ដោយៈ ម៉ាណេត
ភ្នំពេញៈ ទំហំពាណិជ្ជកម្មទ្វេភាគីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី (EAEU) ក្នុងឆ្នាំ២០២០ សម្រេចបានទំហំទឹកប្រាក់ជាង ៦៧,៣៧លានដុល្លារ កើនឡើងជាង ១៨ភាគរយ បើធៀបនឹងឆ្នាំ២០១៩ ដែលមានទំហំទឹកប្រាក់ ៥៦,៩៨លានដុល្លារ។ នេះបើតាមរបាយការណ៍ចុងក្រោយរបស់ក្រសួងពាណិជ្ជកម្ម។
ទិន្នន័យបានបង្ហាញថា ការនាំចេញពីកម្ពុជា ទៅទីផ្សារ EAEU មានទំហំទឹកប្រាក់៥២,១៩លានដុល្លារ កើន ០,៧៣ភាគរយ បើធៀបនឹងឆ្នាំ២០១៩ ដែលមានទំហំទឹកប្រាក់ ៥១,៨១លានដុល្លារ ខណៈការចូលទំនិញរបស់ EAEU មកកាន់កម្ពុជាមានតម្លៃ១៥,១៨លានដុល្លារ កើនឡើង ១៩៣,៥៧ភាគរយ។
ជាមួយគ្នានេះដែរ ការសិក្សាមួយបានបង្ហាញថា កិច្ចព្រមព្រៀងពាណិជ្ជកម្មសេរីកម្ពុជា-សហភាពសេដ្ឋកិច្ចអឺរ៉ុប-អាស៊ី បង្ហាញពីកាលានុវត្តភាព ឈ្នះ-ឈ្នះសម្រាប់កម្ពុជា បន្ទាប់ពីបានចំណាយពេលសិក្សាស្រាវជ្រាវ អស់រយៈពេលជាយូរមកនោះ។
ការសិក្សាបានបង្ហាញថា កិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី នឹងនាំឱ្យមានការរីកចម្រើនក្នុងវិស័យផលិតកម្ម ពង្រីកសេវាកម្ម និងការអភិវឌ្ឍសេវាកម្មថ្មីៗបន្ថែមទៀត។
លោកប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ធ្លាប់បានលើកឡើងថា តាមរយៈការបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី នឹងអាចឱ្យភាគីទាំងពីរ បង្កើនកិច្ចសហប្រតិបត្តិការសេដ្ឋកិច្ច-ពាណិជ្ជកម្មលើទំនិញ សេវា និងវិនិយោគ។
លោកបន្តថា “កិច្ចព្រមព្រៀងពាណិជ្ជកម្មសេរីរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី មានផលវិជ្ជមានមកលើសេដ្ឋកិច្ចកម្ពុជា និងអនុញ្ញាតឱ្យកម្ពុជាទាញយកផលប្រយោជន៍បន្ថែម តាមរយៈការចូលរួមនៅក្នុងខ្សែចង្វាក់ផលិតកម្មតំបន់ និងពិភពលោក” ។
EAEU គឺជាសហព័ន្ធសេដ្ឋកិច្ចមួយ ដែលតំណាងឱ្យប្លុកប្រទេសចំនួន៥ មានដូចជារុស្ស៊ី អាមេនី បេឡារុស កាហ្សាក់ស្ថាន និងកៀហ្ស៊ីស៊ីស្ថាន ហើយប្លុកនេះមានប្រជាជនសរុបជាង ១៨៤លាននាក់ គិតត្រឹមឆ្នាំ២០២០ និងមានផលិតផលក្នុងស្រុក GDP សរុបរួមគ្នាជាង ៤,៧ទ្រីលានដុល្លារ៕
