ដោយ : គង់ សូរិយា
ភ្នំពេញៈ មន្រ្តីជាន់ខ្ពស់នៃរាជរដ្ឋាភិបាលកម្ពុជាបានឲ្យដឹងថា កម្ពុជាបានផ្អាកការខ្ចីប្រាក់ពីធនាគារពិភពលោកដោយសារការឡើងថ្លៃអត្រាការប្រាក់ និងបានងាកមករកប្រភពផ្សេងជំនួសវិញ។
រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ លោកវង្ស៊ី វិស្សុតបានមានប្រសាសន៍ក្នុងវេទិកាសាធារណៈកាលពីថ្ងៃម្សិលម៉ិញនេះថា ធនាគារពិភពលោក បានដំឡើងការប្រាក់ពី0,៧ភាគរយ ទៅដល់២,៨ភាគរយ ដែលជាអត្រាការប្រាក់ដ៏ខ្ពស់មួយ ដោយសារកម្ពុជាបានឈានឡើងពីឋានៈប្រទេសមានប្រាក់ចំណូលទាប មកកាន់ប្រទេសមានប្រាក់ចំណូលមធ្យមកម្រិតទាប។
លោកបន្តថា “បើឡើងថ្លៃអត្រាការប្រាក់ខ្ពស់បែបនេះ យើងមានតែងាកបង្វែរទៅរកប្រភពកម្ចីផ្សេងទៀតដូចជាប្រទេសជប៉ុន កូរ៉េ និងធនាគារវិនិយោគហេដ្ឋារចនាសម្ព័ន្ឋអាស៊ី(AIIB)ដែលមានអត្រាការប្រាក់ទាបជាងនេះ”។ លោកបន្តថា “រដ្ឋាភិបាលក៏បាននិងកំពុងគិតគូរបោះផ្សាយលក់ប័ណ្ណបំណុល ដើម្បីយកលុយពីសាធាណៈជនសម្រាប់ប្រើប្រាស់លើការអភិវឌ្ឍប្រទេសជាតិនាពេលអនាគត”។
កម្ពុជាបានប្រមូលចំណូលពន្ឋ និងអាករផ្ទៃក្នុងបានចំនួន៥៧០០លានដុល្លារអាមេរិកកាលពីឆ្នាំមុន ខណៈទំហំពាណិជ្ជកម្មកម្ពុជាបានកើនឡើង បើទោះបីជាកម្ពុជាកំពុងមានបញ្ហាវិបត្តិដោយសារជំងឺកូវីដ១៨ក្តី៕