហ៍មុន។
ដោយដកស្រង់ប្រភពស្និទ្ធនឹងមូលនិធិនេះ សារព័ត៌មាន CNBC ចុះផ្សាយកាលកាលពីថ្ងៃអង្គារទី១៦ កុម្ភៈកន្លងមកថា ក្រុមហ៊ុន SpaceX បានដំឡើងថ្លៃមូលនិធិនេះដល់ ៤១៩,៩៩ដុល្លារក្នុងមួយភាគហ៊ុន ហើយទំហំមូលនិធិប្រមូលបានជុំចុងក្រោយនេះ ស្មើនឹងការកើនឡើងតម្លៃរបស់ក្រុមហ៊ុនប្រហែល ៦០% ពីតម្លៃមុននេះដែលមានត្រឹមប្រមាណ ៤៦ពាន់លានដុល្លារ។
ទោះជាយ៉ាងណា ភ្លាមៗក្រុមហ៊ុនរបស់សហរដ្ឋអាមេរិក មួយនេះមិនបានឆ្លើយតបការសុំឆ្លើយបំភ្លឺពីទីភ្នាក់ងារព័ត៌មាន Reuters នោះទេ។
យោងតាមទិន្នន័យរបស់ក្រុមហ៊ុន PitchBook បង្ហាញថា ក្រុមហ៊ុននេះប្រមូលមូលនិធិបានចំនួន ១,៩ ពាន់លានដុល្លារកាលពីខែសីហា ដែលជាជុំប្រមូលមូលនិធិបានច្រើនបំផុតរបស់ខ្លួន។
រ៉ុក្កែតម៉ូតគំរូ Starship SN9 របស់ក្រុមហ៊ុននេះ បានផ្ទុះឆេះកាលពីដើមខែនេះអំឡុងពេញបាញ់បង្ហោះសាកល្បង បន្ទាប់ពីធ្លាក់មកដល់ដីវិញ។ រ៉ុក្កែត Starship SN9 គឺម៉ូឌែលសាកល្បង សម្រាប់ឈានទៅដល់ការផលិតរ៉ុក្កែតយក្ស ដែលក្រុមហ៊ុនកំពុងអភិវឌ្ឍន៍ សម្រាប់ដឹកមនុស្ស និងទំនិញទម្ងន់ ១០០តោន ទៅកាន់ភពព្រះច័ន្ទ និងភពផ្កាយអង្គារ ក្នុងបេសកកម្មក្នុងថ្ងៃអនាគត។
SpaceX ដែលមកពីពាក្យពេញថា Space Exploration Technologies Corp. គឺជាក្រុមហ៊ុនផលិតយានអវកាស និងផ្ដល់សេវាដឹកជញ្ជូន ទៅកាន់អវកាសដែលមានមូលដ្ឋាននៅរដ្ឋកាលីហ្វ័រញ៉ា សហរដ្ឋអាមេរិក។
លោក Elon Musk បានបង្កើតក្រុមហ៊ុននេះឡើងក្នុងឆ្នាំ២០០២ ជាមួយគោលបំណងកាត់បន្ថយថ្លៃដឹកជញ្ជូនទៅកាន់អវកាស ដើម្បីឈានទៅដល់ការកាន់កាប់ភពផ្កាយព្រះអង្គារនៅថ្ងៃណាមួយ។
កាលពីដើមខែកុម្ភៈនេះ ក្រុមហ៊ុនផលិតរថយន្តអគ្គិសនី Tesla របស់លោក Elon Musk បានទម្លាយឱ្យដឹងថា ខ្លួនបានទិញរូបិយប័ណ្ណអេឡិចត្រូនិក Bitcoin ចំនួន ១,៥ ពាន់លានដុល្លារ ហើយខ្លួនគ្រោងនឹងទទួលយករូបិយប័ណ្ណអេឡិចត្រូនិកនេះ ជាទម្រង់មួយនៃការទូទាត់ថ្លៃរថយន្តរបស់ខ្លួន៕