ដោយៈ ម៉ាណេត
ភ្នំពេញៈ ក្រុមហ៊ុន Prime Road Alternative បានប្រកាសបោះទុនវិនិយោគជាង៣៧លានដុល្លារ ដើម្បីសាងសង់ស្ថានីយផលិតអគ្គិសនី ដើរដោយពន្លឺព្រះអាទិត្យ អានុភាព ៦០មេហ្កាវ៉ាត់ ក្នុងខេត្តកំពង់ឆ្នាំង។
យោងតាមសេចក្តីប្រកាសព័ត៌មាន របស់ក្រុមប្រឹក្សាអភិវឌ្ឍន៍កម្ពុជាបានឱ្យដឹង បានឱ្យដឹងថា គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា នៅល្ងាចថ្ងៃ៥ ខែកុម្ភៈ ឆ្នាំ២០២១ បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ Prime Road Alternative (CAMBODIA) CO., LTD។
ក្រុមហ៊ុន Prime Road Alternative នឹងសាងសង់គម្រោងស្ថានីយផលិតអគ្គិសនីដើរដោយពន្លឺព្រះអាទិត្យ អានុភាព ៦០មេហ្កាវ៉ាត់ ដែលមានទីតាំងវិនិយោគស្ថិតនៅភូមិព្រៃជ្រៅ ឃុំក្បាលទឹក ស្រុកទឹកផុស ខេត្តកំពង់ឆ្នាំង មានទុនវិនិយោគ ៣៧,៤លានដុល្លារអាមេរិក និងអាចបង្កើតការងារបានចំនួន ១២កន្លែង។
ក្រុមហ៊ុន Prime Road Power Public Co ដែលជាប្រតិបត្តិករថាមពលកកើតឡើងវិញរបស់ប្រទេសថៃ បានបង្កើតក្រុមហ៊ុនបុត្រសម្ព័ន្ធថ្មីមួយនេះ ដើម្បីគាំទ្រដល់ការពង្រីកការវិនិយោគនៅបរទេស រួមទាំងប្រទេសកម្ពុជា។
កាលពីខែកញ្ញា ឆ្នាំ ២០១៩ Prime Road Alternative ទទួលបានសិទ្ធិសាងសង់ចំពោះគម្រោងបន្ទះសូឡា៦០មេហ្គាវ៉ាត់ នៅក្នុងការដេញថ្លៃមួយ ដែលធ្វើឡើងដោយអគ្គិសនីកម្ពុជា ដោយបញ្ចប់ជាមួយនឹងការដេញថ្លៃទាបបំផុតរបស់ Prime Road Alternative ចំនួន៣,៨៧៧សេនដុល្លារក្នុង ១គីឡូវ៉ាត់ម៉ោង។ នេះបើយោងតាមធនាគារអភិវឌ្ឍន៍អាស៊ី (ADB)។
គម្រោងថាមពលអគ្គិសនី ៦០មេហ្គាវ៉ាត់ គឺជាផ្នែក១ នៃគម្រោងបន្ទះសូឡាជាតិ១០០មេហ្គាវ៉ាត់ នៅក្នុងខេត្តកំពង់ឆ្នាំង ដែលត្រូវបានរៀបចំរចនាសម្ព័ន្ធ ជាដៃគូសាធារណៈ និងឯកជន៕