ដោយគង់ ម៉ាលីន
ភ្នំពេញៈ វិថីឆ្ពោះទៅរកភាពជោគជ័យរបស់មនុស្សម្នាក់ៗមិនដូចគ្នាទេ វាត្រូវការពេលវេលា ធនធាន សតិបញ្ញា និងមធ្យោបាយផ្សេងៗឡគ្នា ឬដូចគ្នាអាស្រ័យលើស្ថានភាពជាក់ស្តែង។
មានបុគ្គលមនុស្សមួយចំនួនមានបំណងប្រាថ្នា និងឆន្ទៈមោះមុតដិតដាមក្នុងចិត្ត ប៉ុន្តែបើខ្វះចំណុចណាមួយ ភាគជោគជ័យអាចរសាត់ឆ្ងាយផងដែរ វាប្រៀបដូចជាដាវមុត ដែលដាក់ក្នុងស្រោម តែមិនអាចដកចេញយកមកកាប់បាន។
ហេតុនេះទើបគេហទំព័រ Cambodiafinancialtiimes.com សូមលើកយកចំណុចមួយចំនួន ដើម្បីពិចារណាលើសកម្មភាព និងផែនការឆ្ពោះទៅមុខរបស់ខ្លួន។
គួររៀបចំផែនការប្រចាំថ្ងៃ
លោក អ្នក គួរតែរៀបចំផែនការសម្រាប់ថ្ងៃស្អែក។ កំណត់ពីអ្វីដែលអ្នកចង់ធ្វើនៅថ្ងៃស្អែកតាំងពីចាប់ផ្តើមរហូតដល់ទីបញ្ចប់។ តើអ្នកនឹងភ្ញាក់ពីគេងនៅម៉ោងប៉ុន្មាន? តើការងារសំខាន់ៗអ្វីខ្លះ ដែលអ្នកបំរុងនឹងធ្វើ? តើអ្នកនឹងតាំងចិត្តរឿងអ្វីខ្លះ នៅថ្ងៃស្អែកនេះ សូមសរសេរវានៅលើសៀវភៅ កំណត់ហេតុប្រចាំថ្ងៃរបស់អ្នក។
ក្រោយពីបានសរសេរកត់ត្រារួចហើយ លោក អ្នកអាចចំណាយពេលដើម្បីពិនិត្យមើលវាម្តងទៀត ព្រោះវាជាកិច្ចការតូចៗប្រចាំថ្ងៃ ដែលធ្វើអោយអ្នកសម្រេចគោលបំណងធំៗរបស់អ្នក។
២. រំលឹកគោលដៅដែលអ្នកបានកំណត់ជាប្រចាំ
មុនពេលអ្នកចូលគេង អ្នកគួរតែយកគោលដៅ ដែលអ្នកបានសរសេរទុក មកអានវា ហើយវាកាន់តែមានប្រសិទ្ធិភាព នៅពេលដែលអ្នកអានវាអោយឮ។ តើការអាន រំលឹកគោលដៅយើងជាប្រចាំមានប្រយោជន៍អ្វីខ្លះ ដល់ការសម្រេចគោលដៅ? ធ្វើដូច្នេះដើម្បីឲ្យ អនុសម្បជញ្ញៈ (Subconscious Mind) របស់អ្នក ធ្វើការប្រកបដោយអំណាចចេញពីខាងក្នុងដោយការធ្វើដដែលៗ ឬទំលាប់ជាប្រចាំ។
អនុសម្បជញ្ញៈ ជាអ្នកបញ្ជាសកម្មភាពរបស់អ្នក។ ដូច្នេះនៅពេលដែលអ្នកគេងលក់ អនុសម្បជញ្ញៈរបស់អ្នក នឹងជួយអ្នកអោយសម្រេចគោលដៅ និងរកដំណោះស្រាយអោយអ្នកជាក់ជាមិនខាន នៅពេលដែលអ្នករំលឹកពីគោលដៅរបស់អ្នករាល់យប់មុនពេលអ្នកចូលគេង។ ការសម្រេចគោលដៅ មិនមែនសរសេរភ្លាមក៏អាចសម្រេចភ្លាមដែរ ពេលខ្លះវាក៏ត្រូវការពេលវេលាផងដែរ ដូចជាការបន្ទុំចេគ ឬល្មុត វាត្រូវការពេលវេលាមួយ ដើម្បីឲ្យវាទុំបាន និងមានរសជាតិឆ្ងាញ់។
វាមិនខាតបង់អ្វីឡើយព្រោះអ្នកគ្រាន់តែមើល គោលដៅដែលអ្នកសរសេរបួនដប់បន្ទាត់។ ហើយបើទោះជាអ្នកមិនចំណាយពេល ពីរ បីនាទីមើលវា ក៏អ្នកមិនអាចយកពេលនេះទៅធ្វើអ្វីបានច្រើនជានេះដែរ។
