ដោយៈវុត្ថា
ឥណ្ឌាៈ ធនាគារអភិវឌ្ឍន៍អាស៊ី (ADB) និងរដ្ឋាភិបាល បានចុះហត្ថលេខាផ្តល់ប្រាក់កម្ចី ១០០លានដុល្លារ ដើម្បីធ្វើទំនើបកម្ម និងធ្វើឱ្យប្រសើរឡើងនូវប្រព័ន្ធចែកចាយថាមពល ដើម្បីបង្កើនគុណភាព និងភាពអាចទុកចិត្តបាន នៃការផ្គត់ផ្គង់អគ្គិសនីនៅទីក្រុង Bengaluru ក្នុង Karnataka របស់ប្រទេសឥណ្ឌា។
យោងតាមគេហទំព័រ www.indiainfoline.com ចុះផ្សាយកាលពីម្សិលមិញនេះថា ក្រៅពីប្រាក់កម្ចីរដ្ឋ ១០០លានដុល្លារអាមេរិក ធនាគារអភិវឌ្ឍន៍អាស៊ី ក៏នឹងផ្តល់ប្រាក់កម្ចី ៩០លានដុល្លារ ទៅឱ្យក្រុមហ៊ុនផ្គត់ផ្គង់ថាមពលអគ្គីសនី Bangalore Electricity Supply Company Limited (BESCOM) ជាក្រុមហ៊ុនចែកចាយមួយ ក្នុងចំណោមក្រុមហ៊ុនចំនួន ៥ ដែលគ្រប់គ្រងដោយរដ្ឋ Karnataka។
លោកបណ្ឌិត Dr. Mohapatra តំណាងរដ្ឋាភិបាលឥណ្ឌាឱ្យដឹងថា ការផ្លាស់ប្តូរខ្សែចែកចាយ ក្រោមដីនឹងជួយបង្កើតបណ្តាញចែកចាយថាមពល ប្រកបដោយប្រសិទ្ធភាព កាត់បន្ថយការខាតបង់ផ្នែកបច្ចេកទេស និងពាណិជ្ជកម្ម និងកាត់បន្ថយការដាច់ចរន្តអគ្គិសនី ដែលបណ្តាលមកពីគ្រោះថ្នាក់ធម្មជាតិដូចជាព្យុះស៊ីក្លូន និងការរំខានពីខាងក្រៅ។
លោក Jeong តំណាងធនាគារអភិវឌ្ឍន៍អាស៊ីបានឱ្យដឹងថា គម្រោងនេះបង្ហាញពីការរៀបចំហិរញ្ញប្បទាន ប្រកបដោយភាពច្នៃប្រឌិត ដែលជាប្រភេទទីមួយរបស់ធនាគារអភិវឌ្ឍន៍អាស៊ី សម្រាប់សហគ្រាសគ្រប់គ្រងដោយរដ្ឋ ក្នុងគោលបំណងកាត់បន្ថយការប៉ះពាល់អធិបតេយ្យភាព និងជួយក្រុមហ៊ុន BESCOM ឆ្ពោះទៅរកវិធីសាស្ត្រ ផ្អែកលើទីផ្សារសម្រាប់ការប្រមូលប្រាក់សម្រាប់ចំណាយមូលធន។
ស្របទៅនឹងខ្សែចែកចាយក្រោមដី ខ្សែកាបអុបទិកជាង ២,៨០០គីឡូម៉ែត្រនឹងត្រូវបានដំឡើង ដើម្បីពង្រឹងបណ្តាញទំនាក់ទំនង។ ការផ្លាស់ប្តូរបណ្តាញចែកចាយប្រហែល ៧.២០០ គីឡូម៉ែត្រក្រោមដីនឹងជួយកាត់បន្ថយ ការខាតបង់ផ្នែកបច្ចេកទេស និងពាណិជ្ជកម្មប្រមាណ៣០ភាគរយ ។
ខ្សែកាបអុបទិក នឹងត្រូវបានប្រើសម្រាប់ប្រព័ន្ធវាស់ម៉ាញ៉េទិកឆ្លាតវៃ តាមប្រព័ន្ធស្វ័យប្រវត្តិកម្មចែកចាយ (DAS) នៅក្នុងបណ្តាញចែកចាយ និងបណ្តាញទំនាក់ទំនងផ្សេងទៀត។ គម្រោងនេះ នឹងដំឡើងគ្រឿងបន្លាស់រោទិ៍ស្វ័យប្រវត្តចំនួន ១៧០០គ្រឿង ដែលត្រូវបានកែសម្រួលជាមួយ (DAS) ដើម្បីត្រួតពិនិត្យកុងតាក់ខ្សែចែកចាយ ពីមជ្ឈមណ្ឌលបញ្ជា។
ប្រាក់កម្ចីនេះ នឹងពង្រឹងសមត្ថភាព ក្រុមហ៊ុន BESCOM ក្នុងប្រតិបត្តិការ និងថែរក្សាខ្សែកាបក្រោមដីឱ្យមានបរិស្ថាន និងសុវត្ថិភាពសង្គម ការគ្រប់គ្រងហិរញ្ញវត្ថុ និងហិរញ្ញប្បទានពាណិជ្ជកម្ម។ សមត្ថភាពគ្រប់គ្រងហិរញ្ញវត្ថុ ដែលប្រសើរឡើងនឹងជួយឱ្យក្រុមហ៊ុន BESCOM ទទួលបានទីផ្សារហិរញ្ញប្បទានពាណិជ្ជកម្មក្នុងស្រុកនិងអន្តរជាតិ។
ធនាគារអភិវឌ្ឍន៍អាស៊ីប្តេជ្ញាថា នឹងសម្រេចបាននូវវិបុលភាព ភាពធន់ និងនិរន្តរភាពនៅក្នុងតំបន់អាស៊ី និងប៉ាស៊ីហ្វិកស្របពេលដែលការខិតខំប្រឹងប្រែងរបស់ខ្លួន ដើម្បីលុបបំបាត់ភាពក្រីក្រ។
បង្កើតឡើងក្នុងឆ្នាំ ១៩៦៦ ធនាគារនេះគ្រប់គ្រងដោយសមាជិកចំនួន៦៨ប្រទេសពោលគឺ៤៩មកពីតំបន់៕
