ដោយៈសុខុម
ហុងកុង: ខណៈប្រទេសចិន កំពុងតែបង្កើនវិធានការបង្ក្រាបរបស់ខ្លួន ទៅលើក្រុមហ៊ុនបច្ចេកវិទ្យាធំៗ ស្រាប់តែក្រុមហ៊ុនចំនួន២ ក្នុងចំណោមក្រុមហ៊ុនបច្ចេកវិទ្យាធំៗបំផុតរបស់ចិនបានចាប់ផ្ដើមឈ្លោះខ្លាំង។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី៣ កុម្ភៈ។
ក្រុមហ៊ុន TikTok ឬនៅប្រទេសចិន ដែលគេស្គាល់ថា Douyin ដែលជាបុត្រសម្ព័ន្ធរបស់ក្រុមហ៊ុនបច្ចេកវិទ្យាចិន ByteDance មានមូលដ្ឋាននៅក្រុងប៉េកាំង បានប្ដឹងក្រុមហ៊ុនចិន Tencent (TCEHY) កាលពីថ្ងៃអង្គារ ទី២ កុម្ភៈ ដោយអះអាងថា ក្រុមហ៊ុនបណ្ដាញទំនាក់ទំនងសង្គម ដែលមានមូលដ្ឋាននៅក្រុង Shenzhen ប្រទេសចិនមួយនេះបានយកប្រៀបលើគេដោយទុច្ចរិត ដើម្បីធាក់គូប្រជែងឱ្យខ្ទាតចេញពីទីផ្សារ។
ក្រុមហ៊ុន TikTok បានលើកឡើងកាលពីថ្ងៃអង្គារ ទី២ កុម្ភៈ តាមរយៈសេចក្ដីថ្លែងការណ៍មួយ ដែលខ្លួនបានបង្ហោះលើគណនី WeChat ផ្លូវការរបស់ខ្លួនថា ខ្លួនបានដាក់ពាក្យបណ្ដឹងដោយចោទប្រកាន់ថា App (កម្មវិធី) ផ្ញើសារ WeChat និង QQ របស់ក្រុមហ៊ុន Tencent បានហាមអ្នកប្រើប្រាស់ មិនឱ្យបង្ហោះចែករំលែកខ្លឹមសារផូស (Post) ពី TikTok រយៈពេល ៣ឆ្នាំ។
សារព័ត៌មាន CNN Business មិនទាន់បានឃើញពាក្យបណ្ដឹងនេះដាក់ទៅតុលាការកម្មសិទ្ធិបញ្ញាក្រុងប៉េកាំង (Beijing Intellectual Property Court) នៅឡើយទេ។ ទោះជាយ៉ាងណា ស្ថាប័នព័ត៌មានមួយចំនួនរួមទាំងកាសែនចិន Beijing Daily ផង បានចុះផ្សាយថា TikTok បានប្ដឹងទាមទារឱ្យក្រុមហ៊ុន Tencent ដកការរឹតបន្តឹងលើខ្លឹមសារផូសរបស់ខ្លួន និងសងជំងឺចិត្ត ៩០លានយ័ន (១៤ លានដុល្លារ)។
អ្នកនាំពាក្យក្រុមហ៊ុន TikTok បានប្រាប់ CNN Business ថា “យើងជឿថាការប្រកួតប្រជែងល្អសម្រាប់អ្នកប្រើប្រាស់ និងជួយលើកកម្ពស់នវានុវត្តន៍ថ្មី។ យើងបានដាក់ពាក្យបណ្ដឹងនេះ ដើម្បីការពារសិទ្ធិរបស់យើង និងសិទ្ធិនៃអ្នកប្រើប្រាស់របស់យើង”។
ទោះជាយ៉ាងណា ក្រុមហ៊ុន Tencent បានវាយបកវិញភ្លាមៗ ដោយបញ្ជាក់តាមរយៈសេចក្ដីថ្លែងការណ៍របស់ខ្លួន បង្ហោះលើគណនី WeChat ថា ខ្លួនក៏មានគម្រោងប្ដឹងបកទៅក្រុមហ៊ុន ByteDance វិញដែរ។
គេដឹងថា ក្រុមហ៊ុន ByteDance និងក្រុមហ៊ុន Tencent ស្ថិតក្នុងចំណោមក្រុមហ៊ុនធំបំផុត នៅក្នុងបណ្ដាញទំនាក់ទំនងសង្គមរបស់ចិន។ App WeChat របស់ Tencent មានអ្នកប្រើប្រាស់សកម្ម ប្រចាំខែជាង ១,២ ពាន់លាននាក់ ហើយ App QQ របស់ខ្លួនមានអ្នកប្រើប្រាស់សកម្មប្រចាំខែជិត ៧០០លាននាក់។
ចំណែកឯ TikTok របស់ ByteDance មិនបានបញ្ចេញតួលេខអ្នកប្រើប្រាស់ប្រចាំខែរបស់ខ្លួនទេ ប៉ុន្តែបាននិយាយកាលពីខែមុនថា ខ្លួនទទួលបានអ្នកប្រើប្រាស់សកម្មប្រមាណ៦០០លាននាក់ជារៀងរាល់ថ្ងៃ៕
