ដោយៈ ម៉ាណេត
ភ្នំពេញៈ ការកើនឡើងនៃការវិនិយោគរបស់ជប៉ុននៅកម្ពុជា ជំរុញវិនិយោគបរទេសដទៃទៀតឱ្យមានទំនុកចិត្ត ក្នុងការមកបណ្តាក់ទុននៅកម្ពុជា វិនិយោគិនលើពិភពលោកទទួលស្គាល់ហើយថា នៅពេលវិនិយោគិនជប៉ុនវិនិយោគ ក្នុងប្រទេសណាមួយ នោះជាសញ្ញាល្អ ក្នុងការទាក់ទាញវិនិយោគិនបរទេសដទៃទៀត។
លោកហុង វណ្ណៈអ្នកស្រាវជ្រាវសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា បានថ្លែងប្រាប់កាលចុងសប្តាហ៍កន្លងមកនេះ វិនិយោគិនជប៉ុន ជាមធម្មតា ទាមទារនៅលក្ខខណ្ឌចំនួនមួយ ក្នុងទី១ គឺតម្លាភាព និងទី២គឺភាពច្បាសលាស់លើច្បាប់វិនិយោគផ្សេង។
លោកបានថ្លែងទៀតថា “ទាំងនេះគឺអ្វីដែលវិនិយោគិនជប៉ុនចង់បាន ហើយបើសិនជាកម្ពុជាធ្វើបាន ទៅលើចំណុចទាំងនេះ យើងសង្ឃឹមថា ការវិនិយោគរបស់ជប៉ុន នឹងមានការកើនឡើងបន្ថែមនៅកម្ពុជា និងការកាន់ប្រសើរឡើង លើទំនាក់ទំនងពាណិជ្ជកម្មរវាងប្រទេសទាំងពីរ” ។
លោកបណ្ឌិតហុង វណ្ណៈបានបន្តទៀតថា ជាពិសេស ច្បាប់វិនិយោគថ្មី ដែលគ្រោងចេញនៅខែមេសា ខាងមុខនេះ និងអមជាមួយនឹងតុលាការពាណិជ្ជកម្ម ត្រូវជំរុញឱ្យមានដំណើរការរលូន ដើម្បីឆ្លើយតបនឹងតម្រូវការរបស់វិនិយោគបរទេស ជាពិសេសភាគីជប៉ុន ដែលជាដៃគូល្អជាមួយកម្ពុជា។
លោកបានឱ្យដឹងទៀតថា នៅពេលវិនិយោគិនជប៉ុនកើនឡើងនៅកម្ពុជា វាអាចបង្កើតជាអត្តសញ្ញាណមួយល្អ សម្រាប់វិនិយោគបរទេសដទៃទៀត មានទំនុកចិត្ត ក្នុងការមកបណ្តាក់ទុននៅកម្ពុជា ព្រោះប្រជាជនលើពិភពលោក គេទទួលស្គាល់ហើយថា នៅពេលវិនិយោគិនជប៉ុន វិនិយោគក្នុងប្រទេសណាមួយ នោះជាសញ្ញាណមួយ ក្នុងការទាក់ទាញវិនិយោគិនបរទេសដទៃទៀត។
រដ្ឋមន្ត្រីក្រសួងពាណិជ្ជកម្ម លោកប៉ាន សូរស័ក្តិបានថ្លែងកាលដើមខែនេះថា ទំនាក់ទំនងការទូតរវាងកម្ពុជា និងប្រទេសជប៉ុនកើតឡើងតាំងពីឆ្នាំ ១៩៥៣មកម្ល៉េះ រហូតមកដល់ឆ្នាំ២០១៣កន្លងទៅ កម្ពុជា និងជប៉ុនបានក្លាយជាដៃគូយុទ្ធសាស្ត្រ និងកិច្ចសហប្រតិបត្តិការស៊ីជម្រៅជាមួយគ្នា។
លោកថ្លែងបន្តថា “ជប៉ុនបានជួយជ្រោមជ្រែងអភិវឌ្ឍន៍ប្រទេសកម្ពុជា តាមរយៈការស្តាឡើងវិញ នូវហេដ្ឋារចនាសម្ព័ន្ធរូបវន្ត បណ្តុះបណ្តាលធនធានមនុស្ស ពង្រីកទំនាក់ទំនងសេដ្ឋកិច្ច ពាណិជ្ជកម្ម ជំរុញវិស័យទេសចរណ៍ និងវិនិយោគជាដើម” ។
លោកប៉ាន សូរស័ក្តិបានបន្តថា ក្នុងក្របខណ្ឌកិច្ចសហប្រតិបត្តិការ លើវិស័យសេដ្ឋកិច្ច រវាងអាស៊ាន និង ជប៉ុន ជប៉ុន បានរៀបចំគម្រោងអភិវឌ្ឍសេដ្ឋកិច្ចចំនួន៨៧គម្រោង ក្នុងនោះ៥៨គម្រោង សម្រាប់ជួយដល់ប្រទេសកម្ពុជា ឡាវ ភូមា និងវៀតណាម លើវិស័យកសិកម្ម ទេសចរណ៍ ការអភិវឌ្ឍន៍សហគ្រាសធុនតូច និងមធ្យម ធានាគុណភាពទំនិញ ជំរុញវិនិយោគ កសាងបរិយាកាស អាជីវកម្ម បរិស្ថាន កសាងសមត្ថភាពមន្ត្រីរាជការ ដើម្បីកាត់បន្ថយគម្លាតនៃការអភិវឌ្ឍរបស់ប្រទេសក្រីក្រ។
វិនិយោគិនជប៉ុន បានបោះទុនវិនិយោគជាង ២៧៩២លានដុល្លារ នៅកម្ពុជាក្នុងរយៈពេល២៧ឆ្នាំចុងក្រោយ គិតចាប់ឆ្នាំ១៩៩៣ ដល់ឆ្នាំ២០២០ ដោយបានចូលរួមចំណែកយ៉ាង ក្នុងការបង្កើតការងារជាច្រើនកន្លែង ដល់ប្រជាពលរដ្ឋក្នុងស្រុក និងជំរុញកំណើនសេដ្ឋកិច្ចកម្ពុជា៕
