ដោយៈលក្ខិណា
ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់រកបានចំណូលពីការផ្ដល់សេវាផ្សេងៗបាននជិត ១២០លានដុល្លារអាមេរិក តែបើធៀបនឹងឆ្នាំ២០១៩ តួលេខនេះបានធ្លាក់ចុះប្រមាណ ២,៤១ភាគរយ គិតទាំងពន្ធប្រថាប់ត្រាលើការផ្ទេរអចលនទ្រព្យ។ នេះ បើយោងតាមរបាយការណ៍របស់ក្រសួង។
ក្នុងរបាយការណ៍ដដែលបានបង្ហាញថា ចំណូលរបស់រដ្ឋបាលកណ្ដាល មានចំនួន ជាង ២៥ពាន់លានរៀល ក្នុងនោះសេវាសំណង់ទូទៅ មានចំនួន ១៣ពាន់លានរៀល សេវាសំណង់លើសសន្ទស្សន៍ចំនួន ១១ពាន់លានរៀល។ ចំណូលពីការជួលមានចំនួន២៨៣លានរៀលផងដែរ ។
សម្រាប់ចំណូលរបស់មន្ទីររៀបចំដែនដី នគរូបនីយកម្ម និងសំណង់រាជធានី ខេត្តទទួលបានចំនួន ៤៥៤ពាន់លានរៀល ក្នុងនោះសេវាសុរិយោដី មានចំនួន ៥៩ពាន់លានរៀល សេវាសំណង់ទូទៅមានចំនួន៣៣ពាន់លានរៀល និងពន្ធប្រថាប់ត្រា មានចំនួន ៣៦១ពាន់លានរៀលផងដែរ ។
មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុលោកវង្សី វិស្សុត បានមានប្រសាសន៍ថា ក្នុងឆ្នាំ២០២០កន្លងទៅ វិស័យសំណង់ និងអចលនទ្រព្យ បានដើរតួនាទីសំខាន់ និងបានជួយសេដ្ឋកិច្ច មិនមានការធ្លាក់ចុះខ្លាំង ទៅតាមការព្យាករណ៍កាលពីដើមឆ្នាំ។
លោកបន្តថា “កាលពីដើមឆ្នាំសេដ្ឋកិច្ចកម្ពុជា ត្រូវបានព្យាករណ៍ថានឹងធ្លាក់ចុះដល់ទៅដកជាង៥ភាគរយ តែនៅភាពជាក់ស្ដែងសេដ្ឋកិច្ចកម្ពុជាធ្លាក់ចុះ តែដកជាង២ភាគរយប៉ុណ្ណោះ ហើយការធ្លាក់យឺតនេះ ក៏ជាចំណែកមួយនៃវិស័យសំណង់ និងអចលនទ្រព្យផងដែរ” ។
លោកច្រឹកសុខនីមប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា ក៏បានប្រសាសន៍ថា ទោះស្ថិតនៅក្នុងវិបត្តិកូវីដ១៩ក្ដី ដោយកម្ពុជាទទួលបានគម្រោងវិនិយោគជាបន្តបន្ទាប់ នៅក្នុងវិស័យសំណង់និងអចលនទ្រព្យ ព្រមទាំងមានការទិញលក់ជាហូរហែផងដែរ៕
