ដោយ សុខុម
បាងកក៖ ការវិនិយោគរបស់បរទេស (Foreign Investment) នៅប្រទេសថៃ បានដាំក្បាលចុះរហូតដល់ទៅ ៥៤% មកនៅត្រឹម ២១៣ ពាន់លានបាត (ប្រមាណ ៧,១២ ពាន់លានដុល្លារអាមេរិក) ក្នុងឆ្នាំ២០២០ ដោយសារក្រុមហ៊ុននានាបានរងផលប៉ះពាល់ធ្ងន់ធ្ងរពីការឆ្លងរាតត្បាតវីរុសកូវីដ-១៩ ។ នេះបើយោងការចុះផ្សាយរបស់កាសែត Bangkok Post ។
ក្រុមប្រឹក្សាវិនិយោគ (Board of Investment) របស់ថៃ បានបញ្ជាក់តាមរយៈសេចក្ដីថ្លែងការណ៍កាលពីថ្ងៃពុធ ទី១០ កុម្ភៈ ថា ប្រទេសជប៉ុន នៅតែជាអ្នកវិនិយោគធំបំផុតរបស់ប្រទេសថៃ ជាមួយនឹងទុនវិនិយោគ ៧៦ ពាន់លានបាត (២,៥៤ ពាន់លានដុល្លារអាមេរិក) ហើយចំណាត់ថ្នាក់លេខ២ គឺប្រទេសចិន ជាមួយនឹងទុនវិនិយោគ ៣១ ពាន់លានបាត (១,០៤ ពាន់លានដុល្លារអាមេរិក) ចំណែកឯចំណាត់ថ្នាក់លេខ៣ គឺសហរដ្ឋអាមេរិក ជាមួយនឹងទុនវិនិយោគ ២៥ ពាន់លានបាត (៨៤០ លានដុល្លារអាមេរិក)។
ក្រុមប្រឹក្សានេះលើកឡើងថា កាលពីឆ្នាំមុន ទាំងការវិនិយោគរបស់បរទេស និងការវិនិយោគក្នុងស្រុក ជាពិសេសលើវិស័យគ្រឿងអេឡិចត្រូនិក កសិកម្ម និងកែច្នៃចំណីអាហារបានធ្លាក់ចុះ ៣០% ធៀបនឹងឆ្នាំ២០១៩ មកនៅត្រឹម ៤៨១ ពាន់លានបាត (១៦,០៨ ពាន់លានដុល្លារ)។ ប៉ុន្តែទន្ទឹមនេះ វិស័យសុខាភិបាលបែរជាទទួលបានបានកំណើនរហូតដល់ទៅ ១៦៥% ។
លោកស្រី Duangjai Asawachintachit ប្រធានក្រុមប្រឹក្សាវិនិយោគបានថ្លែងប្រាប់សារព័ត៌មានថា “ការផ្ទុះវីរុសកូវីដ-១៩ បានបង្កផលប៉ះពាល់ ហើយក៏នាំមកនូវឱកាសផងដែរ” ។ លោកស្រីលើកឡើងថា ក្រុមប្រឹក្សាវិនិយោគមិនទាន់កំណត់គោលដៅសម្រាប់ការវិនិយោគក្នុងឆ្នាំនេះទេ ខណៈស្ថានភាពកូវីដ-១៩ និងសេដ្ឋកិច្ចពិភពលោកស្ថិតក្នុងស្ថានភាពមិនប្រាកដប្រជាខ្លាំងនៅឡើយ។
លោកស្រីបានបន្ថែមថា ក្រុមប្រឹក្សាវិនិយោគបានបន្តផ្ដល់គ្រឿងលើកទឹកចិត្តផ្សេងៗជាច្រើនដើម្បីជំរុញការចុះបញ្ជីក្រុមហ៊ុននានា។
ប្រទេសថៃ មិនទាន់បានដកចេញវិញទាំងស្រុងនោះទេចំពោះវិធានការរឹតបន្តឹងដែលខ្លួនបានដាក់កាលពីខែមេសា ឆ្នាំមុនលើការអនុញ្ញាតឱ្យភ្ញៀវទេសចរចេញចូលដើម្បីកាត់បន្ថយការឆ្លងវីរុសកូវីដ-១៩ ដោយខ្លួនទទួលយកតែភ្ញៀវមួយចំនួនដែលមានទិដ្ឋាកាស្នាក់នៅរយៈពេលយូរប៉ុណ្ណោះ។
ទោះជាយ៉ាងណាក្ដី ប្រទេសថៃ បានទប់ចំនួនអ្នកឆ្លងវីរុសកូវីដ-១៩ ឱ្យនៅទាបដោយជោគជ័យ ដោយគិតមកទល់ពេលនេះមានករណីឆ្លងតែ ២៣.៩០៣ ករណី និងស្លាប់ ៨០ ករណីប៉ុណ្ណោះ៕
