ដោយៈ ម៉ាណេត
ភ្នំពេញៈ លោកជា វ៉ាន់ដេតរដ្ឋមន្ត្រីក្រសួងប្រៃសណីយ៍ និងទូរគមនាគមន៍បានលើកឡើងថា ការវិវឌ្ឍឌីជីថលបានដើរតួនាទីយ៉ាងសំខាន់ ក្នុងការរួមចំណែកពន្លឿនការស្តារឡើងវិញ និងការអភិវឌ្ឍសេដ្ឋកិច្ចនិងសង្គម។
ការលើកឡើងរបស់លោករដ្ឋមន្ត្រីត្រូវបានឡើង ក្នុងអំឡុងកិច្ចប្រជុំថ្នាក់រដ្ឋមន្ត្រីឌីជីថលអាស៊ានលើកទី១ តាមប្រព័ន្ធវីដេអូ ក្រោមប្រធានបទ “អាស៊ាន៖ សហគមន៍តភ្ជាប់ដោយឌីជីថល” នៅថ្ងៃទី២១-២២ ខែមករា ឆ្នាំ២០២១ ។
លោកជា វ៉ាន់ដេតបានមានប្រសាសន៍ថា ការវិវឌ្ឍឌីជីថលបានដើរតួនាទីយ៉ាងសំខាន់ ក្នុងការកាត់បន្ថយផលប៉ះពាល់នៃជំងឺកូវីដ-១៩ និងផ្តល់នូវដំណោះស្រាយប្រកបដោយប្រសិទ្ធភាព ដើម្បីរក្សានូវនិរន្តភាពនៃសកម្មភាពកិច្ចការរដ្ឋបាល និងអាជីវកម្ម។
លោកបានថ្លែងថា “ប្រទេសសមាជិកអាស៊ាន ចាំបាច់ត្រូវធ្វើការរួមគ្នា ដើម្បីពង្រឹងទំនាក់ទំនងរវាងរដ្ឋជាសមាជិកនិងដៃគូអភិវឌ្ឍ ប្រែកា្លយជាសហគមន៍ ដែលតភ្ជាប់ដោយឌីជីថល និងជំរុញការកាត់បន្ថយគម្លាតឌីជីថល រួមចំណែកពន្លឿនការស្តារឡើងវិញ និងការអភិវឌ្ឍសេដ្ឋកិច្ចនិងសង្គម” ។
លោកជា វ៉ាន់ដេតបានបន្ថែមទៀតថា កម្ពុជាបាននិងកំពុងខិតខំប្រឹងប្រែងក្នុងការពង្រឹង ការកសាងហេដ្ឋារចនាសម្ព័ន្ធ ទូរគមនាគមន៍ទាំងទូរសព្ទចល័ត និងអ៊ិនធឺណិត ដើម្បីផ្ដល់សេវាប្រកបដោយទំនុកចិត្ត និងមានតម្លៃសមរម្យ ព្រមទាំងលើកកម្ពស់អក្ខរកម្មឌីជីថល។
លោកបានបញ្ជាក់ថា កម្ពុជាត្រៀមខ្លួនរួចជាស្រេច ក្នុងការធ្វើការរួមគ្នាជាមួយរដ្ឋជាសមាជិកនិងដៃគូអភិវឌ្ឍទាំងអស់ ដើម្បីប្រែក្លាយអាស៊ាន ទៅជាសហគមន៍ឌីជីថលនិងប្លុកសេដ្ឋកិច្ចមួយឈានមុខគេ ដែលជំរុញកំណើនសេដ្ឋកិច្ចដោយប្រើបច្ចេកវិទ្យា និងប្រព័ន្ធឌីជីថលប្រកបដោយសុវត្ថិភាព។
កិច្ចប្រជុំថ្នាក់រដ្ឋមន្ត្រីឌីជីថលអាស៊ានលើកទី១ ដែលមានប្រទេសម៉ាឡេស៊ីបានធ្វើជាម្ចាស់ផ្ទះ ត្រូវបានប្ដូរឈ្មោះពីកិច្ចប្រជុំថ្នាក់រដ្ឋមន្ត្រីទូរគមនាគមន៍ និងព័ត៌មានវិទ្យាអាស៊ាន(TELMIN) ចាប់តាំងពីឆ្នាំ២០០០ រហូតដល់ឆ្នាំ២០១៩ ដើម្បីស្របតាមនិន្នាការសកលនៃការផ្លាស់ប្តូរផ្នែកបច្ចេកវិទ្យា។ កិច្ចប្រជុំនេះធ្វើឡើងជារៀងរាល់ឆ្នាំ ដោយប្តូរវេនក្នុងចំណោមបណ្តារដ្ឋសមាជិកអាស៊ាន៕
