ដោយៈសុខុម
តៃប៉ិ / សេអ៊ូល: បណ្ដាក្រុមហ៊ុនផលិតបន្ទះឈីបអាស៊ី កំពុងតែសម្រុកផលិតបន្ទះឈីប ដើម្បីបំពេញតម្រូវការរបស់របស់ពិភពលោក ដែលកំពុងខ្វះខាតខ្លាំង ជាពិសេសបណ្ដាក្រុមហ៊ុនផលិតរថយន្ត។ ទោះជាយ៉ាងណា ក្រុមហ៊ុនផលិតបន្ទះឈីបទាំងនោះព្រមានថា ទម្រាំតែអាចបំពេញការផ្គត់ផ្គង់ឱ្យទាន់សភាពការណ៍ គឺត្រូវការពេលវេលាជាច្រើនខែ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី៨ កុម្ភៈ។
ក្រុមហ៊ុនផលិតរថយន្តជាច្រើន រួមមានក្រុមហ៊ុន General Motors ក្រុមហ៊ុន Stellantis រហូតដល់ក្រុមហ៊ុន Honda Motor កំពុងបិទខ្សែសង្វាក់ដំឡើងរថយន្តរបស់ខ្លួនជាបណ្ដោះអាសន្ន ដោយសារការខ្វះខាតបន្ទះឈីប ដែលក្នុងករណីខ្លះមានភាពកាន់តែធ្ងន់ធ្ងរ ដោយសារអតីតប្រធានាធិបតីសហរដ្ឋអាមេរិក ដូណាល់ ត្រាំ ដាក់ទណ្ឌកម្មលើបណ្ដារោងចក្រផលិតបន្ទះឈីបចិន។ ក្រុមហ៊ុនខ្លះថែមទាំងបានជម្រុះបុគ្គលិកចោលទៀតផង។
រោងចក្រផលិតបន្ទះឈីប ដែលភាគច្រើនគ្រប់គ្រង ដោយក្រុមហ៊ុននៅតំបន់អាស៊ី រួមមានក្រុមហ៊ុនតៃវ៉ាន់ Taiwan Semiconductor Manufacturing Co Ltd (TSMC) និងក្រុមហ៊ុនកូរ៉េខាងត្បូង SK Hynix ផងនោះកំពុងជួបការលំបាកខ្លាំង ដោយសារខ្វះការវិនិយោគ ក្នុងរយៈពេលប៉ុន្មានឆ្នាំចុងក្រោយនេះ។ ភាគច្រើននៃរោងចក្របែបនេះធ្លាប់តែ ផលិតបន្ទះឈីបរថយន្ត។
តម្រូវការបន្ទះឈីបនៅក្នុងប្រទេសចិន ជាពិសេសសម្រាប់ផលិតរថយន្តបានងើបឡើងវិញពីវិបត្តិកូវីដ-១៩ យ៉ាងឆាប់រហ័សនឹកស្មានមិនដល់ ហើយការបញ្ជាទិញ សម្រាប់ផលិតផលអេឡិចត្រូនិក ដូចជា កុំព្យូទ័រយួដៃ (Laptop) និងទូរស័ព្ទដៃជាដើម នៅក្នុងតំបន់ ដែលកំពុងជួបការលំបាកនៅឡើយ ដោយសារការរឹតបន្តឹង ដើម្បីទប់ការឆ្លងរាតត្បាតវីរុសកូវីដ-១៩ ដូចជាអឺរ៉ុប និងសហរដ្ឋអាមេរិកជាដើមនោះក៏បានកើនឡើងផងដែរ។
លោក Zhao Haijun នាយកប្រតិបត្តិ នៃក្រុមហ៊ុនផលិតបន្ទះឈីបធំបំផុតរបស់ចិន Semiconductor Manufacturing International Corp (SMIC) ដែលកាលពីស ប្ដាហ៍មុន បានប្រកាសផែនការបង្កើន សមត្ថភាពផលិតបន្ទះឈីបនៅឆ្នាំនេះនិយាយថា “យើងកំពុងរងសម្ពាធខ្លាំងនៅពេលនេះ” ដែលនេះដោយសារការសម្រុកផលិត ដើម្បីឱ្យទាន់តម្រូវការ។
ទោះជាយ៉ាងណា ក្រុមហ៊ុននេះបានព្រមានថា ការបង្កើនសមត្ថភាពផលិតនឹងមិនអាចធ្វើបានភ្លាមៗឡើយ ដោយសារសង្វាក់ផ្គត់ផ្គង់រអាក់រអួល ព្រោះតែទណ្ឌកម្មដាក់ដោយអតីតប្រធានាធិបតី ដូណាល់ ត្រាំ។
TSMC ដែលជាក្រុមហ៊ុនផលិតបន្ទះឈីប ធំបំផុតរបស់ពិភពលោកនិយាយថា ខ្លួនកំពុងតែ “ពន្លឿន” ការផលិតនូវផលិតផលទាក់ទិននឹងរថយន្ត ហើយពេលនេះគ្រោងបង្កើនការចំណាយលើផលិតកម្ម និងការអភិវឌ្ឍបន្ទះឈីបជឿនលឿនចន្លោះពី ២៥ ពាន់លានដុល្លារអាមេរិក ទៅ២៨ពាន់លានដុល្លារអាមេរិកនៅឆ្នាំនេះ ពោលគឺខ្ពស់ជាង ៦០% បើធៀបនឹងចំនួន ដែលខ្លួនបានចំណាយក្នុងឆ្នាំ២០២០ ។
ក្រុមហ៊ុនផលិតបន្ទះឈីបតៃវ៉ាន់ មួយទៀតUnited Microelectronics Corp (UMC) គ្រោងចំណាយ១,៥ពាន់លានដុល្លារ លើឧបករណ៍ផលិតបន្ទះឈីបថ្មី គឺកើនឡើង៥០% បើធៀបនឹង១ពាន់លានដុល្លារអាមេរិក ដែលខ្លួនបានចំណាយកាលពីឆ្នាំមុន។
SK Hynix ដែលជាក្រុមហ៊ុនផលិតបន្ទះឈីបម៉េម៉ូរី (Memory) ធំបំផុតទី២របស់ពិភពលោកនិយាយថា ខ្លួននឹងពន្លឿនផែនការរើរោងចក្រផលិតបន្ទះឈីប រថយន្តរបស់ខ្លួនទៅប្រទេសចិន ដែលអាចកាត់បន្ថយថ្លៃដើមបានច្រើន។ ក្រុមហ៊ុននេះចង់រើរោងចក្ររបស់ខ្លួនទៅចិន ឱ្យបានឆាប់តាមដែលអាចធ្វើទៅបាន។
ក្រុមហ៊ុនផលិតបន្ទះឈីបជប៉ុន Renesas Electronics Corp បាននិយាយកាលពីថ្ងៃច័ន្ទ ទី៨ កុម្ភៈថា ខ្លួនកំពុងចរចា ដើម្បីទិញយកក្រុមហ៊ុនបន្ទះឈីបអង់គ្លេស-អាល្លឺម៉ង់ Dialog Semiconductor ក្នុងតម្លៃ៦ពាន់លានដុល្លារអាមេរិក ខណៈក្រុមហ៊ុនផលិតបន្ទះឈីបជប៉ុនមួយនេះ កំពុងសម្លឹងចាប់ឱកាសពង្រីកអាជីវកម្ម ក្នុងពេលតម្រូវការបន្ទះឈីបផលិតរថយន្តកំពុងតែកើនឡើង៕