ដោយៈ ម៉ាណេត
ភ្នំពេញៈ សមាគមមីក្រូហិរញ្ញវត្ថុកម្ពុជា (CMA)បានប្រកាសកាលម្សិលម៉ិញថា គិតត្រឹមថ្ងៃទី៣ ខែមករា ឆ្នាំ២០២១ សមាជិកCMA បានផ្តល់ការរៀបចំឥណទាន (កម្ចី) ឡើងវិញចំនួនជាង១,៣៨ពាន់លានដុល្លារ។
សមាគមCMAបានឱ្យដឹងថា ចំនួនសរុបនៃការស្នើសុំរៀបចំ រចនាសម្ព័ន្ធឥណទានឡើងវិញមានចំនួន៣០៣.៥៩៣ ដោយក្នុងនោះសមាជិករបស់ CMA បានសម្រេចរៀបចំនូវការស្នើសុំរៀបចំឥណទានឡើងវិញចំនួន២៨៥.២៣៤។
សមាគមក៏បានបញ្ជាក់ដែរថា ការស្នើសុំការរៀបឥណទានឡើងវិញ ក្នុងរយៈពេលបួនខែចុងក្រោយនេះ នៅតែមានស្ថេរភាព ខណៈពាក្យស្នើសុំចំនួនជាង១០០០ ត្រូវបានដាក់ស្នើក្នុងមួយសប្តាហ៍។
នាយកប្រតិបត្តិសមាគមមីក្រូហិរញ្ញវត្ថុកម្ពុជា (CMA) លោក ផល វ៉ាន់ឌីកាល បានមានប្រសាសន៍កាលពីថ្មីៗនេះថា ការរៀបចំឥណទានឡើងវិញនេះ កន្លងមកគ្រឹះស្ថានមីក្រូហិរញ្ញវត្ថុ បានដោះស្រាយជូនអតិថិជនជាច្រើននាក់ហើយ ដែលរាប់ទាំងផលប៉ះពាល់ដោយសារជំងឺឆ្លងកូវីដ១៩ និងរងគ្រោះទឹកជំនន់។
លោកបញ្ជាក់ថា ដោយមានការអនុញ្ញាតិពីធនាគារជាតិនៃកម្ពុជា សមាជិករបស់សមាគមទាំងអស់ នឹងបន្តរៀបចំឥណទានរហូតដល់ខែមិថុនា ឆ្នាំ២០២១ ចំពោះអតិថិជនរងផលប៉ះពាល់ខាងលើ គឺអាចស្នើរសុំទៅកាន់គ្រឹះស្ថានមីក្រូហិរញ្ញវត្ថុ ដើម្បីទទួលបានភាពអនុគ្រោះជាបន្ត ក្នុងការចូលរួមលើកកម្ពស់ជីវភាព រស់នៅពួកគាត់ឲ្យល្អប្រសើរឡើង។
សមាជិកភាពរបស់សមាគមមានធនាគារចំនួន៤ គ្រឹះស្ថានមីក្រូហិរញ្ញវត្ថុទទួលបានប្រាក់បញ្ញើចំនួន៦ គ្រឹះស្ថានមីក្រូហិរញ្ញវត្ថុចំនួន៦៩ ស្ថាប័នភតិសន្យាហិរញ្ញវត្ថុចំនួន ១១ និងប្រតិបត្តិករឥណទានជនបទចំនួន១៩៕
