ដោយៈសុខុម
តូក្យូ: រដ្ឋមន្ត្រីការពារជាតិអាមេរិកថ្មី លោក Lloyd Austin បានអះអាងជាថ្មីថា សហរដ្ឋអាមេរិក នៅតែប្ដេជ្ញាការពារប្រជុំកោះនៅសមុទ្រចិនខាងកើត ដែលជប៉ុន ហៅថា Senkaku Islands និងដែលចិន ហៅថា Diaoyu Islands។
យោងតាមការចុះផ្សាយរបស់ទីភ្នាក់ងារព័ត៌មានជប៉ុន Jiji ឱ្យដឹងថា អំឡុងពេលសន្ទនាគ្នាតាមទូរស័ព្ទជាលើកដំបូង ជាមួយសមភាគីជប៉ុន កាលពីថ្ងៃអាទិត្យ ទី២៤ មករា លោក Lloyd Austin និងរដ្ឋមន្ត្រីការពារជាតិជប៉ុន Nobuo Kishi បានអះអាងថា មាត្រា ៥ នៃសន្ធិសញ្ញាសន្តិសុខអាមេរិក-ជប៉ុន ដែលចែងអំពីកាតព្វកិច្ចរបស់សហរដ្ឋអាមេរិក ក្នុងការការពារប្រទេសជប៉ុន ក៏គ្របដណ្ដប់ទាំងប្រជុំកោះ Senkaku ឬ Diaoyu ផងដែរ។
រដ្ឋមន្ត្រីទាំងពីរ ក៏បានបញ្ជាក់ជាថ្មីផងដែរអំពីជំហររបស់ខ្លួនថា ពួកលោកនឹងប្រឆាំងដាច់ខាត ចំពោះសកម្មភាពជាឯកតោភាគី (តែភាគីម្ខាង) ណាមួយដែលធ្វើឱ្យប៉ះពាល់សិទ្ធិរបស់ប្រទេសជប៉ុន ក្នុងការគ្រប់គ្រងប្រជុំកោះខាងលើនេះ។
គេសង្កេតឃើញថា ប្រទេសជប៉ុន មានការព្រួយបារម្ភកាន់តែខ្លាំងឡើង ចំពោះសកម្មភាពរបស់ប្រទេសចិន នៅសមុទ្រចិនខាងកើត រួមទាំងការទន្ទ្រានចូលក្នុងដែនសមុទ្រជុំវិញប្រជុំកោះមានជម្លោះផងដែរ។
នេះគឺជាកិច្ចសន្ទនាថ្នាក់រដ្ឋមន្ត្រីលើកដំបូង រវាងរដ្ឋាភិបាលក្រុងតូក្យូ និងរដ្ឋាភិបាលក្រុងវ៉ាស៊ីនតោន ចាប់តាំងពីប្រធានាធិបតីអាមេរិក ចូ បៃឌិន ចូលកាន់តំណែងជាផ្លូវការកាលពីថ្ងៃពុធ ទី២០ មករា មក។
លោក Lloyd Austin ដែលជាឧត្តមសេនីយ៍ចូលនិវត្តន៍ បានសាងប្រវត្តិសាស្ត្រថ្មីដ៏គួរឱ្យភ្ញាក់ផ្អើលកាលពីថ្ងៃសុក្រ ទី២២ មករា ដោយក្លាយជារដ្ឋមន្ត្រីការពារជាតិស្បែកខ្មៅដំបូងបង្អស់របស់សហរដ្ឋអាមេរិក។
ទោះជាយ៉ាងណា ភ្លាមៗក្រសួងការពារជាតិជប៉ុន មិនអាចទាក់ទងសុំការបំភ្លឺបានទេជុំវិញកិច្ចសន្ទនាខាងលើនេះ។
បញ្ជាការរបស់សហរដ្ឋអាមេរិក ទទួលបន្ទុកផ្នែកសន្តិសុខ នៅមហាសមុទ្រឥណ្ឌា-ប៉ាស៊ីហ្វិក បានបញ្ជាក់កាលពីថ្ងៃអាទិត្យ ទី២៤ មករា ថា កងនាវាវាយប្រហារមួយនៃកងទ័ពជើងទឹកអាមេរិក បានចូលទៅក្នុងសមុទ្រចិនខាងត្បូង កាលពីថ្ងៃសៅរ៍ ទី២៣ មករា ជាថ្ងៃតែមួយដែលកោះតៃវ៉ាន់ បានរាយការណ៍ថា កងយន្តហោះទម្លាក់គ្រាប់បែក និងយន្តហោះចម្បាំងចិន បានទន្ទ្រានចូលក្នុងដែនអាកាសរបស់ខ្លួន នៅជិតប្រជុំកោះ Pratas Islands៕