៣ គុណធ៌ម និងត្រេកអរចំពោះអ្វីដែលខ្លួនមាន
ការដែលសំដែងទឹកចិត្ត ឬសកម្មភាពដឹងគុណ មិនមែនជារឿងខាតបង់សម្រាប់យើងទេ ផ្ទុយទៅវិញវានឹងផ្តល់ប្រយោជន៍អរូបិយ៍ជាច្រើន ក្រៅពីការបង្កើនទំនាក់ទំនងល្អជាមួយមនុស្សជុំវិញខ្លួនយើង។ នៅពេលដែលអ្នកមានសេចក្តីអំណរ ឬការដឹងគុណចំពោះសុខភាពល្អ ដែលអ្នកកំពុងមាន ការរស់នៅល្អ និងមានមិត្តភ័ក្ត្រល្អៗជួយកិច្ចការផ្សេងៗ គឺអ្នកកំពុងតែបង្កើតរូបភាពក្នុងខួរក្បាល អំពីភាពសំបូរបែបដែលអ្នកកំពុងមាន ហើយវានឹងទាក់ទាញរបស់ល្អៗ វត្ថុមានតម្លៃ រូមទាំងអ្វីផ្សេងៗទៀតដែលអ្នកចង់បាន។ របៀបអនុវត្តគឺងាយស្រួលបំផុត ដោយគ្រាន់តែសរសេរក្នុងកំណត់ហេតុ ឬផ្ញើរសារខ្លីៗទៅកាន់មនុស្សដែលបានជួយអ្នកក្នុងថ្ងៃនេះ ជារឿងរាល់ថ្ងៃ ជាពិសេសមុនពេលចូលគេង។
៤ រំលឹកឬដាស់អនុសម្បជញ្ញៈឲ្យជួយ
ក្នុងការស់នៅ ទោះជាក្នុងកិច្ចការផ្ទាល់ខ្លួនក្តី ឬការងារអាជីពក្តី តែងតែជួបបញ្ហាដោះស្រាយមិនចេញ ហើយក៏មិនដឹងថារកចំលើយមកពីណា ទៅសួរអ្នកណាដែរ ព្រោះសុទ្ធតែរឿងស្មានមិនត្រូវ ថានឹងមានអ្វីកើតឡើងមានអ្វីប្រែប្រួល ការផ្លាស់ប្តូរនោះត្រឹមត្រូវដែរឬទេ? មិនបាច់ទៅដើរសួរអ្នកណាឆ្ងាយ និងចំណាយលុយអញ្ជើញអ្នកណាញ៉ាំបាយនាំអោយរំខានពេលវេលារបស់ពួកគាត់ទេ គឺសួរតែអនុសម្បជញ្ញៈរបស់អ្នកទៅបានហើយ អ្នកនឹងទទួលបានចំលើយឆាប់ៗក្នុងពេលណាមួយ។
តើលោក អ្នកធ្លាប់ទេ ពេលខ្លះអ្នកកំពុងគេង ស្រាប់តែនឹកឃើញចំលើយអ្នកដែលចង់ដឹងនៅពាក់កណ្តាលអាធ្រាត ឬជិតភ្លឺ ពេលខ្លះអ្នកទទួលបានចំលើយនៅពេលអ្នកកំពុងមុជទឹក ឬធ្វើអ្វីផ្សេងៗដោយចំលើយ ឬគំនិតនោះផុសចេញមកឯងៗតែម្តង។ នេះបញ្ជាក់អោយឃើញថា អនុសម្បជញ្ញៈ របស់យើងធ្វើការរាល់ថ្ងៃនិងគ្រប់ពេលវេលា។
អនុសម្បជញ្ញៈ(subconscious mind) មានអំណាចជាង សតិសម្បជញ្ញៈ
(conscious mind) ១០០ដងឯណោះ។ ដូច្នេះហើយ ប្រសិនអ្នកមិនអាចទទួលបាន ចំលើយក្នុងពេលឆាប់ៗតាមចិត្ត ដែលអ្នកចង់បានសូមព្យាយាមបន្ថែមប៉ុន្មានយប់ ប៉ុន្មានដងទៀតអ្នកនឹងទទួលបានចំលើយជាក់ជាមិនខាន។
៥ ការធ្វើលំនឹកគិត(Hypnotherapy)
ការអនុវត្តលំនឹកក្នុងការគិត វាពិតជាអាចជួយក្នុងការបង្កើតក្តីស្រម៉ៃ និងការសម្រេចគោលបំណង ព្រោះការធ្វើតាមវិធីនេះនឹងជួយអោយ អនុសម្បជញ្ញៈរបស់យើងចាប់បានអ្វីដែលយើងបង្កើតទំលាប់ថ្មីលឿនជាងមុន៕