ដោយ ណែត
ភ្នំពេញ ៖ រដ្ឋបាលរាជធានីភ្នំពេញ បាននិងកំពុងជំរុញការដោះស្រាយផលប៉ះពាល់ចំពោះការស្ថាបនាអាងប្រព្រឹត្តកម្មទឹកស្អាតនៅប៉ែកខាងត្បូងរាជធានីភ្នំពេញ និងផលប៉ះពាល់ពីគម្រោងស្ថាបនាហេដ្ឋារចនាសម្ព័ន្ធ នានានៅប៉ែកខាងត្បូងដើម្បីសម្រួលដល់ការវិនិយោគរបស់វិនិយោគិនក្នុងនិងក្រៅប្រទេស ។
យោងតាមសេចក្តីប្រកាសព័ត៌មានរបស់សាលារាជធានីភ្នំពេញ បានឱ្យដឹងថាស្ថានីយប្រព្រឹត្តកម្មទឹកកខ្វក់នៅភាគខាងត្បូងភ្នំពេញដែលជាគម្រោងរបស់ទីភ្នាក់ងារ JICA របស់ជប៉ុនគ្រោងនឹងចាប់ផ្ដើមស្ថាបនាឡើងនៅខែមេសាឆ្នាំ ២០២១ខាងមុខនេះ ក្រោយពេលផលប៉ះពាល់ត្រូវបានដោះស្រាយបញ្ចប់អស់ជាមួយពលរដ្ឋនៅក្នុងតំបន់នោះ ។
បើតាមលោកឃួង ស្រេង អភិបាលរាជធានីភ្នំពេញបានឱ្យដឹងថា តំបន់អភិវឌ្ឍន៍ខាងត្បូងរាជធានីភ្នំពេញ ត្រូវបានរដ្ឋាភិបាលកាត់ដីប្រមាណ ១៩០ហិចតាដើម្បីប្រគល់ជូនវិស័យឯកជនធ្វើការអភិវឌ្ឍ ហើយនៅសេសសល់ រាជរដ្ឋាភិបាលទុកសម្រាប់អភិវឌ្ឍន៍ជាអាងប្រព្រឹត្តកម្មទឹកស្អាត និងសម្រាប់សាងសង់ហេដ្ឋារចនាសម្ព័ន្ធ នានា ដើម្បីសម្រួលដល់ការវិនិយោគរបស់វិនិយោគិន និងតភ្ជាប់ពីតំបន់នោះមកកាន់កណ្ដាលរាជធានីភ្នំពេញ ។
អ្នកជំនាញនៃវិស័យអចលវត្ថុជាច្រើនបានសម្លឹងមើលឃើញថាតំបន់ភាគខាងត្បូងរាជធានីភ្នំពេញ កំពុងត្រូវប៉ាន់ក្នុងការវិនិយោគនិងអភិវឌ្ឍន៍ ដោយមានគម្រោងធំៗមួយចំនួនកំពុងអភិវឌ្ឍន៍ដូចជាគម្រោងផ្សារទំនើបធំជាងគេនៅកម្ពុជា អ៊ីអនម៉ល៣ គម្រោងអភិវឌ្ឍន៍ព្រលានអន្តរជាតិធំលំដាប់ទី៤នៅលើពិភពលោកក៏កំពុងសាងសង់ និងគម្រោងបុរីលំនៅឋានច្រើនទៀតក៏បាននិងកំពុងអភិវឌ្ឍន៍នៅតំបន់នេះដែរ ។
ប្រធានសមាគមអ្នកវាយតម្លៃនិងភ្នាក់ងារអចលវត្ថុកម្ពុជាលោកច្រឹក សុខនីមបានលើកឡើងថាតំបន់ណាដែលមានការអភិវឌ្ឍហេដ្ឋារចនាសម្ព័ន្ធនឹងអាចទាក់ទាញវិនិយោគិនទៅបណ្ដាក់ទុនវិនិយោគនៅទីនោះបាន ដូច្នេះហើយទើបរាជរដ្ឋាភិបាលបានបណ្ដាក់ទុនវិនិយោគលើហេដ្ឋារចនាសម្ព័ន្ធជាច្រើនដើម្បីសម្រួលដល់ការវិនិយោគនានា ៕