ដោយៈសុខុម
សិង្ហបុរី: កម្មវិធីកញ្ចប់ថវិកាគាំទ្រ SGUnited Jobs and Skills Package របស់សិង្ហបុរី នឹងទទួលបានថវិកាបន្ថែមចំនួន ,៤ ពាន់លានដុល្លារសិង្ហបុរី (៤,០៧ ពាន់លានដុល្លារអាមេរិក) ដើម្បីជួយផ្ដល់ការងារដល់ពលរដ្ឋ ចំនួន២០០.០០០នាក់នៅឆ្នាំនេះ ដែលជាក្រុមជនរងគ្រោះដោយសារជំងឺកូវីដ១៩ ។
ថវិកានេះ ក៏ប្រើប្រាស់ដើម្បីផ្តល់ឱកាសហាត់ការ ព្រមទាំងការបណ្តុះបណ្តាលជំនាញដល់ពលរដ្ឋចំនួន ៣៥.០០០នាក់។ នេះបើយោងតាមលោកឧបនាយករដ្ឋមន្ត្រី Heng Swee Keat បានប្រកាសកាលពីថ្ងៃអង្គារទី១៦ ខែកុម្ភៈ។
យោងតាមសារព័ត៌មាន CNA ចុះផ្សាយក្នុងថ្ងៃដដែលឱ្យដឹងថា កម្មវិធីកញ្ចប់ថវិកាគាំទ្រ SGUnited ត្រូវបានបង្កើតឡើងកាលពីខែឧសភា ឆ្នាំ២០២០ ដើម្បីជួយផ្ដល់ឱកាសការងារចំនួន ១០០.០០០ កន្លែងដល់ពលរដ្ឋសិង្ហបុរី ដែលរងផលប៉ះពាល់ដោយសារការឆ្លងរាតត្បាតវីរុសកូវីដ-១៩ ។
លោកឧបនាយករដ្ឋមន្ត្រី Heng Swee Keat និងជារដ្ឋមន្ត្រីក្រសួងហិរញ្ញវត្ថុបានគូសបញ្ជាក់ថា ពលរដ្ឋដែលត្រូវបានទទួលយកឱ្យចូលបម្រើការងារ ចូលហាត់ការ និងទទួលការបណ្ដុះបណ្ដាលជំនាញ មានចំនួនសរុបជិត ៧៦.០០០ នាក់គិតត្រឹមដំណាច់ខែធ្នូ។
ស្របពេលក្រុមហ៊ុន និងឧស្សាហកម្មនានា កំពុងមានការផ្លាស់ប្ដូរឆ្ពោះទៅរកកំនើនយ៉ាងឆាប់រហ័ស ប្រជាជននឹងត្រូវការចំណេះដឹង និងជំនាញថ្មី។
លោកលើកឡើងបន្ថែមទៀតថា “ចំនួនថវិកាថ្មីនេះ ដែលបន្ថែមពីលើកញ្ចប់ថវិកាគាំទ្រចំនួន៣ពាន់លានដុល្លារសិង្ហបុរី (២,២៦ ពាន់លានដុល្លារអាមេរិក) ដែលឱ្យផ្ដល់កាលពីឆ្នៃមុន នឹងជួយផ្ដល់ការងារថ្មីៗដល់ពលរដ្ឋជាច្រើន” ។
មួយភាគធំនៃថវិកាបន្ថែមនេះ ពោលគឺចំនួន៥,២ពាន់លានដុល្លារសិង្ហបុរី (៣,៩២ ពាន់លានដុល្លារ) នឹងទុកសម្រាប់ការពង្រីកគម្រោង Jobs Growth Incentive (JGI) (គ្រឿងលើកទឹកចិត្តសម្រាប់កំណើនការងារ) រយៈពេល៧ខែ។
បច្ចុប្បន្ន ស្ថិតក្រោមគម្រោង JGI បណ្ដាក្រុមហ៊ុនដែលជួលបុគ្គលិកក្នុងស្រុក ចាប់ពីខែកញ្ញា ឆ្នាំមុនដល់ខែកុម្ភៈ ឆ្នាំនេះនឹងទទួលបានការឧបត្ថម្ភធន២៥% នៃបៀវត្សរ៍មិនទាន់ហូតពន្ធ (Gross salary) ៥.០០០ដុល្លារសិង្ហបុរី (៣.៦៧៧ ដុល្លារអាមេរិក) សម្រាប់ប្រាក់ខែដំបូងរបស់ពួកគេ។
លោកឧបនាយករដ្ឋមន្ត្រីថ្លែងថា ដោយពេលនេះគម្រោងនេះ នឹងបន្តរហូតដល់ដំណាច់ខែកញ្ញា ឆ្នាំ២០២១ ក្រុមហ៊ុននានានឹងទទួលបានការឧបត្ថម្ភធន លើប្រាក់បៀវត្សរ៍ចំនួន១២ខែ ។
លោកបានបន្ថែមថា “ក្រុមហ៊ុនដែលជួលបុគ្គលិកចាស់ៗជនពិការ និងអ្នកធ្លាប់ជាប់ទោស នឹងទទួលបានការឧបត្ថម្ភធន លើប្រាក់បៀវត្សរ៍រហូតដល់ ១៨ ខែ” ៕