ដោយៈ សាវុធ
ភ្នំពេញៈ មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ច្បាប់វិនិយោគថ្មី ដែលរាជរដ្ឋាភិបាលកំពុងរៀបចំ អាចនឹងដាក់ឱ្យដំណើរនៅខែមេសា ឆ្នាំ២០២១ខាងមុខនេះ ដែលច្បាប់នេះនឹងផ្ដល់ភាពងាយស្រួល ដល់អ្នកវិនិយោគ ជាងច្បាប់ចាស់។
លោកផាន់ ផល្លារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងយ៉ាងដូច្នេះ ក្នុងវេទិកាសាធារណៈ ស្តីពីគ្រប់គ្រងម៉ាក្រូសេដ្ឋកិច្ច និងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០២១ នាថ្ងៃទី២៧ ខែមករា ឆ្នាំ២០២១ ។
លោកបានបញ្ជាក់ថា “ច្បាប់វិនិយោគថ្មីនេះ បានតាក់តែងបញ្ចប់ទាំងស្រុងរួចហើយ និងប្រហែលជានៅក្នុងខែកុម្ភៈខាងមុខនេះ នឹងមានការពិភាក្សាគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ” ។ លោកបន្តថា “បន្ទាប់មកនឹងត្រូវដាក់ទៅគណៈរដ្ឋមន្ត្រី ហើយប្រសិនបើមានភាពរលូន គឺប្រហែលជានៅខែមេសាឆ្នាំនេះ ច្បាប់ថ្មីនេះនឹងទៅដល់រដ្ឋសភា និងព្រឹទ្ធសភា ហើយនឹងអាចដាក់ចេញឲ្យប្រើប្រាស់ផងដែរ” ។
លោកបញ្ជាក់ទៀតថា ការសុំច្បាប់វិនិយោគរបស់អ្នកវិនិយោគិនលើកមុន (ច្បាប់ចាស់) ពួកគាត់មានរឿងឈឺក្បាលច្រើន ដូច្នេះនៅពេលមានច្បាប់វិនិយោគថ្មីនេះ គឺយើងនឹងជួយដោះស្រាយពួកគាត់ មិនឲ្យឈឺក្បាលដូចមុនទេ។
លោកបានថ្លែងដោយលើកជាឧទាហរណ៍ថា នៅក្នុងច្បាប់ចាស់ អ្នកវិនិយោគគាត់សុំគម្រោងវិនិយោគអ្វីមួយ យើងឲ្យគាត់តាមការស្នើសុំនោះតែមួយផ្នែក តែសម្រាប់ច្បាប់វិនិយោគថ្មីនេះ គឺយើងជូនគាត់ទាំងអស់តែម្ដង។
លោកផាន់ ផល្លាបានថ្លែងថា សម្រាប់ច្បាប់ថ្មីនេះ ពាក់ព័ន្ធរឿងពន្ធ គឺកាលពីពេលនៅច្បាប់ចាស់ អ្នកវិនិយោគត្រូវបង់លើពន្ធអាករខ្លះៗ ពាក់ព័ន្ធឧបករណ៍ប្រើប្រាស់មួយចំនួនក្នុងគម្រោង តែចំពោះច្បាស់ថ្មីនេះគាត់មិនចាំបាច់បង់ទេ ក្នុងការនាំចូលទាំងឡាយណា ដែលជាធាតុចូលក្នុងផលិតកម្ម។
លោកថ្លែងបន្តថា “ច្បាប់ចាស់ និងច្បាប់ថ្មីនេះ មានលក្ខណខុសគ្នា ដូចជាក្នុងពេលបច្ចុប្បន្ន យើងគិតអំពីការជំរុញការវិនិយោគឲ្យឡើងខ្ពស់ជាងមុន ទាំងធនធានមនុស្ស និងបច្ចេកទេស ហើយច្បាប់ថ្មីនេះ មានការបែងចែកប្រភេទឧស្សាហកម្មច្បាស់លាស់” ។
លោកបានឱ្យដឹងទៀតថា នៅពេលដែលច្បាប់ថ្មីនេះ បានដាក់ចេញទៅ គឺអាចធ្វើ ឱ្យបរិយាកាសការវិនិយោគ មានភាពរឹតតែល្អប្រសើរ ហើយបន្ទាប់ពីបរិយាកាសវិនិយោគល្អ និងមានការកាត់បន្ថយលើចំណាយផ្សេងៗទៀត នោះនឹងធ្វើឲ្យការវិនិយោគនៅប្រទេសកម្ពុជា មានភាពទាក់ទាញកាន់តែខ្លាំង៕
