ដោយៈសុខុម
ភ្នំពេញ: ប្រធានាធិបតីសហរដ្ឋអាមេរិក លោកដូណាល់ ត្រាំ នៅតែឆ្លៀតវាយប្រហារប្រទេសចិន និងធ្វើកស៊ីក្រុមហ៊ុនចិនធំៗរហូតដល់ដង្ហើមចុងក្រោយ ដោយលោកបានដាក់ទណ្ឌកម្ម និងបម្រាមវិនិយោគបន្ថែមទៀត ក្នុងពេលដែលលោកកាន់អំណាចបានតែប៉ុន្មានថ្ងៃទៀត។
យោងតាមសារព័ត៌មាន BBC ចុះផ្សាយកាលពីថ្ងៃទី១៥ មករាម្សិលម៉ិញនេះបាន ឱ្យដឹងថា ក្រុមហ៊ុនចិនធំៗចំនួន ៩ទៀត ត្រូវបានដាក់បញ្ចូលបន្ថែមទៅក្នុងបញ្ជីខ្មៅរបស់មន្ទីបញ្ចកោណ Pentagon (ក្រសួងការពារជាតិអាមេរិក) ដោយសារមានទំនាក់ទំនងជាមួយយោធាចិន រួមមានទាំងក្រុមហ៊ុនផលិតទូរស័ព្ទ Xiaomi ដែលកំពុងធ្វើប្រតិបត្តិការនៅក្នុងប្រទេសកម្ពុជារបស់យើងផងដែរ។
លោកដូណាល់ ត្រាំ បានបង្កើនការចាត់វិធានការប្រឆាំងក្រុមហ៊ុនជាច្រើន ជាពិសេសក្រុមហ៊ុនចិន ដែលលោកជឿថា គំរាមកំហែងសន្តិសុខជាតិរបស់សហរដ្ឋអាមេរិក ក្នុងរយៈពេលប៉ុន្មានខែចុងក្រោយនេះ។
ជាការតបត ប្រទេសចិន នៅសប្ដាហ៍នេះបានចេញច្បាប់ថ្មីមួយ ដើម្បីការពារបណ្ដាក្រុមហ៊ុនរបស់ខ្លួន។
ក្នុងរយៈពេលប៉ុន្មានខែចុងក្រោយនេះ លោកដូណាល់ ត្រាំ បានកំណត់គោលដៅដោយចេតនាក្នុងការធ្វើបាបក្រុមហ៊ុនបច្ចេកវិទ្យាចិន ធំៗជាច្រើនដែលលោកជឿថា តែងតែចែករំលែកទិន្នន័យផ្ទាល់ខ្លួន របស់អ្នកប្រើប្រាស់ទៅឱ្យរដ្ឋាភិបាលក្រុងប៉េកាំង ក្នុងនោះរួមមានទាំងក្រុមហ៊ុន TikTok ក្រុមហ៊ុន Huawei និង WeChat ផងដែរ។
ការរឹតបន្តឹងជុំចុងក្រោយនេះរបស់លោក ដូណាល់ ត្រាំ ដែលត្រូវបានប្រកាសឱ្យមានប្រសិទ្ធភាព អនុវត្តន៍ចាប់ពីថ្ងៃព្រហស្បតិ៍ ទី១៤ មករា តទៅ រួមមានទាំងក្រុមហ៊ុនប្រេងខ្នាតយក្ស CNOOC និងក្រុមហ៊ុនផលិតទូរស័ព្ទ Xiaomi ដែលកាលពីខែវិច្ឆិកា ចុងឆ្នាំ២០២០ ដែលបានវ៉ាឈ្នះក្រុមហ៊ុន Apple របស់សហរដ្ឋអាមេរិក ក្លាយជាក្រុមហ៊ុនផលិតទូរស័ព្ទស្មាតហ្វូនធំបំផុតទី៣ក្នុងពិភពលោកផងដែរ៕
