ដោយ ណែត
អាមេរិក៖ ក្រុមហ៊ុន Amazon បានប្រកាសថា ខ្លួនបានទិញយន្ដហោះពីក្រុមហ៊ុនអាកាសចរណ៍ចំនួនពីរ ដើម្បីជំរុញដល់បណ្តាញចែកចាយទំនិញរបស់ខ្លួន ខណៈការទិញទំនិញតាមអ៊ិនធឺណេតកើនឡើង និងការធ្វើដំណើរធ្លាក់ចុះក្នុងពេលមានជំងឺរាតត្បាត ។នេះបើតាមការចុះផ្សាយរបស់ CNA ។
ក្រុមហ៊ុនដែលមានមូលដ្ឋាននៅទីក្រុងស៊ីថលបាននិយាយថា ខ្លួនបានទិញយន្ដហោះ ប៊ូអ៊ីង ៧៦៧-៣០០ ចំនួន ១១ គ្រឿងក្នុងនោះ ៧ គ្រឿងមកពីក្រុមហ៊ុនដែលតា និង ៤គ្រឿងមកពីក្រុមហ៊ុន WestJet ។
អនុប្រធានក្រុមហ៊ុន Amazon Global Air លោកស្រី Sarah Rhoads បាននិយាយថា គោលដៅរបស់ក្រុមហ៊ុន គឺដើម្បីបន្តផ្តល់ជូនអតិថិជននៅទូទាំងសហរដ្ឋអាមេរិកតាមរបៀបដែលពួកគេរំពឹងទុកពីក្រុមហ៊ុន Amazon ហើយការទិញយន្ដហោះផ្ទាល់ខ្លួនរបស់យើង គឺជាជំហានបន្ទាប់ ឆ្ពោះទៅរកគោលដៅនោះ។
យោងតាមការប្រកាសរបស់ក្រុមហ៊ុននេះបានឱ្យដឹងថា យន្ដហោះដែលបានទិញពីក្រុមហ៊ុន WestJet កំពុងត្រូវបានផ្លាស់ប្តូរពីការដឹកអ្នកដំណើរ ទៅដឹកទំនិញវិញ ហើយនឹងក្លាយជាផ្នែកមួយនៃជើងហោះហើររបស់ក្រុមហ៊ុន Amazon នៅឆ្នាំនេះ ។ ចំណែកយន្ដហោះដែលបានទិញពីក្រុមហ៊ុន ដែលតា មិនត្រូវបានគេរំពឹងថានឹងត្រូវបានដាក់ឱ្យដំណើរការក្នុងជើងហោះហើរ របស់ក្រុមហ៊ុន Amazonនោះ រហូតដល់ឆ្នាំ ២០២២ នោះទេ ។ ក្រុមហ៊ុនអាកាសចរណ៍អាម៉ាហ្សូនកំពុងតែពង្រីកខ្លួននៅទូទាំងពិភពលោក និងរួមបញ្ចូលការប្រើប្រាស់ឥន្ធនៈ និងឧបករណ៍អាកាស ចរណ៍ប្រកបដោយនិរន្តរភាពដែលបំពាក់ដោយអគ្គិសនីពីបន្ទះសូឡា។
ក្រុមហ៊ុន Amazon បានវិនិយោគយ៉ាងច្រើនក្នុងការពង្រីក និងពង្រឹងបណ្តាញចែកចាយរបស់ខ្លួន ដោយចាប់ផ្តើមជាយូរមកហើយមុនពេលដែលជំងឺរាតត្បាតនេះបណ្តាលឱ្យអាជីវកម្មនៅលើវេទិកាពាណិជ្ជកម្មអេឡិចត្រូនិច កើនឡើងទៅទៀត។ ទន្ទឹមនឹងនេះដែរ ហានិភ័យនៃជំងឺកូវីដ១៩ បានបំផ្លាញឧស្សាហកម្មធ្វើដំណើរដែលបណ្តាលឱ្យក្រុមហ៊ុនអាកាសចរណ៍ពិចារណាលក់យន្តហោះ ដើម្បីកាត់បន្ថយការចំណាយនិងទទួលបានសាច់ប្រាក់ ៕
