ដោយៈសុខុម
ញូវយ៉ក: លោក Kevin Hassett ដែលជាអតីតទីប្រឹក្សាសេដ្ឋកិច្ចរបស់អតីតប្រធានាធិបតី ដូណាល់ ត្រាំ បានសម្ដែងការគាំទ្រពេញទំហឹង ចំពោះផែនការសង្គ្រោះក្នុងទំហំទឹកប្រាក់ ១,៩ ទ្រីលានដុល្លារ របស់ប្រធានាធិបតីថ្មី ចូ បៃឌិនថា ជាមធ្យោបាយមួយ ដើម្បីស្ដារសេដ្ឋកិច្ចរបស់សហរដ្ឋអាមេរិក ឱ្យងើបឡើងពីវិបត្តិឆ្លងរាតត្បាតវីរុសកូវីដ-១៩ ។
លោកបានថ្លែងប្រាប់សារព័ត៌មាន CNN Business កាលពីថ្ងៃព្រហស្បតិ៍ ទី២១ មករាថា “គេបានទម្លាក់កញ្ចប់ថវិកាជាច្រើនរួចមកហើយ ប៉ុន្តែខ្ញុំយល់ថា យើងចាំបាច់ត្រូវប្រថុយ” ។
អតីតក្រុមមន្ត្រីនៃរដ្ឋការរបស់លោក ត្រាំ បានសម្ដែងក្ដីបារម្ភថា ប្រសិនបើគ្មានជំនួយសង្គ្រោះបន្ថែម ពីរដ្ឋាភិបាលក្រុងវ៉ាស៊ីនតោនទេនោះ ការឆ្លងរាតត្បាតវីរុសកូវីដ-១៩ ដែលកាន់តែធ្ងន់ធ្ងរ ទៅនឹងធ្វើឱ្យសេដ្ឋកិច្ចអាមេរិក ធ្លាក់ចុះខ្លាំងដូចក្នុងត្រីមាសទី១ ដើមឆ្នាំ២០២០ ដែលកាលនោះ GDP (ផលិតផលក្នុងស្រុកសរុប) បានធ្លាក់ចុះរហូតដល់ទៅ ៥% ។
លោក Kevin Hassett ដែលបានធ្វើជាប្រធានទីប្រឹក្សារបស់លោកត្រាំ ពីឆ្នាំ២០១៧ ដល់ឆ្នាំ២០១៩ មុនពេលត្រលប់មកវិញ ក្នុងតួនាទីជាទីប្រឹក្សាស្ម័គ្រចិត្ត ក្នុងខែមីនា ឆ្នាំ២០២០ បានលើកឡើងថា មានក្រុមហ៊ុនច្រើនណាស់ ដែលកំពុងជួបការលំបាក និងរង់ចាំជំនួយ។ ពេលនេះក្រុមហ៊ុនទាំងនោះ កំពុងរងផលប៉ះពាល់កាន់តែខ្លាំងដោយសារការឆ្លងរាតត្បាតវីរុសកូវីដ-១៩រលកថ្មី ហើយសេដ្ឋកិច្ចអាចប្រឈម នឹងអតិផរណាកើនឡើងខ្ពស់។
នៅថ្ងៃដំបូងដែលលោក ចូ បៃឌិន ចូលកាន់តំណែងជាផ្លូវការ សហរដ្ឋអាមេរិក បានរាយការណ៍ថា មានករណីស្លាប់រហូតដល់ទៅជាង ៤.២០០ ករណី ដែលជាថ្ងៃមានមនុស្សស្លាប់ច្រើនបំផុតទី២ នៅក្នុងការឆ្លងរាតត្បាតវីរុសកូវីដ-១៩ ។
យោងតាមមជ្ឈមណ្ឌលត្រួតពិនិត្យ និងបង្ការជំងឺឆ្លង (Centers for Disease Control and Prevention) របស់សហរដ្ឋអាមេរិកបានឱ្យដឹងថា រហូតមកទល់ពេលនេះ ពលរដ្ឋអាមេរិក រហូតដល់ទៅជាង ៤០០.០០០ នាក់បានស្លាប់ដោយសារវីរុសកូវីដ-១៩ ហើយតួលេខសរុប នៃអ្នកស្លាប់អាចឈានដល់៥០៨.០០០ នាក់ត្រឹមពាក់កណ្ដាលខែកុម្ភៈ ដើមឆ្នាំ២០២១ នេះ។
លោក Kevin Hassett បានគូសបញ្ជាក់ថា “ជំងឺនេះកំពុងតែឆ្លងរាតត្បាតយ៉ាងឆាប់រហ័សគួរឱ្យខ្លាច” ៕