ដោយ សុខុម
អាមេរិក៖ ខណៈរដ្ឋការរបស់ប្រធានាធិបតី ដូណាល់ ត្រាំ ជិតចប់អាណត្តិ ហើយប្រធានាធិបតីទើបជាប់ឆ្នោត ចូ បៃឌិន នឹងចូលកាន់តំណែងជាផ្លូវការនៅថ្ងៃពុធ ទី២០ មករា ដ៏ខ្លីខាងមុខនេះ បណ្ដាវិនិយោគិន និងសេដ្ឋវិទូហាក់មានសុទិដ្ឋិនិយមកាន់ខ្លាំងចំពោះកំណើនសេដ្ឋកិច្ចរបស់សហរដ្ឋអាមេរិក នៅក្នុងឆ្នាំ២០២១ នេះ។
តួយ៉ាង ក្រុមអ្នកវិភាគនៅធនាគារអាមេរិក ដ៏ធំ Goldman Sachs បានដំឡើងការព្យាករកំណើនសេដ្ឋកិច្ចអាមេរិក កាន់តែខ្ពស់ជាលើកទី២ នៅក្នុងខែនេះដោយសារក្ដីរំពឹងថា ផែនការស្ដារសេដ្ឋកិច្ចរបស់លោក ចូ បៃឌិន នឹងជួយជំរុញឱ្យសេដ្ឋកិច្ចងើបឡើងកាន់តែឆាប់រហ័សពីការឆ្លងរាតត្បាតវីរុសកូវីដ-១៩ ។ នេះបើយោងតាមសារព័ត៌មាន CNA ចុះផ្សាយកាលពីថ្ងៃទី១៧ មករា។
យោងតាមរបាយការណ៍មួយចេញផ្សាយកាលពីថ្ងៃសៅរ៍ ទី១៦ មករា បង្ហាញថា ធនាគារនេះរំពឹងថា សេដ្ឋកិច្ចរបស់សហរដ្ឋអាមេរិក នឹងទទួលបានកំណើនរហូតដល់ ៦,៦% ក្នុងឆ្នាំ២០២១ បើធៀបទៅនឹងការព្យាករលើកមុនរបស់ខ្លួនត្រឹម ៦,៤% ។
ទន្ទឹមនេះ ធនាគារនេះក៏បានដំឡើងការព្យាកររបស់ខ្លួនអំពីទំហំកញ្ចប់ថវិកាស្ដារសេដ្ឋកិច្ចដែលរដ្ឋការថ្មីក្រោមការដឹកនាំបស់លោក ចូ បៃឌិន នឹងមានលទ្ធភាពជំរុញឱ្យចេញជាលទ្ធផលក្នុងរយៈពេលដ៏ខ្លីខាងមុខពីចំនួន ៧៥០ ពាន់លានដុល្លារដល់ ១,១ ទ្រីលានដុល្លារផងដែរ។
កាលពីថ្ងៃព្រហស្បតិ៍ ទី១៤ មករា លោក ចូ បៃឌិន បានបញ្ចេញផែនការស្នើសុំកញ្ចប់ថវិកាស្ដារសេដ្ឋកិច្ចរហូតដល់ទៅ ១,៩ ទ្រីលានដុល្លារ ដោយលើកឡើងថា សហរដ្ឋអាមេរិក ត្រូវការការវិនិយោគច្បាស់លាស់ដើម្បីស្ដារសេដ្ឋកិច្ចឡើងវិញ និងពន្លឿនការចែកចាយវ៉ាក់សាំងកូវីដ-១៩ ដើម្បីគ្រប់គ្រងឱ្យបាននូវស្ថានការណ៍ឆ្លងរាតត្បាតវីរុសផ្លូវដង្ហើមដ៏កាចសាហាវនេះ។
ក្រុមអ្នកវិភាគនៅធនាគារដដែលបានសរសេរថា “ការកើនឡើងនូវចំណូលពលរដ្ឋក្រោយកាត់ពន្ធ (Disposable Personal Income) និងការចំណាយរបស់រដ្ឋាភិបាលនឹងជួយជំរុញឱ្យសេដ្ឋកិច្ចមានកំណើនខ្ពស់នៅឆ្នាំនេះ” ៕
