ដោយ៖ សាវុធ
ភ្នំពេញ៖ ធនាគារពិភពលោក (World Bank) បានវាយតម្លៃខ្ពស់ថា ធនាគារជាតិនៃកម្ពុជា (NBC) បានដាក់ចេញវិធានការ ប្រកបដោយប្រសិទ្ធភាព និងទាន់ពេលវេលា ក្នុងការឆ្លើយតបនឹងសម្ពាធ នៃការធ្លាក់ចុះនៃកំណើនសេដ្ឋកិច្ច ព្រមទាំងបានរួមចំណែកផ្តល់ការគាំទ្រដល់សកម្មភាពសេដ្ឋកិច្ច។
ការវាយតម្លៃនេះ ត្រូវបានធ្វើឡើង ក្នុងកិច្ចប្រជុំតាមរយៈ videoconference រវាងលោកជា ចាន់តូ ទេសាភិបាល ធនាគារជាតិនៃកម្ពុជា និងតំណាងធនាគារពិភពលោកដែលដឹកនាំដោយលោកស្រី Mariam Sherman ប្រធានធនាគារពិភពលោកប្រចាំកម្ពុជា ឡាវ និងមីយ៉ាន់ម៉ាកាលពីម្សិលម៉ិញ។ នេះបើយោងតាមការសចក្តីប្រកាសព័ត៌មានរបស់NBC។
យោងតាមសេចក្តីប្រកាសបានឱ្យដឹងថា ធនាគារពិភពលោកបានវាយតម្លៃខ្ពស់ចំពោះវិធានការដែលបានដាក់ចេញដោយធនាគារជាតិនៃកម្ពុជាក្នុងការឆ្លើយតបនឹងសម្ពាធនៃការធ្លាក់ចុះនៃកំណើនសេដ្ឋកិច្ច ប្រកបដោយប្រសិទ្ធភាពនិងទាន់ពេលវេលា ព្រមទាំងបានរួមចំណែកផ្តល់ការគាំទ្រដល់សកម្មភាពសេដ្ឋកិច្ច។
ធនាគារពិភពលោក ដែលបានរួមចំណែកជួយផ្តល់ជំនួយបច្ចេកទេសផ្នែកប្រព័ន្ធទូទាត់កម្ពុជា ក៏បានរំលេចពីការអភិវឌ្ឍ ប្រព័ន្ធទូទាត់នៅកម្ពុជា ដែលត្រូវបានធ្វើទំនើបកម្ម លើផ្នែកបច្ចេកវិទ្យាទំនើប និងបានជួយសម្រួលការទូទាត់ និងកាត់បន្ថយកម្រៃសេវាទូទាត់អេឡិចត្រូនិក។
លោកទេសាភិបាល បានថ្លែងថា កន្លងមក ធនាគារពិភពលោក បានរួមចំណែកអភិវឌ្ឍន៍វិស័យធនាគារ ជាពិសេសទៅលើផ្នែក ចំណេះដឹងហិរញ្ញវត្ថុ បរិយាបន្នហិរញ្ញវត្ថុ ប្រព័ន្ធទូទាត់, កិច្ចការពារអតិថិជន ប្រព័ន្ធការពារប្រាក់បញ្ញើ ការប្រឆាំងការសម្អាតប្រាក់ និងហិរញ្ញប្បទានភេរវកម្មជាដើម។
លោកបានថ្លែងបន្តថា វិស័យធនាគារកម្ពុជាបន្តមានស្ថិរភាពរឹងមាំ និងបានរួមចំណែកយ៉ាងសកម្មក្នុងការគាំទ្រសកម្មភាពសេដ្ឋកិច្ច ស្របតាមគោលនយោបាយរបស់រាជរដ្ឋាភិបាល។
ជាមួយគ្នានេះដែរ លោកទេសាភិបាល ក៏បានស្នើឱ្យធនាគារពិភពលោកបន្តចូលរួមចំណែកក្នុងការអភិវឌ្ឍវិស័យធនាគារបន្ថែមទៀត ជាពិសេសលើផ្នែកការពារប្រាក់បញ្ញើ ការសិក្សាទៅលើប្រតិបត្តិការទិញ-លក់រូបិយប័ណ្ណ ចំណេះដឹងផ្នែកហិរញ្ញវត្ថុ និងការកសាងសមត្ថភាពជំនាញរបស់មន្ត្រីបុគ្គលិកធនាគារជាតិនៃកម្ពុជា៕
