ដោយៈសុខុម
សិង្ហបុរី: ប្រទេសសិង្ហបុរី មានមហិច្ឆតាធំចង់ពង្រីកវិស័យផលិតកម្មរបស់ខ្លួនឱ្យបានរហូតដល់ទៅ ៥០% នៅរយៈពេល ១០ឆ្នាំក្រោយ ដើម្បីធនាថា វិស័យមួយនេះបន្តរួមចំណែករកចំណូលបានប្រមាណ១ ភាគ៥នៃទិន្នផលសេដ្ឋកិច្ចក្នុងរយៈពេលវែង។ នេះបើយោងតាមការចុះផ្សាយរបស់សារព័ត៌មាន CNA ។
លោក Chan Chun Sing រដ្ឋមន្ត្រីពាណិជ្ជកម្ម និងឧស្សាហកម្មសិង្ហបុរីបានថ្លែងកាលពីថ្ងៃច័ន្ទទី២៥ មករាកន្លងមកថា វាជាគោលដៅមួយ ដើម្បីត្រួសត្រាយផ្លូវឆ្ពោះទៅរកផលិតកម្មជឿនលឿន ដែលជួយបង្កើនទិន្នផលសេដ្ឋកិច្ចបន្ថែមទៀត។
ក្រោយចុះទៅពិនិត្យមើលស្ថានភាព ក្រុមហ៊ុនផលិតកុំព្យូទ័រក្នុងស្រុក Univac លោកបានថ្លែងទៅកាន់ក្រុមអ្នកយកព័ត៌មានថា “កាលពីអតីតកាល ផលិតកម្មជាច្រើនជំនាន់ ដែលពឹងផ្អែកលើការប្រកួតប្រជែងថ្លៃដើម ត្រូវបានជំនួសដោយជម្រើសថោកជាងកាន់តែច្រើនឡើង នៅក្នុងប្រទេសផ្សេងទៀត” ។ លោកបន្តថា “ផ្ទុយមកវិញ លើសពីការបង្កើនតម្លៃ ៥០% យើងចង់ឃើញផលិតកម្មរបស់យើង កាន់តែច្រើនអភិវឌ្ឍខ្លួនទៅជាផលិតកម្មជឿនលឿន ដែលការប្រកួតប្រជែងមិនពឹងផ្អែកលើថ្លៃដើម ប៉ុន្តែពឹងផ្អែកលើកម្មសិទ្ធិបញ្ញាដែលយើងបង្កើតបាន គុណភាពនៃផលិតផល និងភាពជាក់លាក់ដែលយើងអាចផ្ដល់ឱ្យសម្រាប់វិស័យនេះ” ។
លោក Chan Chun Sing បានលើកឡើងបន្ថែមទៀតថា ដើម្បីធ្វើដូច្នេះបាន រដ្ឋាភិបាលសង្ឃឹមថា នឹងទាក់ទាញបានពលរដ្ឋសិង្ហបុរី កាន់តែច្រើនឱ្យចូលប្រឡូកក្នុងវិស័យនេះ ខណៈបន្តទាក់ទាញការវិនិយោគចូលក្នុងប្រទេសនេះ និងត្រៀមក្រុមហ៊ុនក្នុងស្រុកបន្ថែមទៀតនៅក្នុងវិស័យផលិតកម្មជឿនលឿន។
បច្ចុប្បន្ន ផលិតកម្មរួមចំណែកប្រហែល២១% ឬស្មើប្រមាណ១០៦ពាន់លានដុល្លារសិង្ហបុរី (៨០ពាន់លានដុល្លារអាមេរិក) នៃផលិតផលក្នុងស្រុកសរុប (GDP) របស់សិង្ហបុរី។
រដ្ឋមន្ត្រីរូបនេះបានសគូសបញ្ជាក់ថា វិស័យមួយនេះផ្ដល់ការងារប្រហែល៤៥ម៉ឺនកន្លែង ឬប្រមាណ១២%នៃកម្លាំងការងារសរុប ជាមួយនឹងអត្រាប្រាក់ឈ្នួលជាមធ្យមប្រហែល៤.៧០០ដុល្លារសិង្ហបុរី (៣.៥៤០ ដុល្លារអាមេរិក) ក្នុងមួយខែ៕
