ដោយៈ ណេត
ភ្នំពេញៈ រដ្ឋាភិបាលកម្ពុជា បាននិងកំពុងបង្ហាញសកម្មភាពយ៉ាងសកម្ម ចំពោះការអភិវឌ្ឍប្រព័ន្ធហេដ្ឋារចនាសម្ព័ន្ធ នៅទូទាំងប្រទេស រួមទាំងគម្រោងកែលម្អគម្រោងហេដ្ឋរចនាសម្ព័ន្ធផេងៗ នៅតាមបណ្តាខេត្ត និងជនបទជាដើម ដើម្បីសម្រួលការធ្វើដំណើររបស់ប្រជាពលរដ្ឋ និងវិស័យដឹកជញ្ជួន ដែលជាការរួមចំណែកដល់ការជំរុញកំណើនសេដ្ឋកិច្ច។
ការកែលម្អនឹងត្រូវធ្វើទៅលើផ្នែកជាច្រើន នៃតាមផ្លូវជាតិ និងផ្លូវខេត្ត ដែលជាលទ្ធផលជួយកាត់បន្ថយថ្លៃចំណាយ លើការដឹកជញ្ជូន និងហានិភ័យគ្រោះថ្នាក់ ដោយសារតែផ្លូវខូច និងជួយសម្រួលដល់ខ្សែចង្វាក់ផ្គត់ផ្គង់ ក្នុងវិស័យកសិកម្ម និងការអភិវឌ្ឍវិស័យទេសចរណ៍ផងដែរ។
ការចំណាយលើការដឹកជញ្ជូននៅប្រទេសកម្ពុជា នៅតែមានកម្រិតខ្ពស់នៅឡើយ ទោះបីជាមានភាពប្រសើរច្រើន ក្នុងប៉ុន្មានឆ្នាំចុងក្រោយនេះហើយក្តី។ ផ្លូវថ្នល់គឺជាមធ្យោបាយដឹកជញ្ជូននាំមុខគេនៅក្នុងប្រទេស និងចាំបាច់ត្រូវមានការវិនិយោគច្រើន ជាពិសេសនៅតាមតំបន់ជនបទ។ ផ្លូវជនបទមានជាង៧៥ភាគរយ នៃបណ្តាញផ្លូវសរុបទូទាំងប្រទេស ប៉ុន្តែមានតែ៥ភាគរយប៉ុណ្ណោះ ដែលជាផ្លូវក្រាលកៅស៊ូ។ ការប្រែប្រួលអាកាសធាតុ បានធ្វើឱ្យមានភ្លៀងនិងទឹកជំនន់ធំៗ បង្កហានិភ័យខូចខាតកាន់តែខ្លាំងដល់ប្រព័ន្ធផ្លូវនៅជនបទ។
ការវិភាគអំពីស្ថានភាពប្រើប្រាស់របស់ផ្លូវជនបទ បានបង្ហាញថា ក្នុងរដូវទឹកជំនន់ជាង២៦ភាគរយ នៃប្រជាជនរស់នៅក្នុងតំបន់របស់គម្រោង ប្រឈមនឹងហានិភ័យគ្មានផ្លូវប្រើប្រាស់ សម្រាប់ទៅរកសេវាបន្ទាន់ផ្នែកសុខភិបាល និងសាលារៀន។ នេះបើយោងតាមការស្រាវជ្រាវរបស់ World Bank។
ក្រៅពីនោះប្រជាជន១៨ភាគរយទៀត ត្រូវចំណាយពេល៣០នាទី ឬច្រើនជាងនេះ សម្រាប់ធ្វើដំណើរទម្រាំទៅដល់មន្ទីរពេទ្យ ដែលជាស្ថានប្រឈមនឹងភាពស្លាប់រស់មួយ។
ដូចដែលយើងដឹងហើយ ការអភិវឌ្ឍន៍វិស័យហេដ្ឋារចនាសម្ព័ន្ធ គឺដើម្បីពង្រីកសសៃឈាមសេដ្ឋកិច្ច ក៏ដូចជាការចូលរួមចំណែកកាត់ថ្លៃ ធ្វើដំណើររបស់ប្រជាពលរដ្ឋ និងវិស័យដឹកជញ្ជួន ដើម្បីឈានដល់ការប្រកួតប្រជែងក្នុងតំបន់ទៀតផង។
លោក ច្រឹក សុខនីម ប្រធានសមាគមភ្នាក់ងារ និងវាយតម្លៃអចលនវត្ថុកម្ពុជា បានថ្លែងប្រាប់ថា ការដាក់ចេញអភិវឌ្ឍន៍ហេដ្ឋារចនាសម្ព័ន្ធ របស់រដ្ឋាភិបាលនាពេលកន្លងមកនេះ គឺសញ្ញាមួយល្អ ដែលជំរុញឱ្យមានស័យនានា ឱ្យមានការរីកចំរើន រួមជាមួយនឹងវិស័យអចលនទ្រព្យផងដែរ។
