ដោយគង់ ម៉ាលីនណា
ភ្នំពេញៈ ប្រាក់មានតម្លៃទៅតាមពេលវេលា និងរបៀបប្រើប្រាស់វាក្នុងមធ្យោបាយត្រឹមត្រូវ តែវាក៏គ្មានគុណតម្លៃដែរ បើយើងប្រើប្រាស់វាមិនសមស្រប និងខុសពេលវេលា។
មហាសេដ្ឋីប្រេងកាតអាមេរិកដ៏ល្បីល្បាញមួយរូប លោក John D. Rockefeller តែងបង្រៀនកូនៗទាំងប្រាំនាក់ របស់គាត់ឲ្យស្គាល់ពីតម្លៃរបស់ប្រាក់ គឺលោកមិនឲ្យប្រាក់ទៅកូនចាយ ដោយមិនបានបញ្ចេញកម្លាំងពលកម្មឡើយ។ កូនៗទាំងអស់ទទួលបានប្រាក់តែ 25% ប៉ុណ្ណោះក្នុងមួយសប្តាហ៍ ចំណែកឯ 75% ដែលនៅសល់ពួកគេ ត្រូវខំធ្វើការ រកដោយខ្លួនឯង។
គ្រប់កូនៗទាំងអស់ត្រូវមានសៀវភៅគណនីផ្ទាល់ខ្លួនមួយ។ 10% នៃចំណូលដែលរកបានត្រូវតែបរិច្ចាគជាអំណោយសប្បុរសធម៌ ហើយ១០%ទៀតត្រូវទុកជាប្រាក់សន្សំ។ នៅរៀងរាល់ចុងខែពួកគេត្រូវធ្វើសមតុល្យ និងរៀបរាប់អំពីការចាយវាយគ្រប់កាក់គ្រប់សេន ថាបានចាយទៅលើអ្វីខ្លះ និងដោយមូលហេតុអ្វី។
រឿងខាងលើបង្កប់ដោយគតិបណ្ឌិត ទាក់ទិននឹងតម្លៃរបស់ប្រាក់ជាច្រើន ដែលលោក អ្នកគួរពិចារណាលើចំណុចមួយចំនួនដូចជា ទី១ ប្រាក់ដែលរកបានដោយកម្លាំងខ្លួនឯង តែងមានតម្លៃ ទី២បរិច្ចាគ10%ដំបូងសម្រាប់សប្បុរសធម៌ ទី៣ សន្សំប្រាក់សម្រាប់ខ្លួនឯង10% បន្ទាប់ ទី៤ ទទួលខុសត្រូវគ្រប់កាក់គ្រប់សេន៕
