ដោយ សុខុម
ភ្នំពេញ: ពេលនឹកដល់ម្រេចឆ្ងាញ់ជាងគេនៅប្រទេសកម្ពុជា យើងប្រាកដជានឹកឃើញដល់ម្រេចកំពត ព្រោះម្រេចខេត្តមួយនេះមិនត្រឹមតែមានឈ្មោះបោះសំឡេងនៅក្នុងប្រទេសប៉ុណ្ណោះទេ ថែមទាំងមានការទទួលស្គាល់យ៉ាងទូលំទូលាយនៅក្នុងទីផ្សារអន្តរជាតិទៀតផង។
អ្វីដែលកាន់តែគួរឱ្យអបរសាទរ និងគួរជាទីមោទនភាពបំផុតសម្រាប់កម្ពុជា ទាំងមូលនោះគឺ ម្រេចកំពត ត្រូវបានចុះបញ្ជីទទួលស្គាល់ផ្លូវការជាទំនិញសម្គាល់ភូមិសាស្ត្រ (Geographical Indication) ហៅកាត់ GI ដំបូងគេបង្អស់ក្រោមច្បាប់ទីក្រុងហ្សឺណែវ ស្តីពីកិច្ចព្រមព្រៀងទីក្រុងលីស្បោន អំពីឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញ។ នេះបើយោងតាមព័ត៌មានចុះផ្សាយលើគេហទំព័ររបស់អង្គការកម្មសិទ្ធិបញ្ញាពិភពលោក (World Intellectual Property Organization) ហៅកាត់ WIPO កាលពីថ្ងៃទី១៨ មករា ឆ្នាំ២០២១ ។
ការចុះបញ្ជីនេះកើតមានឡើង ក្រោយពីក្រសួងពាណិជ្ជកម្មកម្ពុជា បានដាក់លិខិតស្នើសុំទៅអង្គការកម្មសិទ្ធិបញ្ញាពិភពលោក ដែលមានទីស្នាក់ការកណ្ដាលនៅក្នុងទីក្រុងហ្សឺណែវ ប្រទេសស្វ៊ីស កាលពីដើមឆ្នាំ២០២០ ។
ច្បាប់ក្រុងហ្សឺណែវ ថ្មីនេះដែលបានចូលជាធរមានក្នុងឆ្នាំ២០២០ អនុញ្ញាតឱ្យមានការការពារកម្មសិទ្ធិបញ្ញាលើឈ្មោះប្រភពដើមទំនិញ និងម៉ាកសម្គាល់ភូមិសាស្ត្រទំនិញក្នុងប្រទេសជាង ៣០ ។
សលោក Alexandra Grazioli នាយកផ្នែកចុះបញ្ជីកម្មសិទ្ធិបញ្ញាបានលើកឡើងថា “ទំនិញសម្គាល់ភូមិសាស្ត្រនីមួយៗសុទ្ធតែមានប្រវត្តិរៀបរាប់អំពីប្រជាជនរបស់ខ្លួន និងប្រពៃណីរបស់ពួកគេ បង្ហាញទៅពិភពលោកថាវាជាទំនិញដែលផ្ដល់សុខភាពល្អដល់សហគមន៍មូលដ្ឋាន។ កិច្ចព្រមព្រៀងទីក្រុងលីស្បោន របស់ WIPO ជួយផ្សព្វផ្សាយអំពីទំនិញទាំងនេះទូទាំងពិភពលោក ជួយធ្វើឱ្យប្រសើរឡើងនូវជីវភាពរបស់អ្នកផលិតតាមរយៈការទទួលបានប្រាក់ចំណូលកាន់តែច្រើន ព្រមទាំងជីវិតរបស់អ្នកប្រើប្រាស់ទំនិញទាំងនេះ ហើយផ្សារភ្ជាប់ទំនាក់ទំនងរវាងកសិករ និងកម្មករទូទាំងពិភពលោក” ៕