ដោយៈសាវុធ
ភ្នំពេញៈ មនុស្សគ្រប់រូបតែងចង់មានទ្រព្យសម្បត្តិច្រើន។ មនុស្សខិតខំធ្វើការរាល់ថ្ងៃ ហើយតែងគិតថា ថ្ងៃណាមួយខ្លួននឹងក្លាយជាអ្នកមាន។ តើមនុស្សគ្រប់គ្នាសុទ្ធតែអាចក្លាយជាអ្នកមានមែនទេ?។
លោកប្រាអិន ត្រេសស៊ី (Brian Tracy) ដែលជាអ្នកនិពន្ធដ៏ល្បីល្បាញមួយរូបផ្នែកអភិវឌ្ឍន៍សមត្ថភាព និងជាបុគ្គលដ៏ជោគជ័យមួយរូប បានលើកឡើងថា មានមូលហេតុសំខាន់ៗចំនួន៥ ដែលរារាំងមិនឲ្យមនុស្សក្លាយជាអ្នកមាន ដូចជា ទី១ មនុស្សទូទៅ រស់នៅក្នុងសង្គម ឬបរិយាកាសមួយ ដែលមិនមានអ្នកមាននៅក្បែរ ជាហេតុធ្វើឲ្យពួកគេ មិនដឹងថាអ្វីទៅ ដែលជំរុញឲ្យមនុស្សម្នាក់ៗក្លាយជាអ្នកមានបាន។
ទី២ មនុស្សទូទៅ មិនហ៊ានសម្រេចចិត្តធ្វើ ទោះបីពួកគេបានអាន ឬបានទទួលដំបូន្មានពីមនុស្សជោគជ័យក៏ដោយ។
ទី៣ មនុស្សទូទៅ មិនព្រមចាប់ផ្តើមធ្វើឥឡូវភ្លាមទេ ចេះតែគិតថាចាំដល់ពេលនេះចាំធ្វើ ចាំដល់ពេលនោះចាំធ្វើ។
ទី៤ មនុស្សទូទៅពេញចិត្តតែនឹងរបស់ចំពោះមុខ ចាយវាយដើម្បីសប្បាយរយៈពេលខ្លី និងទី៥ មនុស្សទូទៅ ខ្វះទស្សនវិស័យទៅអនាគត មិនដឹងថាអ្វីគួរធ្វើ អ្វីមិនគួរធ្វើ ដើម្បីសម្រេចទៅដៅអនាគត៕