ដោយ: សុខុម
សាន ហ្វ្រានស៊ីស្កូ៖ កាលពីថ្ងៃព្រហស្បតិ៍ ទី១១ កុម្ភៈ ក្រុមហ៊ុនផលិតបន្ទះឈីបមួយក្រុមរបស់សហរដ្ឋអាមេរិក បានដាក់ញត្តិមួយច្បាប់ជូនប្រធានាធិបតីលោក ចូ បៃឌិន ដើម្បីជំរុញឱ្យលោកផ្ដល់ “ជំនួយមូលនិធិជាគ្រឿងលើកទឹកចិត្ត សម្រាប់ការផលិតបន្ទះឈីប” ដែលជាផ្នែកមួយនៃផែនការស្ដារសេដ្ឋកិច្ច និងហេដ្ឋារចនាសម្ព័ន្ធរបស់លោក។
យោងតាមការចុះផ្សាយរបស់សារព័ត៌មាន CNA ឱ្យដឹងថា នាយកប្រតិបត្តិនៃក្រុមហ៊ុនផលិតបន្ទះឈីបធំៗរបស់សហរដ្ឋអាមេរិក ដូចជាក្រុមហ៊ុន Intel ក្រុមហ៊ុន Qualcomm ក្រុមហ៊ុន Micron Technology និងក្រុមហ៊ុន Advanced Micro Devices ជាដើមបានចុះហត្ថលេខាលើញត្តិនេះ។
ញត្តិនេះធ្វើឡើង ខណៈកង្វះខាតបន្ទះឈីបទូទាំងពិភពលោកបានធ្វើឱ្យខ្សែសង្វាក់រោងចក្រនៅក្រុមហ៊ុន Ford Motor និងក្រុម General Motors រាំងស្ទះដំណើរការ ហើយនាយកប្រតិបត្តិនៃក្រុមហ៊ុនផលិតរថយន្តទាំង២ ខាងលើបានព្យាករថានឹងបាត់បង់ប្រាក់ចំណេញរាប់ពាន់លានដុល្លារ។
ការផ្គត់ផ្គង់បន្ទះឈីបមានកម្រិត បានធ្វើឱ្យអតិថិជនពិបាកយ៉ាងខ្លាំង នៅក្នុងការទិញបន្ទះឈីបហ្គេមដ៏ពេញនិយមដូចជា Xbox របស់ក្រុមហ៊ុន Microsoft និង Playstation របស់ក្រុមហ៊ុន Sony ជាដើម។
បន្ទះឈីបទាំងនេះភាគច្រើនផលិតនៅក្នុងប្រទេសនានាដូចជាកូរ៉េខាងត្បូង និងកោះតៃវ៉ាន់ ជាដើម។ ញត្តិផ្ញើជូនសមាគមឧស្សាហកម្មបន្ទះឈីប (Semiconductor Industry Association) បានគូសបញ្ជាក់ថា ចំណែកទីផ្សារផលិតបន្ទះឈីប របស់សសហរដ្ឋអាមេរិក បានធ្លាក់ចុះយ៉ាងខ្លាំងពី៣៧% ក្នុងឆ្នាំ១៩៩០ មកនៅត្រឹម១២% គិតត្រឹមថ្ងៃព្រហស្បតិ៍ ទី១១ ខែកុម្ភៈ។
ក្រុមនេះបានឱ្យដឹងថា “កត្តានេះ ភាគច្រើនដោយសាររដ្ឋាភិបាល នៃបណ្ដាក្រុមហ៊ុនប្រកួតប្រជែងទូទាំងពិភពលោក ផ្ដល់គ្រឿងលើកទឹកចិត្ត និងការឧបត្ថម្ភធនច្រើន ដើម្បីទាក់ទាញរោងចក្រផលិតបន្ទះឈីបថ្មីៗ ខណៈសហរដ្ឋអាមេរិក អត់មាន” ។
កាលពីឆ្នាំមុន សភាអាមេរិក បានអនុញ្ញាតឱ្យផ្ដល់ការឧបត្ថម្ភធន សម្រាប់ការផលិត និងការស្រាវជ្រាវបន្ទះឈីប ប៉ុន្តែក្រុមសមាជិកសភានៅតែត្រូវសម្រេចថា តើជំនួយមូលនិធិប៉ុន្មាន ដែលត្រូវផ្ដល់ឱ្យ។ ក្រុមនេះបានជំរុញឱ្យលោក ចូ បៃឌិន ផ្ដល់ជំនួយមូលនិធិក្នុងទម្រង់ជាហិរញ្ញប្បទានឥតសំណង(Grant) ឬឥណទានពន្ធ (Tax credit)។
ក្រុមនេះបានគូសបញ្ជាក់ថា “ដោយធ្វើការជាមួយសភា រដ្ឋការរបស់លោកនៅពេលនេះមានឱកាសជាប្រវត្តិសាស្ត្រនៅក្នុងការផ្ដល់ជំនួយមូលនិធិដល់គំនិតផ្ដួចផ្ដើមទាំងនេះ ដើម្បីឱ្យវាក្លាយជាការពិត។ យើងជឿថា ត្រូវមានវិធានការច្បាស់លាស់ដើម្បីដោះស្រាយបញ្ហាប្រឈមរបស់ពួកយើង។ ការមិនចាត់វិធានការនឹងបង្កការខាតបង់ខ្ពស់ណាស់” ៕
