ដោយៈសុខុម
ហុងកុង: ប្រទេសចិនបានស្រែកឡាំប៉ាថា ខ្លួនជា “ជនរងគ្រោះ” ដោយសារតែព័ត៌មានមិនពិត ក្រោយពីក្រុមហ៊ុនបណ្ដាញទំនាក់ទំនងសង្គមអាមេរិក Twitter បានចាត់វិធានការលើគណនី របស់ស្ថានទូតចិនប្រចាំនៅសហរដ្ឋអាមេរិក។ នេះបើយោងតាមសារព័ត៌មាន CNN ចុះផ្សាយកាលពីថ្ងៃទី២១ មករាម្សិលម៉ិញនេះ។
ការបញ្ចេញប្រតិកម្មទាំងក្ដីមួហ្មងនេះធ្វើឡើង ក្រោយពីក្រុមហ៊ុន Twitter បានបិទគណនីរបស់ស្ថានទូតចិនជាបណ្ដោះអាសន្ន ដោយសារខ្លឹមសារមួយដែលខ្លួនបានបង្ហោះនិយាយការពារការប្រព្រឹត្តរបស់រដ្ឋាភិបាលក្រុងប៉េកាំង ទៅស្ត្រីជនជាតិដើមភាគតិចវីហ្គួ (Uyghur) កាន់សាសនាអ៊ិស្លាម ដែលរស់នៅក្នុងតំបន់ភ្នំស្វយ័តស៊ីនជាំង (Xinjiang) ប្រទេសចិន។ ផូស (Post) ដែលត្រូវបានបង្ហោះកាលពីដើមខែនេះអះអាងថា ស្ត្រីជនជាតិដើមភាគតិចវីហ្គួ នៅតំបន់ស៊ីនជាំង លែងក្លាយជា “ម៉ាស៊ីនផលិតក្មេង” ទៀតហើយ។
ដោយដកស្រង់ព័ត៌មានចុះផ្សាយដោយកាសែតរដ្ឋ China Daily Post បានសរសេរថា “នៅក្នុងដំណើរការលុបបំបាត់អំពើជ្រុលហួសហេតុ ដែលមិនអាចទទួលយកបាន ស្ត្រី [ជនជាតិដើមភាគតិចវីហ្គួ] ត្រូវបានផ្ដល់សិទ្ធិស្របច្បាប់ ហើយសមភាពយេនឌ័រ និងសុខភាពបន្តពូជត្រូវបានលើកកម្ពស់” ។
ក្នុងសន្នសីទកាសែតនៅក្រុងប៉េកាំង កាលពីថ្ងៃព្រហស្បតិ៍ ទី២១ មករា អ្នកនាំពាក្យក្រសួងការបរទេសចិន បាននិយាយការពារចំណាត់ការរបស់ស្ថានទូតចិន។
លោកស្រី Hua Chunying ដែលជាអ្នកនាំពាក្យអះអាងថា “ប្រទេសចិន គឺជាជនរងគ្រោះដ៏ធំ។ មានព័ត៌មានមិនពិត និងព័ត៌មានអកុសលជាច្រើន ចុះផ្សាយអំពីប្រទេសចិន ជុំវិញបញ្ហាពាក់ព័ន្ធតំបន់ស៊ីនជាំង” ។ លោកស្រីបន្តថា “ពិតណាស់ថា ស្ថានទូតចិន ប្រចាំនៅសហរដ្ឋអាមេរិក មានទំនួលខុសត្រូវ និងកាតព្វកិច្ចក្នុងការបញ្ជាក់ពីអង្គហេតុ និងបកស្រាយការពិត” ។
លោកស្រីបានបន្ថែមទៀតថា “យើងសង្ឃឹមថា Twitter អាចរក្សាគោលការណ៍មិនលម្អៀង មិនបង្ហាញស្តង់ដារពីរលើបញ្ហានេះ ប៉ុន្តែផ្ទុយទៅវិញនឹងពង្រឹងការត្រួតពិនិត្យ ហើយកំណត់ថាអ្វីជាព័ត៌មានមិនពិត អ្វីជាពាក្យចចាមអារ៉ាម និងការកុហកបោកប្រាស់ ហើយអ្វីជាអង្គហេតុ និងការពិត” ។
សារព័ត៌មានផ្សេងៗបានចុះផ្សាយជាយូរមកហើយថា ជនជាតិដើមភាគតិចវីហ្គួ នៅតំបន់ស៊ីនជាំង ដែលស្ថិតនៅចុងភាគខាងលិចនៃប្រទេសចិន ត្រូវបានអាជ្ញាធរចាប់បង្ខំឱ្យគ្រៀវមិនឱ្យមានកូន ប៉ុន្តែទោះជាយ៉ាងណា ក្រុមមន្ត្រីចិន តែងតែច្រានចោលការចោទប្រកាន់នេះ។
ទន្ទឹមនេះ សហរដ្ឋអាមេរិក បានអះអាងជាផ្លូវការថា ប្រទេសចិនកំពុងតែប្រព្រឹត្តអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិ ទៅលើជនជាតិដើមភាគតិចវីហ្គួ និងក្រុមអ្នកកាន់សាសនាផ្សេងទៀតដែលរស់នៅក្នុងតំបន់ស៊ីនជាំង៕