ដោយៈសុខុម
ប្រទេសចិនៈ បណ្ដាវិនិយោគិនចិន បានលៃទុកថវិការហូតដល់ទៅជាង២ទ្រីលានដុល្លារអាមេរិក សម្រាប់ការវិនិយោគ និងសំណង់នៅបរទេស ក្នុងរយៈពេលមួយទសវត្សរ៍កន្លងមកនេះ។ នេះបើយោងតាមសារព័ត៌មាន The Sean Post ចុះផ្សាយកាលពីថ្ងៃទី១២ កុម្ភៈ។
យោងតាម Juwai IQI ដែលជាក្រុមហ៊ុនទិញលក់អចលនទ្រព្យអន្តរជាតិ និងជាក្រុមហ៊ុនប្រព័ន្ធផ្សព្វផ្សាយឱ្យដឹងថា ទិន្នន័យបានពីប្រភពឧស្សាហកម្ម និងរដ្ឋាភិបាលបានបង្ហាញថា ចាប់តាំងពីឆ្នាំ២០១៥ ដល់ឆ្នាំ២០២០ ក្រុមហ៊ុនទិញលក់អចលនទ្រព្យចិន បានទិញយក អចលនទ្រព្យប្រភេទលំនៅដ្ឋាននៅបរទេស គិតជាទឹកប្រាក់សរុបជាង ២០២,៨ពាន់លានដុល្លារអាមេរិក។
យោងតាមទិន្នន័យរបស់សហរដ្ឋអាមេរិកបង្ហាញថា ពីឆ្នាំ២០០៥ ដល់ឆ្នាំ២០២០ ការវិនិយោគលើអចលនទ្រព្យ ពាណិជ្ជកម្មឆ្លងដែនរបស់ចិន មានទំហំសរុបមិនតិចជាង ១០៤,៨ ពាន់លានដុល្លារអាមេរិកឡើយ។
ឥណទានសាងសង់ និងកិច្ចសន្យាសាងសង់អចលនទ្រព្យ បែបពាណិជ្ជកម្មត្រូវបានបែងចែកជាប្រភេទដាច់ដោយឡែកពីគ្នា។ ទិន្នន័យដដែលបង្ហាញថា ការចំណាយលើការសាងសង់អចលនទ្រព្យ បែបពាណិជ្ជកម្មមានទំហំសរុប ៨៧,៣ ពាន់លានដុល្លារអាមេរិក គិតពីឆ្នាំ២០០៥ ដល់ឆ្នាំ២០២០ ។
ដូច្នេះការវិនិយោគរបស់ចិន លើអចលនទ្រព្យផ្នែកលំនៅដ្ឋាន ការវិនិយោគលើអចលនទ្រព្យពាណិញ្ជកម្ម និងការសាងសង់អចលនទ្រព្យពាណិជ្ជកម្ម នៅបរទេសពីឆ្នាំ២០០៥ ដល់ឆ្នាំ២០២០ មានទំហំសរុបមិនតិចជាង ៣៩៣,៩ ពាន់លានដុល្លារអាមេរិក ឡើយ។ ដោយសារសមត្ថភាពមិនពេញលេញ នៅក្នុងការតាមដានរាល់ការវិនិយោគ ទំហំវិនិយោគសរុប ជាក់ស្ដែងប្រហែលជាខ្ពស់ជាងនេះឆ្ងាយ។
ប្រទេសចិន គឺជាប្រភពធំបំផុតនៃអ្នកវិនិយោគអចលនទ្រព្យ ផ្នែកលំនៅដ្ឋានឆ្លងដែនក្នុងពិភពលោក។ បណ្ដាវិនិយោគិនចិន បានធ្វើឱ្យទីផ្សារ និងគំរូអភិវឌ្ឍន៍អចលនទ្រព្យផ្លាស់ប្ដូរនៅគ្រប់ទ្វីបទាំងអស់។
ទោះជាយ៉ាងណា ការវិនិយោគលើអចលនទ្រព្យ ផ្នែកលំនៅដ្ឋានឆ្លងដែនរបស់ចិន បានធ្លាក់ចុះខ្លាំងក្នុងឆ្នាំ២០២០ ដោយសារការឆ្លងរាតត្បាតវីរុសកូវីដ-១៩ ប៉ុន្តែមិនធ្ងន់ធ្ងរដូចមជ្ឈដ្ឋានមួយចំនួនធំព្រួយបារម្ភឡើយ។ ការវិនិយោគគួរតែងើបឡើងវិញខ្លាំង ខណៈការឆ្លងរាតត្បាតថមថយ ហើយសេដ្ឋកិច្ចរបស់ចិន កំពុងបន្តងើបឡើងពីការធ្លាក់ចុះនៅដើមឆ្នាំ២០២០ ។
ការទិញអចលនទ្រព្យផ្នែកលំនៅដ្ឋានរបស់ចិន បានធ្លាក់ចុះខ្លាំងក្នុងឆមាសទី១ ដើមឆ្នាំ២០២០ នៅពេលគម្រោងទិញជាច្រើនត្រូវបានលុបចោល ឬពន្យារពេលដោយសារស្ថានភាពមិនប្រាកដប្រជា បង្កឡើងដោយការឆ្លងរាតត្បាតវីរុសកូវីដ-១៩ ។
អ្វីដែលគួរឱ្យភ្ញាក់ផ្អើល ការវិនិយោគសរុបបានងើបឡើងឆាប់រហ័ស ជាងការរំពឹងទុកដោយសារកត្តាចំនួន២ ។ កត្តាទី១ គឺដោយសារអតិថិជន មានសុទិដ្ឋិនិយមខ្លាំងជាងមុន នៅពេលសេដ្ឋកិច្ចរបស់ចិនបានងើបឡើងវិញ ហើយពលរដ្ឋស៊ាំនឹងស្ថានភាពឆ្លងរាតត្បាតវីរុសកូវីដ-១៩ ។ កត្តាទី២ ការឆ្លើយតបឆាប់រហ័ស នៅក្នុងឧស្សាហកម្មអចលនទ្រព្យចំពោះបម្រាមធ្វើដំណើរ។
ក្រុមហ៊ុននានា ដូចជា ក្រុមហ៊ុន Juwai IQI ជាដើមបានប្រើប្រាស់បច្ចេកវិទ្យា ដែលធ្វើឱ្យអ្នកទិញអាចស្រាវជ្រាវ ពិនិត្យផ្ទៀងផ្ទាត់ចរចា ទិញ និងគ្រប់គ្រងអចលនទ្រព្យនៅបរទេសតាមអនឡាញទាំងស្រុង៕