លោកបន្តថា “ចំពោះការអភិវឌ្ឍន៍ហេដ្ឋារចនាសម្ព័ន្ធ ក៏វានឹងជួយជំរុញឱ្យវិស័យអលចនទ្រព្យរីកចម្រើនផងដែរ ជាពិសេសអចលនទ្រព្យប្រភេទសណ្ឋាគារ ផ្ទះសំណាក់ និងបឹងហ្គាឡូងផងដែរ” ។
ទោះពិភពលោកកំពុងជួបវិបត្តិសេដ្ឋកិច្ចសកល កម្ពុជានៅតែផ្តោតលើអភិវឌ្ឍន៍គម្រោងហេដ្ឋារចនាសម្ព័ន្ធ ដើម្បីជំរុញកំណើនសេដ្ឋកិច្ច។
គម្រោងវិនិយោគលើវិស័យហេដ្ឋារចនាសម្ព័ន្ធទាំងអស់ របស់រដ្ឋាភិបាល និងវិស័យឯកជននៅតែប្រព្រឹត្តិទៅតាមផែនការ និងការគ្រោងទុក ពោលគឺមានបញ្ហាអ្វីដែលជំរុញ ឱ្យមានការរះស្ទះនោះទេ។
លោកវ៉ាស៊ីម សូរិយា អ្នកនាំពាក្យក្រសួងសាធារណការ និងដឹកជញ្ជូន បានឱ្យដឹងថា មកដល់ពេលនេះ បើទោះបីមានវិបត្តិជំងឺ Covid-19 ក៏គម្រោងវិនិយោគហេដ្ឋារចនាសម្ព័ន្ធដែលបានអនុវត្តកាលពីកន្លមកនេះ នៅតែដំណើរការធម្មតា។
លោកបន្តថា “គម្រោងទាំងនោះ ដូចជាគ្មានអ្វីប្រែប្រួលទេ ពោលគឺអាចនិយាយថា ប្រព្រឹត្តិទៅតាមផែនការ។ តែយ៉ាងណាលោកថា “វាក៏មានភាពរអាក់រអ៊ួលខ្លះទៅលើកម្មកំលាំងពលករខ្មែរ និងកម្មករចិនមួយចំនួនតិចតួចបំផុតដែរ” ។ លោកបន្តថា “ម្យ៉ាងទៀត ក៏មានបញ្ហាលើការចចារ កញ្ចប់គម្រោងវិនិយោគថ្មី ជាមួយដៃគូអភិវឌ្ឍន៍ផងដែរ ព្រោះរាល់កិច្ចប្រជុំធ្វើឡើងតាមរយៈអនឡាញ ដែលពិបាកក្នុងការសម្រេចិត្តដូចជាការជួបប្រជុំដោយផ្ទាល់” ។
លោកបន្ថែមថា និយាយរួមកញ្ចប់គម្រោងវិនិយោគថ្មីៗ ហាក់ដូចជាមានភាពយឺតយ៉ាវបន្តិច ព្រោះយើងពិភាក្សា និងទាក់ទងទៅគ្នាតាមរយៈវីដេអូខនហ្វ្រេន និងអ៊ីម៉ែល” ។ លោកបញ្ជាក់ថា “គម្រោងវិនិយោគថ្មីៗ ដែលមានបញ្ហាយ៉ឺតយ៉ាវនេះ ជាគម្រោងវិនិយោគសម្រាប់ឆ្នាំក្រោយៗទៀត។
គម្រោងវិនិយោគ លើវិស័យហេដ្ឋារចនាសម្ព័ន្ធភាគច្រើននៅកម្ពុជា ត្រូវបានវិនិយោគតាមរយៈកម្ចីហិរញ្ញប្បទាន និងសម្បទាន ដោយប្រទេសជាដៃគូអភិវឌ្ឍន៍របស់កម្ពុជា តាមរយៈការបញ្ជូនក្រុមហ៊ុនសាងសង់ របស់ខ្លួនមកកាន់កម្ពុជា ដូចជាចិន ជប៉ុន កូរ៉េ និងប្រទេសមួយចំនួនទៀត។
សេដ្ឋវិទូកម្ពុជា លោកបណ្ឌិតម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិបានថ្លែងថា កត្តាហេដ្ឋារចនាសម្ព័ន្ឋ ជាបញ្ហាប្រឈមធំមួយក្នុងការប្រកួតប្រជែងផ្នែកសេដ្ឋកិច្ចជាមួយបណ្តាប្រទេសនានាក្នុងតំបន់ ហេតុនេះទើបរដ្ឋាភិបាលបានយកចិត្តទុកដាក់លើបញ្ហានេះ ប៉ុន្តែការកសាងហេដ្ឋារចនាសម្ព័ន្ឋត្រូវការទុនធំណាស់ និងពេលវេលាយូរ ទើបអាចដោះស្រាយបាន។
លោកបន្តថា “ទោះជាយ៉ាងណា រដ្ឋាភិបាលត្រូវតែវិនិយោគលើហេដ្ឋារចនាសម្ព័ន្ឋកាន់តែច្រើន ដើម្បីជម្រុញកំនើនសេដ្ឋកិច្ចកម្ពុជា ទៅកាន់កម្រិតថ្មីមួយទៀតនាពេលអនាគត” ៕