ដោយៈសុខុម
តូក្យូ: សេដ្ឋកិច្ចរបស់ជប៉ុន ដែលរងផលប៉ះពាល់ដោយសារការឆ្លងរាតត្បាតវីរុសកូវីដ-១៩បានធ្លាក់ចុះក្នុងឆ្នាំ២០២០ ជាលើកដំបូងក្នុងរយៈពេលជាងមួយទសវត្សរ៍មកនេះ ប៉ុន្តែការធ្លាក់ចុះនេះ គឺស្រាលជាងការព្យាករ ដោយសារការកើនឡើងនូវការនាំចេញ និងការជួយគាំទ្រយ៉ាងសម្បើមពីរដ្ឋាភិបាល។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី១៥ កុម្ភៈ។
ទោះជាយ៉ាងណា ក្រុមអ្នកវិភាគបានព្រមានថា កុំទាន់អាលទាន់មានសុទិដ្ឋិនិយម នឹងលទ្ធផលនេះពេកអី ខណៈការរឹតបន្តឹងថ្មីៗ ដើម្បីទប់ស្កាត់ការឆ្លងរាតត្បាតវីរុសកូវីដ-១៩ នឹងធ្វើឱ្យតម្រូវការប្រើប្រាស់ក្នុងស្រុកធ្លាក់ចុះ ដោយព្រំដែននៅតែបិទមិនឱ្យភ្ញៀវទេសចរចូលនៅឡើយ។
សេដ្ឋកិច្ចធំបំផុតទី៣ របស់ពិភពលោកមួយនេះបានធ្លាក់ចុះ ៤,៨% ក្នុងឆ្នាំ២០២០ ហើយនេះ ជាការធ្លាក់ចុះប្រចាំឆ្នាំលើកដំបូងរបស់ខ្លួន ចាប់តាំងពីឆ្នាំ២០០៩ ដែលកាលនោះវិបត្តិហិរញ្ញវត្ថុពិភពលោកកំពុងកើតឡើងពេញទំហឹង។
ទោះជាយ៉ាងណា តួលេខនេះប្រសើរជាងការព្យាកររបស់ក្រុមអ្នកវិភាគ ដែលត្រូវបានសារព័ត៌មាន Bloomberg ធ្វើការស្ទង់មតិដោយសារនៅក្នុងត្រីមាសទី៤ ចុងឆ្នាំ២០២០ សេដ្ឋកិច្ចទទួលបានកំណើន១២,៧% ធៀបនឹងត្រីមាសទី៣ ។
វិធានការរបស់រដ្ឋាភិបាល នៅក្នុងការទម្លាក់កញ្ចប់ថវិកាប្រមាណ៣ទ្រីលានដុល្លារអាមេរិក ចាប់តាំងពីការឆ្លងរាតត្បាតវីរុសកូវីដ-១៩ បានចាប់ផ្ដើមផ្ដល់ជំនួយគាំទ្រយ៉ាងសម្បើមដើម្បីស្ដារសេដ្ឋកិច្ចឡើងវិញ។
ដំណឹងនេះ បានជួយជំរុញឱ្យសន្ទស្សន៍ផ្សារភាគហ៊ុន Nikkei 225 Index របស់ជប៉ុន ក់ឡើងជិត២% ដល់៣០.០០០ពិន្ទុ ជាលើកដំបូងក្នុងរយៈពេលជាង៣ទសវត្សរ៍មកនេះ។
មិនខុសពីប្រទេសនានា ក្នុងពិភពលោកនោះឡើយ ប្រទេសជប៉ុនត្រូវបានទាញទម្លាក់ឱ្យចូលក្នុងអតិផរណាយ៉ាងជ្រៅនៅដើមឆ្នាំ២០២០ ខណៈវិធានការទប់ស្កាត់ការឆ្លងរាតត្បាតវីរុសកូវីដ-១៩ បានធ្វើសកម្មភាពសេដ្ឋកិច្ចស្ទើរតែជាប់គាំងទាំងស្រុង៕
